ކުޑަކުއްޖެއްގެ ސުވާލަށް ވަޒީރުގެ ޖަވާބު: މަގުމަތީގެ ރައްކާތެރިކަމަށް "ބެލެންސެއް" މި ސަރުކާރުން ގެނެސްދޭނަން

މަގުމަތީގެ އަމާންކަމާއި ރައްކާތެރިކަން ކަށަވަރުކުރުމަށްޓަކައި، އާންމު ރައްޔިތުންނާއި ވިޔަފާރިތަކުގެ މަސްލަހަތު ހިމެނޭހެން ހަމަހަމަ "ބެލެންސެއް" މި ސަރުކާރުން ގާއިމުކޮށް ތަންފީޒުކުރާނެ ކަމަށް އިގްތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ، ސަރުކާރުން ބޭއްވި "އަހާ" ފޯރަމްގެ ތެރެއިން، ސްކޫލްތައް ފެށޭ އަދި ނިމޭ ވަގުތުތަކުގައި ބަރު އުޅަނދުތައް ދުއްވުމުގެ ސަބަބުން ދަރިވަރުންނަށާއި ބެލެނިވެރިންނަށް ކުރިމަތިވާ ތަކުލީފުތަކާ ގުޅޭގޮތުން އުމުރުން 9 އަހަރުގެ ކުއްޖަކު ކުރި ސުވާލަކަށް ޖަވާބު ދެއްވަމުންނެވެ.

ވަޒީރު ވިދާޅުވީ، ސްކޫލްތަކަށާއި އޮފީސްތަކަށް މީހުން ދަތުރުފަތުރުކުރާ ގަޑިތަކަކީ މަގުމަތީގެ ތޮއްޖެހުން ކުޑަ، އެންމެނަށް ވެސް ރައްކާތެރި ވަގުތުތަކަކަށް ހެއްދެވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވާ ކަމެއް ކަމަށެވެ. އަދި ދާދިފަހުން އެއްގަމު ދަތުރުފަތުރުގެ ގާނޫނު އިސްލާހުކޮށް ވުޖޫދުކުރެވިގެން ދިޔައީ ވެސް މިފަދަ ދަތިތަކަށް ދާއިމީ ހައްލެއް ހޯދައިދިނުމުގެ މަގުސަދުގައި ކަމަށް އެމަނިކުފާނު ފާހަގަކުރެއްވިއެވެ.

މީގެއިތުރުން، ސަރުކާރެއްގެ ކާމިޔާބީ ބިނާވެފައިވަނީ ހެދިފައިވާ ގަވާއިދުތަކާއި ގާނޫނުތައް ތަންފީޒުކުރެވޭ މިންވަރެއްގެ މައްޗަށް ކަމަށް ވިދާޅުވެ، މި ސަރުކާރުން އެ ގާނޫނުތައް ފުރިހަމައަށް ތަންފީޒުކޮށް ރައްޔިތުންގެ ފުރާނައާއި މުދަލުގެ ރައްކާތެރިކަން ކަށަވަރުކޮށްދޭނެ ކަމުގެ ފުރިހަމަ ޔަގީންކަން ވަޒީރު ދެއްވިއެވެ.

މި މައްސަލައަށް ހައްލެއް ހޯދުމުގެ ގޮތުން މީގެކުރިން ބަރު އުޅަނދުތައް ދުއްވާ ގަޑިތަކަށް ބަދަލުތަކެއް ގެނައުމުން ވިޔަފާރިވެރިންގެ ފަރާތުން ކަންބޮޑުވުންތަކެއް ކުރިމަތިވިކަން ފާހަގަކުރައްވައި ވަޒީރު ވިދާޅުވީ، ސަރުކާރުގެ ވިސްނުމަކީ ވިޔަފާރިތަކަށާއި އިގްތިސާދީ މަސައްކަތްތަކަށް ބުރޫނާރާނެހެން، އަދި އާންމުންނާއި ދަރިވަރުންގެ ރައްކާތެރިކަން ކަށަވަރުވާނޭ ފަދަ އިންސާފުވެރި ހަމައެއް ގާއިމުކުރުން ކަމަށެވެ.

"އަޅުގަނޑުމެން ނިންމަން މި ޖެހެނީ ގިނަ ބަޔަކަށް ގަބޫލުކުރެވޭނެ ހައްލެއް. އާންމު ރައްޔިތުންނާއި ދަރިވަރުންގެ ރައްކާތެރިކަން އިސްކޮށް، ވިޔަފާރިވެރިންނަށް އުފުލަންޖެހޭ ތަކުލީފު އެންމެ ކުޑަވާނޭ ގޮތަކަށް މިކަން ނިންމަންޖެހެނީ. އަޅުގަނޑު އަރުވަން ބޭނުންވާ ޔަގީންކަމަކީ ވަރަށް އަވަހަށް ސަރުކާރުން އެ ސިޔާސަތު އެކަށައަޅައި ތަންފީޒުކުރަން ފަށާނެ ކަން،"

ވަޒީރު ވިދާޅުވިއެވެ.

ދިވެހިރާއްޖޭގެ އެއްގަމު ދަތުރުފަތުރާއި، އުޅަނދު ރަޖިސްޓްރީ ކުރުމާއި، ދުއްވުމާއި ޕާކުކުރުމުގެ އިތުރުން އާންމު ދަތުރުފަތުރުގެ ހިދުމަތްތައް ހަރުދަނާ އޮނިގަނޑެއްގެ ތެރެއިން ހިންގުމަށްޓަކައި އެކުލަވާލެވުނު އެއްގަމު ދަތުރުފަތުރުގެ އައު ގާނޫނަށް ރަސްމީކޮށް އަމަލުކުރަން ފަށާފައިވަނީ މި ހިނގާ އޮކްޓޯބަރު މަހުގެ 1 ވަނަ ދުވަހުން ފެށިގެންނެވެ.