ދޮގު މަޢުލޫމާތާއި ފިތުނަ އުފެދޭ ފަދަ ކަންކަމުން ދުރުހެލިވުމަށް މީޑިއާ ކޮމިޝަނުން އިލްތިމާސްކޮށްފި

 ދޮގު މަޢުލޫމާތާއި ފިތުނަ އުފެދޭ ފަދަ ކަންކަމުން ދުރުހެލިވެ، ޤައުމީ މަޞްލަޙަތު އިސްކޮށް، ޒިންމާދާރުކަމާއެކު ޚަބަރާއި މަޢުލޫމާތު ފެތުރުމަށް ހުރިހާ ބްރޯޑްކާސްޓަރުންނަށް މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން އިލްތިމާސްކުރައްވައިފިއެވެ.

މީޑިއާ ކޮމިޝަނުން މިފަދައިން ވިދާޅުވީ، ދިވެހިރާއްޖޭގެ ބްރޯޑްކާސްޓިންގ ދުވަހުގެ މުނާސަބަތުގައި ނެރުއްވި ނޫސްބަޔާނުގައެވެ. 

މި ނޫސްބަޔާނުގައި މީޑިއާ ކޮމިޝަނުން ވިދާޅުވީ، މިއަދަކީ ދިވެހިރާއްޖޭގެ ފަޚުރުވެރި ޤައުމީ ބްރޯޑްކާސްޓިންގ ދުވަސް ކަމަށާއި، މި ދުވަހުގެ ތަހުނިޔާ، ބްރޯޑްކާސްޓަރުންނަށާއި، މި ދާއިރާގައި މަސައްކަތްކުރައްވާ ހީވާގި މުވައްޒަފުންނަށާއި، ޚަބަރާއި މަޢުލޫމާތު ފެތުރުމުގެ ދާއިރާގެ އެންމެހައި ޚިދުމަތްތެރިންނަށް އަރިސްކުރައްވާ ކަމަށެވެ.

ބްރޯޑްކާސްޓިންގެ ޚިދުމަތަކީ ޤައުމެއްގެ އިޖުތިމާޢީ، ސިޔާސީ އަދި އިޤްތިޞާދީ ހޭލުންތެރިކަން އިތުރުކުރުމުގައްޔާއި، ރައްޔިތުންނަށް ތެދު މަޢުލޫމާތު ފޯރުކޮށްދިނުމުގައި އެންމެ މުހިންމު އެއް ވަސީލަތް ކަމަށާއި، ޚާއްޞަކޮށް، އިސްލާމީ ރިވެތި އަޚްލާޤާއި ދިވެހި ޤައުމިއްޔަތާއި ސަގާފަތް ދަމަހައްޓައި، ޞައްޙަ އަދި އިތުބާރުހުރި މަޢުލޫމާތު މުޖުތަމަޢަށް ފޯރުކޮށްދިނުމުގައި ބްރޯޑްކާސްޓަރުން 29 ޑިސެމްބަރު 1962 ގައި "މާލެ ރޭޑިއޯ" ގެ ނަމުގައި ފެށިގެން އަދާކުރައްވަމުން ގެންދަވަނީ ނުހަނު އަގުހުރި ޤައުމީ ޚިދުމަތެއްކަން މީޑިއާ ކޮމިޝަނުން ފާހަގަކުރެއްވިއެވެ.

ރާއްޖޭގެ ބްރޯޑްކާސްޓިންގ ތާރީޚުގެ މައްޗަށް އަލިއަޅުއްވާލަމުން މީޑިއާ ކޮމިޝަނުން ވަނީ،  ސެނެކޯ ރޭޑިއޯއާއި، 1967 ގައި މޯލްޑިވްސް އައިލެންޑް ބްރޯޑްކާސްޓިންގ ސަރވިސް (އެމްއައިބީއެސް) އަދި 1969 ގައި ރޭޑިއޯ މޯލްޑިވްސްގެ ނަމަށް ބަދަލުވެ، 1980 ގައި "ދިވެހިރާއްޖޭގެ އަޑު" ގެ ނަމުގައި ޚިދުމަތް ފުޅާވެގެންދިޔަކަން ފާހަގަކުރައްވާފައެވެ.

