އޯގާތެރި މުޖުތަމައެއް ބިނާކުރުމުގައި މުދައްރިސުންގެ ދައުރު ބޮޑު: މެޑަމް ސާޖިދާ

އޯގާތެރި މުޖުތަމައެއް ބިނާކުރުމުގައި މުދައްރިސުންގެ ދައުރު ބޮޑު ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

ބައިނަލްއަޤްވާމީ ގޮތުން ފާހަގަކުރާ ޓީޗަރުންގެ ދުވަހުގެ މުނާސަބަތުގައި ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި  މެޑަމް ސާޖިދާ ވަނީ، މުދައްރިސުންގެ ބުރަ މަސައްކަތާއި، އެބޭފުޅުންގެ އިޚްލާޞްތެރިކަމާއި އޯގާތެރިކަމާއެކު ކުރައްވަމުންގެންދަވާ މަސައްކަތް ފާހަގަކުރައްވާފައެވެ.

މެޑަމް ސާޖިދާ ވިދާޅުވީ، މުދައްރިސުންނަކީ ދަރިންނަށް މަގުދައްކައި، ތަރުބިއްޔަތުކޮށް، ގައުމު ފަޚުރުވެރިވާ ފަދަ ވަރުގަދަ އަދި އޯގާތެރި މުޖުތަމަޢުތަކެއް ބިނާކުރުމުގައި އިސް ދައުރެއް އަދާކުރަމުން އަންނަ ބޭފުޅުން ކަމަށެވެ. އަދި ޓެކްނޮލޮޖީއާއި އާޓިފިޝަލް އިންޓެލިޖެންސް (އޭ.އައި) އާއެކު ކްލާސްރޫމްތަކަށް ބަދަލުތައް އަންނަމުންދާއިރު، މުދައްރިސުން ދަނީ އައު ގޮންޖެހުންތަކާ ކުރިމަތިލައި، ނޭނގުންތަކުން ފުރިގެންވާ މުސްތަޤުބަލެއް ގިރާކުރަމުން ކަމަށްވެސް އެކަމަނާ ފާހަގަކުރެއްވިއެވެ.

މީގެއިތުރުން، މި ބަދަލުތަކަށް އިތުބާރާއެކު ހޭނުމަށްޓަކައި މުދައްރިސުން ބާރުވެރިކުރުވައި، އެބޭފުޅުންނަށް ބޭނުންވާ ވަސީލަތްތައް ފޯރުކޮށްދިނުމުގައި ދެމިތިބުމަކީ ނުހަނު މުހިންމު ކަމެއްކަމަށް އެކަމަނާ ވިދާޅުވިއެވެ. އަދި މުދައްރިސުން ދައްކަވާ ކެތްތެރިކަމަށާއި ބަހައްޓަވާ އަޅާލުމުގެ އިތުރުން، ކޮންމެ ދުވަހަކު ކުދިންގެ ޚިދުމަތުގައި ދެމިތިއްބަވާތީ ޝުކުރު އަދާކުރައްވަމުން، އެ މަސައްކަތުގެ ހެޔޮ އަސަރު މުޅި އުމުރަށް ދެމިގެންދާނެކަން ފާހަގަކުރެއްވިއެވެ.

މެޑަމް ސާޖިދާ ވަނީ ރާއްޖެއާއި ދުނިޔޭގެ އެކި ކަންކޮޅުތަކުގައި މަސައްކަތްކުރައްވާ ހުރިހާ މުދައްރިސުންނަށް ބައިނަލްއަޤްވާމީ މުދައްރިސުންގެ ދުވަހުގެ ހެޔޮއެދުންތައް އަރިސްކުރައްވާފައެވެ.

As we celebrate #WorldTeachersDay, we recognise the hard work, commitment, and kindness of teachers who make a lasting difference in our lives. Teachers have been guiding and nurturing our children and playing an important role in building the strong and caring communities we are proud of today. As our classrooms continue to evolve with technology and AI, our teachers are facing new challenges and navigating a progressively uncertain future. It is therefore vital that we continue to empower and equip teachers to adapt confidently to these changes. Today, I thank every teacher for your patience, your care, and for being there every day. Your work matters, and your impact lasts far beyond the classroom. Happy World Teachers’ Day!

— First Lady Sajidha Mohamed (@sajidhaamohamed) October 5, 2026

ބައިނަލްއަޤްވާމީ ޓީޗަރުންގެ ދުވަހަކީ ކޮންމެ އަހަރެއްގެވެސް އޮކްޓޫބަރު 5 ވަނަ ދުވަހު، ތަޢުލީމީ ޖީލެއް ބިނާކުރުމުގައި މުދައްރިސުން އަދާކުރާ މުހިންމު ދައުރުގެ އަގުވަޒަންކުރުމުގެ ގޮތުން ފާހަގަކުރާ ދުވަހެކެވެ. މި ދުވަސް ރަސްމީކޮށް ފާހަގަކުރަން ފެށީ 1994 ވަނަ އަހަރުއެވެ. ދިވެހިރާއްޖޭގައި ވެސް ކޮންމެ އަހަރަކު މި ދުވަސް ސްކޫލުތަކުގައި ކުލަގަދަކޮށް ފާހަގަކޮށް، ޤައުމު ބިނާކުރުމުގައި މުދައްރިސުން ވެވަޑައިގަންނަވާ ޤުރުބާނީގެ އަގުވަޒަންކުރެއެވެ.