ކުޑަ ކުއްޖަކު ޓެކްސީއަކަށް ހޮޑުލުމުން 1000 ރުފިޔާ ނަގައިފި

ހުޅުމާލެއިން މާލެއަށް ކުރި ޓެކްސީ ދަތުރެއްގައި، ކުޑަ ކުއްޖަކަށް ޓެކްސީ ތެރެއަށް ހޮޑުލެވުމުން ޓެކްސީ ސާފުކުރުމުގެ އަގު ކަމަށް ބުނެ 1،000 ރުފިޔާ ނަގައިފިއެވެ. 

އެކަން ހިނގި ގޮތް ހާމަކޮށް އެ ކުއްޖާގެ މަންމަ ސޯޝަލް މީޑިއާގައި ހިއްސާކުރި ޕޯސްޓެއްގައި ބުނީ ދަރިފުޅު ހޮޑުލީ މާފުއްޓަށް ފުރަންވެގެން ހުޅުމާލެއިން މާލެ ޖެޓީއަށް ދާން ނެގި ޓެކްސީއެއްގައި ކަމަށެވެ.

އެގޮތުން، ދަރިފުޅު ހޮޑުލުމުން ޓެކްސީ ދޮންނަން ބޮޑު ހަރަދެއް ދާނެކަމަށް ބުނެ، އެންމެ ފުރަތަމަ 1500 ރުފިޔާ ދިނުމަށް އެދުނުކަމަށް ކުއްޖާގެ މަންމަ ބުނެފައިވެއެވެ. ނަަމަވެސް ހޮޑު ހުރީ ވަަރަށް ކުޑަކޮށް ސީޓުގައި ހޭކިފައި ކަމަށް ވެސް އޭނާ ބުންޏެވެ. އަދި 1500 ރުފިޔާ މާބޮޑުކަމަށް ބުނުމުން ޓެކްސީ ޑްރައިވަރު ވަނީ 1000 ރުފިޔާއަށް ކުޑަ ކޮށްދީފައެވެ.

މާގިނަ ވާހަކަދައްކާނަމަ ކުރާ ހުރިހާ މަސައްތްކަތަކަށް ކުއްޖާގެ މަަންމަގެ އަތުން ރުފިޔާ ނަގާނެ ކަމަށް ބުނެފައިވާކަމަށް ވެސް ކުއްޖާގެ މަންމަ ބުންޏެވެ.

އެ ބެލެނިވެރިޔާ ފަހުން ވަނީ އެ ޓެކްސީ ރަޖިސްޓްރީކޮށްފައިވާ "ނަލަ ޓެކްސީ" އަށް ގުޅައި ޝަކުވާ ހުށަހަޅާފައެވެ. ނަމަވެސް މިހާތަނަށް ވެސް އެ ސެންޓަރުން ވަކި އެއްޗެއް ބުނެފައި ނުވާކަމަށް އޭނާ ވަނީ ބުނެފައެވެ.