އުޅަނދުފަހަރުގެ ފީތައް ދެން ހޭދަކުރާނީ މަގުމަތީގެ ރައްކާތެރިކަމަށް: ބަންޑާރަނައިބު

އެއްގަމު އުޅަނދުފަހަރު ރަޖިސްޓްރީ ކުރުމާއި އެނޫންވެސް އެކި ކަންކަމާ ގުޅިގެން ސަރުކާރަށް ނަގާ ފީތަކުން ލިބޭ އާމްދަނީ، ދެން ބޭނުންކުރެވޭނީ ހަމައެކަނި ޓްރެފިކް މައްސަލަތައް ހައްލުކޮށް މަގުމަތީގެ ރައްކާތެރިކަން ކަށަވަރުކުރުމަށް ކަމަށް ބަންޑާރަނައިބު އަޙްމަދު އުޝާމު ވިދާޅުވެއްޖެއެވެ.

ސަރުކާރުގެ ވަޒީރުން ރައްޔިތުންނާ ބައްދަލުކުރައްވައި ސުވާލުތަކަށް ޖަވާބުދެއްވުމަށް ބޭއްވި "އަހާ" ފޯރަމުގައި، އެއްގަމު ދަތުރުފަތުރުގެ އައު ޤާނޫނާ ގުޅޭގޮތުން ވާހަކަދައްކަވަމުން ބަންޑާރަނައިބު ވަނީ މި ބަދަލު ގެންނަންޖެހުނު މައިގަނޑު ސަބަބުތައް ތަފްސީލުކޮށްދެއްވާފައެވެ.

އުޝާމު ވިދާޅުވި ގޮތުގައި، ކުރިން ޢަމަލުކުރަމުންދިޔަ ޤާނޫނުގައި ގިނަ މައްސަލަތަކެއް ހުރުމުގެ ސަބަބުން މަގުމަތީގެ އަމާންކަން ޤާއިމުކުރުމަށް އެޅެންޖެހޭ ފިޔަވަޅުތައް އެޅުމަށް ވަނީ ދަތިތަކާ ކުރިމަތިވެފައެވެ. އަދި ޚާއްޞަކޮށް ވެރިރަށް މާލޭގައި ދިރިއުޅޭ ރައްޔިތުންގެ އެންމެ ބޮޑު އެއް ކަންބޮޑުވުމަކީ ޓްރެފިކްގެ ތޮއްޖެހުމާއި ރައްކާތެރިކަން ނެތުން ކަމަށްވާއިރު، ކުރިން ކައުންސިލްތަކަށް ލިބުނު ފައިސާއިން އެ މައްސަލަތަކަށް އެކަށީގެންވާ ހައްލެއް ހޯދައިދެވިފައި ނުވާކަން މަގުތަކުގެ ހާލަތުން ސާފުވާ ކަމަށް އޭނާ ފާހަގަކުރެއްވިއެވެ.

"މިކަމުން ލިބޭ ފައިސާ އަޅުގަނޑުމެން ހަރަދުކުރާނީ އެއްގަމު ދަތުރުފަތުރުގެ މައްސަލަތަކަށް ހައްލު ހޯދުމަށޭ. މިސާލަކަށް ފުލުހުންނަށް ބޭނުންވާ އެކި ވަސީލަތްތައް ހޯދުމަށޭ. މާލޭގެ މަގުތަކަށް އެކި މައްސަލަތައް ދިމާވެއްޖެއްޔާ ހަައްލުކުރާށޭ، ހަމައެއާއެކީ ވަކި ތަނެއްގައި ލައިޓް ހަރުކުރަންޖެހޭނަމަ އެކަމަށޭ. މި ފައިސާ ހުންނާނީ ވަކި ފަންޑެއްގައި. މި ފައިސާ ހަރަދުނުކުރެވޭނެ އެނޫން އެއްވެސް ކަމަކަށް،"

އުޝާމު ވިދާޅުވިއެވެ. 

އައު ޤާނޫނުގެ ދަށުން ގެނެވުނު މައިގަނޑު ބަދަލުތަކުގެ ތެރޭގައި، ވެހިކަލްތަކުން ނަގާ ފީތަކަށް ޚާއްޞަ ވަކި ފަންޑެއް ޤާއިމުކުރުން ހިމެނެއެވެ. މި ފަންޑު ބަލަހައްޓާނީ ކަމާބެހޭ ވަޒީރުން ހިމެނިވަޑައިގަންނަވާ ގޮތަށް އަލަށް އެކުލަވާލެވޭ "ރޯޑް ސޭފްޓީ ކައުންސިލް" އިންނެވެ.

މި ފަންޑުގައި ހުންނަ ފައިސާ ބޭނުންކުރުމަށް ކަނޑައަޅާފައިވާ މައިގަނޑު ދާއިރާތަކަކީ:

• މަގުމަތީގެ ޓްރެފިކް ބެލެހެއްޓުމަށް ފުލުހުންނަށް ބޭނުންވާ ޒަމާނީ ވަސީލަތްތައް ހޯދުން.
• މަގުތަކަށް ދިމާވާ އެކި މައްސަލަތައް ވަގުތުން މަރާމާތުކޮށް ހައްލުކުރުން.
• މަގުމަތީގެ ރައްކާތެރިކަމަށް ބޭނުންވާ ޓްރެފިކް ލައިޓްތަކާއި ނިޝާންތައް ހަރުކުރުން.

ބަންޑާރަނައިބު އަޙްމަދު އުޝާމު އިތުރަށް ވިދާޅުވީ، މި ފަންޑުގައިވާ ފައިސާ މި ނޫން އެހެން އެއްވެސް ބޭނުމަކަށް ޚަރަދު ނުކުރެވޭނެ ކަމަށެވެ. އަދި އައު ޤާނޫނު ތަންފީޒުވާން ފެށުމާއެކު، ކުރިއަށް އޮތް ދެތިން މަސްދުވަހުގެ ތެރޭގައި މަގުތަކުގެ ރައްކާތެރިކަމަށް ހެޔޮ ބަދަލުތަކެއް އަންނާނެ ކަމުގެ ފުރިހަމަ ޔަޤީންކަން ރައްޔިތުންނަށް ދެއްވާ ކަމަށްވެސް އޭނާ ވިދާޅުވިއެވެ.