ބޮޑުތަކުރުފާނު މަގުގެ ދަރުމަވަންތައާއި އައިޖީއެމްއެޗު ހިމެނޭ ސަރަހައްދު ބަންދުކޮށްފި

ބޮޑުތަކުރުފާނު މަގުގެ އައިޖީއެމްއެޗާއި ދަރުމަވަންތަ ހޮސްޕިޓަލް ހިމެނޭ ސަރަހައްދު މަގު މަރާމާތުކުރުމަށްޓަކައި ރޭ ދަންވަރު 12:00 އިން ފެށިގެން ބަންދުކޮށްފައިވާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ފުލުހުން އެކްސްގައި ހިއްސާކުރި ޕޯސްޓެއްގައި ވިދާޅުވީ، މިއަދު އެ ސަރަހައްދުގެ މަގު ހެދުމުގެ މަސައްކަތް ފެށުމަށް ރާވާފައިވާތި ރޭ ދަންވަރު 12:00 އިން ފެށިގެން ޓްރެފިކް ފްލޯއަށް ބަދަލު ގެނެސް މަގު ބަންދުކޮށްފައިވާ ކަމަށެވެ. ފުލުހުން ޢާންމުކުރި ޗާޓުގައިވާ ގޮތުން ތާޖުއްދީން ހިނގުމާއި އަމީނީ މަގާ ދެމެދުގައި އޮންނަ ބޮޑުތަކުރުފާނު މަގުގެ ބައި ވަނީ ބަންދުކޮށްފައެވެ.

ބޮޑުތަކުރުފާނުމަގުގެ މަރާމާތް ކުރުމުގެ މަސައްކަތުގެ ތެރެއިން އައިޖީއެމްއެޗް އަދި ދަރުމަވަންތަ ހޮސްޕިޓަލް ހިމެނޭ ސަރަހައްދުގެ މަސައްކަތް 2026 އޮކްޓޫބަރު 5 ވަނަ ދުވަހު ފެށުމަށް ހަމަޖެހިފައިވާތީ، 2026 އޮކްޓޫބަރު 4 ވަނަ ދުވަހުގެ ރޭ 00:00 އިން ފެށިގެން، އެ ސަރަހައްދުގެ ޓްރެފިކް ފްލޯއަށް ޗާޓުގައިވާ ގޮތަށް ބަދަލު ގެނެވި، އާންމު ދަތުރުފަތުރަށް ބަންދުކުރެވޭނެ ވާހަކަ ދަންނަވަމެވެ. އަދި މި ސަރަހައްދުގައި ޕާކުކޮށްފައިވާ އުޅަނދުތައް، މަތީގައި ބަޔާންކޮށްފައިވާ ވަގުތުގެ ކުރިން އެ ސަރަހައްދުން ނެންގެވުމަށް ދަންނަވަމެވެ. މިފަދަ ކަންކަމުގައި އާންމު ރައްޔިތުންގެ ފަރާތުން ލިބޭ އެއްބާރުލުމަށް މި ފުރުސަތުގައި ޝުކުރު ދަންނަވަމެވެ. އަދި މި ބަދަލުގެ ސަބަބުން އާންމު ރައްޔިތުންނަށް ދިމާވެދާނެ ދަތިތަކަށްޓަކައި މައާފަށް އެދެމެވެ.

— Maldives Police (@PoliceMv) October 4, 2026

އެގޮތުން، މި ސަރަހައްދުގައި ޕާކުކޮށްފައި ހުރި އުޅަނދުތައް ނެގުމަށް ފުލުހުން ވަނީ އިލްތިމާސްކޮށްފައެވެ. އަދި މި ބަދަލުގެ ސަބަބުން ޢާންމު ރައްޔިތުންނަށް ދިމާވެދާނެ ދަތިތަކަށްޓަކައި ފުލުހުން ވަނީ މައާފަށް އެދި ރައްޔިތުންގެ ފަރާތުން ލިބޭ އެއްބާރުލުމަށް ޝުކުރު ދަންނަވައިފައެވެ.

އެ ސަރަހައްދު ބަންދުކޮށްފައި ވަނީ، މާލޭގެ ބޮޑުތަކުރުފާނު މަގު ޒަމާނީ ފެންވަރަށް ތަރައްޤީކުރުމުގެ ބޮޑު މަޝްރޫޢުގެ ދަށުން، ސުނާމީ ބިނާއިން ފެށިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަމައަށް މަގު ހެދުމުގެ ޢަމަލީ މަސައްކަތް ފެށުމަށްޓަކައެވެ.