ތިނަދޫގައި ކޮންޓްރޯލުން ނެއްޓިގެން ދިޔަ ސައިކަލެއް ދެ މީހުންނާއެކު މޫދަށް ވެއްޓިއްޖެ

ގދ. ތިނަދޫގައި ދެ މީހުންނާއެކު ދުއްވާފައި ދިޔަ ސައިކަލެއް ކޮންޓްރޯލުން ނެއްޓިގެން ގޮސް ބަނދަރު މޫދަށް ވެއްޓުމުގެ ހާދިސާއެއް ހިނގައިފިއެވެ. މި ހާދިސާ ހިނގާފައިވަނީ އިއްޔެ ހަވީރު 17:28 އެހައިކަންހާއިރުއެވެ.

ފުލުހުން ބުނި ގޮތުގައި މި ހާދިސާ ހިނގާފައިވަނީ ތިނަދޫ ޑީއެމްއެން ކެފޭ ކުރިމަތިން ބަނދަރާ ދިމާލަށް ސައިކަލެއް ކޮންޓްރޯލް ނުވެ ގޮހެވެ. މިހާތަނަށް ބެލި ބެލުމުން މި ހާދިސާ ހިނގަން މެދުވެރިވީ ސައިކަލަށް ފޮއްޓެއް އަރުވައިގެން ނައްޓާލަން އުޅުމުގެ ތެރޭގައި ކޮންޓްރޯލް ގެއްލިގެންނެވެ. އެވަގުތު ސައިކަލު ދުއްވަން އިން މީހާއާއި ފަހަތުގައި އިން މީހާއާއެކު ސައިކަލު ވަނީ މޫދަށް ވެއްޓިފައެވެ.

މި ހާދިސާގައި ސައިކަލުގައި ތިބި އެއްވެސް މީހަކަށް ސީރިއަސް އަނިޔާއެއް ލިބިފައެއް ނުވެއެވެ. އަދި ސައިކަލު ދުއްވަން އިން މީހާއަކީ އެ ކެޓަގަރީގެ އުޅަނދު ދުއްވުމުގެ ސައްހަ ލައިސަންސް އޮންނަ މީހެއް ކަމަށް ވެސް ފުލުހުން މައުލޫމާތު ދެއެވެ.

މޫދަށް ވެއްޓުނު ސައިކަލު ވަނީ ފުލުހުންނާއި އާންމުން ގުޅިގެން ކުރި މަސައްކަތުން އިއްޔެ ހަވީރު 17:47 އެހައިކަންހާއިރު މޫދުން ނަގައި، އުޅަނދުގެ ވެރިފަރާތާ ހަވާލުކޮށްފައެވެ.

މިފަދަ ހާދިސާތަކުން ރައްކާތެރިވުމަށްޓަކައި، އެއްގަމު އުޅަނދު ދުއްވާއިރު އުޅަނދު ދުއްވާ ފަރާތާއި މަގު ބޭނުންކުރާ އެހެން ފަރާތްތަކުގެ ރައްކާތެރިކަމަށް ހާއްސަ ސަމާލުކަމެއް ދިނުމަށް ފުލުހުން ވަނީ އިލްތިމާސްކޮށްފައެވެ. އަދި ގާނޫނާއި ގަވާއިދުތަކާ އެއްގޮތްވާ ގޮތުގެމަތިން، އުޅަނދުގެ ބެލެންސް ނުގެއްލޭނެހެންނާއި އުޅަނދު ދުއްވާ މީހާއަށާއި ފަހަތުގައި އިންނަ މީހާއަށް ދަތިނުވާނެ ގޮތަށް ރައްކާތެރިކަމާއެކު މުދާ އުފުލުމަށް ވެސް ފުލުހުންގެ ޚިދުމަތުން ވަނީ ހަނދާންކޮށްދީފައެވެ.