ކަނޑުގެ ސަރަޙައްދު ބެލެހެއްޓުމުގެ ޤާބިލްކަން އިތުރުކުރުމަށް، ކޯސްޓްގާޑަށް އިތުރު 17 އުޅަނދު ހޯދަނީ

ދިވެހިރާއްޖޭގެ ޤައުމީ ދިފާޢީ ބާރު (އެމްއެންޑީއެފް) ގެ އަސްކަރީ ޤާބިލުކަން އިތުރުކޮށް، ރާއްޖޭގެ ކަނޑުގެ ސަރަޙައްދު ޕެޓްރޯލްކޮށް ބެލެހެއްޓުމުގެ އޮޕަރޭޝަންތައް ވަރުގަދަކުރުމުގެ ގޮތުން ކޯސްޓްގާޑަށް އިތުރު 17 އުޅަނދެއް ހޯދުމުގެ މަސައްކަތް ސަރުކާރުން ފަށައިފިއެވެ.

މިކަން ހާމަކުރެއްވީ ސަރުކާރުން ބޭއްވި "އަހާ" ފޯރަމްގައި ޢާންމުންގެ މީހަކު ކުރި ސުވާލަކަށް ޖަވާބު ދެއްވަމުން، މިނިސްޓަރ އޮފް ޑިފެންސް ޙަސަން ރަޝީދެވެ. އޭނާ ސުވާލުކޮށްފައިވަނީ ޤައުމަށް ކުރިމަތިވެދާނެ ކުއްލި ނުރައްކާތެރި ކޮންމެ ޙާލަތަކަށް ސިފައިން ފުރިހަމައަށް ތައްޔާރުވެފައިވޭތޯއެވެ.

އެ ސުވާލަށް ޖަވާބު ދެއްވަމުން ޑިފެންސް މިނިސްޓަރު ވިދާޅުވީ، ޤައުމަށް ދިމާވެދާނެ ކޮންމެ ނުރައްކަލަކުން ދިފާޢުވުމަށް ސިފައިން އަބަދުވެސް ތިބެނީ ފުރިހަމަ ތައްޔާރީ ޙާލަތުގައި ކަމަށެވެ. ނަމަވެސް އެކަމުގެ އެދެވޭ ނަތީޖާ އެންމެ ފުރިހަމަ ގޮތުގައި ޙާޞިލުކުރެވޭނީ ސިފައިންގެ ޚިދުމަތަށް ބޭނުންވާ ޒަމާނީ ވަސީލަތްތަކާއި އާލާތްތައް ފުރިހަމަކޮށްދީގެން ކަމަށް މިނިސްޓަރު ފާހަގަކުރެއްވިއެވެ.

ރާއްޖޭގެ ދިފާޢީ ބާރު ވަރުގަދަކުރުމަށް މި ސަރުކާރުން ޚާއްޞަ އިސްކަމެއް ދެއްވާކަން ބަޔާންކުރައްވަމުން މިނިސްޓަރު ވިދާޅުވީ، ވޭތުވެދިޔަ ދެ އަހަރާއި ބައިގެ ތެރޭގައި ބޭރުގެ އެކުވެރި ދެ ޤައުމަކުން ދެ މަނަވަރު ހޯދާފައިވާ ކަމަށެވެ. އެގޮތުން ތުރުކީވިލާތާއި އޮސްޓްރޭލިއާއާއެކު ބޭއްވުނު ރަޙުމަތްތެރި މަޝްވަރާތަކުގެ ތެރެއިން، އެ ދެ ޤައުމުން ހިލޭ އެހީގެ ދަށުން ދެ މަނަވަރު ސިފައިންގެ ޚިދުމަތަށް ލިބިފައިވާކަން މިނިސްޓަރު ހާމަކުރެއްވިއެވެ.

މީގެއިތުރުން، ރާއްޖޭގެ ވައިގެ ސަރަޙައްދު ބެލެހެއްޓުމަށް އަލަށް ތަޢާރަފުކުރި ޑްރޯންގެ ޚިދުމަތްވެސް މިނިސްޓަރު ފާހަގަކުރެއްވިއެވެ. އަދި ރާއްޖެއަކީ ބޮޑު ކަނޑުގެ ސަރަޙައްދެއް އޮންނަ ޤައުމަކަށް ވާތީ، ކަނޑުމަތީގެ ޕެޓްރޯލް ވަރުގަދަކުރުމަކީ ކޮންމެހެން މުހިންމު ކަމެއްކަން ފާހަގަކުރައްވައި، އެ މަސައްކަތަށް މިހާތަނަށް މުޅިން އަލަށް 3 އުޅަނދު ޚިދުމަތަށް ނެރެފައިވާ ކަމަށް ވިދާޅުވިއެވެ.

އަދި ކުރިއަށް އޮތް ތަނުގައި އިތުރު 17 އުޅަނދު ހޯދުމުގެ މަސައްކަތް ބާރަށް ކުރިއަށްދާ ކަމަށާއި، އޭގެ ތެރެއިން ބައެއް އުޅަނދުތައް ކުރިއަށް އޮތް ނޮވެންބަރު މަހުގެ ތެރޭގައި ލިބޭނެ ކަމަށްވެސް މިނިސްޓަރު ވިދާޅުވިއެވެ.

ޑިފެންސް މިނިސްޓަރު ޙަސަން ރަޝީދު ވިދާޅުވީ، މި ހުރިހާ މަސައްކަތްތަކަކީވެސް ރާއްޖޭގެ މިނިވަންކަމާއި އިސްތިޤްލާލު ރައްކާތެރިކޮށް، ކަނޑާއި ވައިގެ މަގުން ޤައުމުގެ ސަލާމަތީ ކަންކަން އެންމެ މަތީ ދަރަޖައިގައި ކަށަވަރުކުރުމަށްޓަކައި ސަރުކާރުން ކުރިއަށްގެންދާ މުހިންމު މަޝްރޫޢުތަކެއް ކަމަށެވެ.