ޅައިމަގު ބަނދަރު ތަރައްޤީކުރުމުގެ މަޝްރޫއުގެ 99 އިންސައްތަ ނިމިއްޖެ

ށ. ޅައިމަގު ބަނދަރު އަޕްގްރޭޑް ކުރުމުގެ ޑިޒައިން އަދި ބިލްޑް މަޝްރޫޢުގެ 99 އިންސައްތަ މަސައްކަތް މިހާރު ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.

އެމްޓީސީސީން އެކްސްގައި ހިއްސާކުރި މަޝްރޫޢުގެ އެންމެ ފަހުގެ މަޢުލޫމާތުގައި ބަޔާންކޮށްފައިވާ ގޮތުގައި، މިހާރު ކުރިއަށްދަނީ ބަނދަރު މަރާމާތުކުރުމަށްޓަކައި ކުރަންޖެހޭ ފުންކުރުމުގެ އެންމެ ފަހުގެ މަސައްކަތްތަކެވެ.

ދައުލަތުން އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫޢަކީ 60.7 މިލިއަން ރުފިޔާގެ އަގުހުރި މަޝްރޫޢެކެވެ. މި މަޝްރޫޢުގެ ދަށުން 31،000 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 350 މީޓަރުގެ ސަރަޙައްދެއްގައި ބޭރުތޮށި ލުމުގެ މަސައްކަތް ހިމެނެއެވެ.

Project Update: Design and Build of Harbor Upgrade in Sh. Lhaimagu Harbor maintenance dredging operations are ongoing. Overall project progress is 99%. Follow more updates at: https://t.co/RjAFCf3rnI #MTCCProjects #TeamMTCC #RayyithungeKunfuni #GaumuBinaakurumugaaMTCC https://t.co/b5SmInofM2

— MTCC Plc (@MTCCPlc) October 13, 2026

މީގެއިތުރުން، 276 މީޓަރުގެ ސަރަޙައްދެއްގައި އެއްގަމުތޮށި ލުމާއި، 500 މީޓަރުގެ ސަރަޙައްދެއްގައި ރިވެޓްމެންޓް ޖެހުމުގެ އިތުރުން 1،380 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުމާއި، ނެރު ބައްތި އަދި މަގުބައްތި ހަރުކުރުމުގެ މަސައްކަތް ވެސް މި މަޝްރޫޢުގެ ތެރޭގައި ހިމެނެއެވެ.

ޅައިމަގު ބަނދަރު ތަރައްޤީކުރުމުގެ މަސައްކަތް އެއްކޮށް ނިމުމުން، އެ ރަށުގެ ރައްޔިތުންނަށާއި ބަނދަރު ބޭނުންކުރާ އުޅަނދުފަހަރަށް ލަފާފުރުމުގައި ބޮޑެތި ފަސޭހަތަކެއް ލިބިގެންދާނެ ކަމަށް ގިނަ އާއްމު ރައްޔިތުން ގަބޫލުކުރެއެވެ.