ކާރަށް ހޮޑުލި މައްސަލައިގައި ވާހަކަ ފެތުރުނީ ހަގީގަތާ ހިލާފަށް: ނަލަ ޓެކްސީ

ހުޅުމާލޭން މާލެއަށް ކުރި ޓެކްސީ ދަތުރެއްގައި، ކުޑަ ކުއްޖަކަށް ޓެކްސީ ތެރެއަށް ހޮޑުލެވުމުން ޓެކްސީ ސާފުކުރުމަށް ބޮޑު އަދަދަކުން ޑިމާންޑްކޮށް، އެ މައްސަލައިގައި ކަންތައް ކޮށްފައިވާގޮތް ކަމަށް ބުނެ ސޯޝަލް މީޑިއާގައި ފަތުރަމުންދަނީ ހަގީގަތާއި ހިލާފު ވާހަކަތަކެއް ކަމަށް، މި ހާދިސާ ހިނގި ޓެކްސީ އޮޕަރޭޓްކުރާ ނަލަ ޓެކްސީއިން ނެރުނު ބަޔާނެއްގައި ބުނެފިއެވެ.

މި ހާދިސާ ހިނގި ގޮތް "ފަރުދުން" މީޑިއާއަށް ކިޔައިދެމުން އެ ޓެކްސީގެ ޑްރައިވަރު ބުނީ، ހޮޑުލުން ފަދަ ކަންކަމުގައި ކާރުގެ ސީޓު ސާފުކުރުމަށް އާންމުގޮތެއްގައި 1500 ރުފިޔާ ހޭދަވާކަމަށް ފުރަތަމަ ވެސް ކަސްޓަމަރަށް މައުލޫމާތު ދީފައި ވާނެ ކަމަށެވެ. މިހެން ޑްރައިވަރު ބުނުމުން ކަސްޓަމަރު ފޯނުން މީހަކަށް ގުޅައި ޑްރައިވަރާއި ވާހަކަ ދައްކައި، އޭނާ ބުނާ ތަނަކަށް ސާފުކުރަން ދިއުމުން އަގުހެޔޮވާނެ ކަމަށް ބުނިކަމަށެވެ. އަދި ކަސްޓަމަރު ބުނި ތަނަށް ޑްރައިވަރު ދިއުމުން އެ ތަނުން ސާފުކުރެވެން ނެތްކަމަށް ބުނެފައިވެއެވެ.

އެހެންކަމުން ޖެހިގެން ހުރި ތަނަށް ގޮސް ޑްރައިވަރު ވަނީ ސާފުކޮށްދޭ އަގު އަހައި ސާފުކޮށްފައެވެ. އެގޮތުން، އެތަނުން ސާފުކޮށްދެނީ 1600 އަށްކަމަށް ބުނުމުން އެ އަގު ކުޑަކުރުމަށް ވާހަކަދައްކައި އަގު ވަނީ 1000 އަށް ކުޑަ ކޮށްފައެވެ. މި ކަންކަން ހިނގި އިރުވެސް ޑްރައިވަރު ދިޔައީ ދަތުރުގެ ތެރެއިން ގުޅި ފަރާތާއި ވާހަކަދެކެވިގެން ކަމަށް ބުންޏެވެ.

އަދި މި ދަތުރުގައި ކަސްޓަމަރުގެ އަތުން ދަތުރު އަގު ލިބިފައިނުވާއިރު، ކަންކަމުގައި ހަގީގަތް އޮޅޭ ގޮތަށް މައުލޫމާތު ނުފެތުރުމަށް ނަލަ ޓެކްސީގެ ފަރާތުން ވަނީ އެދިފައެވެ.