އަދި 1978 ގައި ޓެލެވިޒަން މޯލްޑިވްސް (ޓީވީއެމް) އުފެދިފައިވާއިރު، 2007 ގައި އަމިއްލަ ފަރާތްތަކަށް ބްރޯޑްކާސްޓްކުރުމުގެ ފުރުޞަތު ހުޅުވައިލެވުނު ކަމަށާއި، މި ތާރީޚީ އޮއިވަރުގެ ތެރެއިން 2010 ވަނަ އަހަރު އަމަލުކުރަން ފެށި ބްރޯޑްކާސްޓްކުރުމުގެ ގާނޫނާއެކު ބްރޯޑްކާސްޓަރުންނަށް ހާއްސަ ގާނޫނީ އޮނިގަނޑެއް ގާއިމުވެގެންދިޔަ ކަމަށް މީޑިއާ ކޮމިޝަނުން ވިދާޅުވިއެވެ. 

ހަމައެހެންމެ، 18 ސެޕްޓެމްބަރު 2025 ގައި ތަޞްދީޤުކުރެވުނު މީޑިއާ އަދި ބްރޯޑްކާސްޓިންގ ރެގިއުލޭޝަން ޤާނޫނުގެ ދަށުން މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމްއެމްބީސީ) އުފެދި، ބްރޯޑްކާސްޓިންގ ދާއިރާ ވަނީ ޒަމާނީ މީޑިއާތައް އެކުވެ އައު ދައުރަކަށް ވަދެފައިކަމާއި، މިއަދު  ދިވެހިރާއްޖޭގެ ބްރޯޑްކާސްޓިން ދުވަސް ފާހަގަކުރާއިރު މި ހިސާބަށް ދިވެހިރާއްޖޭގައި 37 ބްރޯޑްކާސްޓަރުންނާއި، 29 ރީބްރޯޑްކާސްޓަރުން ހިދުމަތް ދެމުން ގެންދާކަންކަން އުފަލާއެކު ފާހަގަކުރާ ކަމަށް މީޑިއާ ކޮމިޝަނުން ވިދާޅުވިއެވެ.

ޓެކްނޮލޮޖީގެ ގޮތުންނާއި މީޑިއާގެ ދާއިރާއަށް އަންނަމުންދާ ބަދަލުތަކާއެކު، ބްރޯޑްކާސްޓިންގ ދާއިރާ ކުރިއަރުވައި، ޒަމާނީ ވަސީލަތްތަކާއެކު ފެންވަރު ރަނގަޅު ޚިދުމަތްތަކެއް ރައްޔިތުންނަށް ފޯރުކޮށްދިނުމަށް އެ ކޮމިޝަނުން އަބަދުވެސް މަސައްކަތް ކުރަމުން ގެންދާނެ ކަމުގެ ޔަޤީންކަންދެއްވަމުން، މީޑިއާ ކޮމިޝަނުން ވިދާޅުވީ، މިގޮތުން ދާއިރާގެ މަސައްކަތްތެރިންގެ ފަންނީ ތަމްރީނުތަކާއި ޤާބިލުކަން އިތުރުކުރުމާއެކު ޤާނޫނާއި ގަވާއިދުތަކުގެ އިމުގެ ތެރެއިން، މިނިވަން އަދި ޒިންމާދާރު ނޫސްވެރިކަމަކާއި ބްރޯޑްކާސްޓިންގ ވެއްޓެއް ޤާއިމުކުރުމަށް ބާރުއެޅުމަކީ މައިގަނޑު އެއް އަމާޒު ކަމަށެވެ.

މީގެ އިތުރުން މީޑިއާ ކޮމިޝަނުން ވިދާޅުވީ، ބްރޯޑްކާސްޓިންގ ދާއިރާ ތަރައްޤީކޮށް، ދާއިރާގެ މަސައްކަތްތެރިންގެ ޙައްޤުތައް ރައްކާތެރިކުރުމަށް އެ ކޮމިޝަނުން ކުރަމުންދާ މަސައްކަތްތައް ހުއްޓުމެއްނެތި ކުރިއަށްދާނެ ކަމުގެ ޔަޤީންކަންދެއްވާ ކަމަށެވެ.

ދިވެހިރާއްޖޭގެ ބްރޯޑްކާސްޓްކުރުމުގެ ދުވަސް ފާހަގަކުރަން ފެށީ 2012 ވަނަ އަހަރުއެވެ.