ޕީއެސްޖީއިން މެންޗެސްޓަރގައި ސިޓީ ބަލިކޮށް އިތުރަށް މޫޑު ޚަރާބުކޮށްލައިފި

އިނގިރޭސި ޕްރިމިއާ ލީގުގެ މާލީ ގަވާއިދުތަކާ ޚިލާފުވިކަން ސާބިތުވި ފަހުން، މެންޗެސްޓަރ ސިޓީގެ އަމިއްލަ ދަނޑުގައި ކުޅުނު ފުރަތަމަ މެޗުން ޕެރިސް ސެއިންޓް ޖާމަން (ޕީއެސްޖީ) އަތުން 4-2 އިން ބަލިވެ، އިއްތިހާދު ސްޓޭޑިއަމްގެ މާހައުލު އިތުރަށް ޚަރާބުވެއްޖެއެވެ.

ބުދަ ދުވަހުގެ ރޭ ކުޅުނު ޗެމްޕިއަންސް ލީގުގެ މި މެޗުގެ ފުރަތަމަ 35 މިނެޓުގެ ތެރޭގައި ޔޫރަޕުގެ ޗެމްޕިއަން ޕީއެސްޖީން ވަނީ ތިން ލަނޑު ޖަހައި ސިޓީ ސިއްސުވާލާފައެވެ. މެޗުގެ ފުރަތަމަ ލަނޑުޖެހީ ވިޗާ ވަރަޓްޝޭލިއާގެ ބަދަލުގައި ކުޅެން އެރުވި ޑެސިރޭ ޑުއޭއެވެ. އޭގެ ދެ މިނެޓު ފަހުން އުސްމާން ޑެމްބެލޭ ދެވަނަ ލަނޑު ޖެހިއިރު، ތިންވަނަ ލަނޑު އޭރިއާ ބޭރުން ކާމިޔާބުކުރީ ވިޓީނިއާއެވެ. މީގެއިތުރުން އަޝްރަފް ހަކީމީ ފޮނުވާލި ހަމަލާއެއް ގޯލުގެ ދަނޑިއަށްވެސް އަމާޒުވިއެވެ.

ދެވަނަ ހާފުގައި ސިޓީގެ ކޯޗު އެންޒޯ މަރެސްކާ އެއްފަހަރާ ތިން ބަދަލު ގެނެސްގެން ކުޅުން ރަނގަޅުކުރިއެވެ. އެގޮތުން އެންޓޮއިން ސެމެންޔޯ އާއި އެންޒޯ ފެނާންޑޭޒްއަށް ލިބުނު ފުރުސަތުތަކަށްފަހު، އާލިން ހާލަންޑް ވަނީ ބޮލުން ލަނޑެއް ޖަހައި ފަރަގު ކުޑަކޮށްދީފައެވެ. ނަމަވެސް، މަގްނެސް އަކްލިއުޝް ޕީއެސްޖީގެ ހަތަރުވަނަ ލަނޑު ޖަހައި އަނެއްކާވެސް ލީޑު ފުޅާކުރިއެވެ. އޭގެފަހުން ނޫނޯ މެންޑޭޒް ގޯލްގެ ރޮނގުމަތިން ބޯޅައެއް ސަލާމަތްކުރިއިރު، ހާލަންޑް ފޮނުވާލި ހަމަލާއެއް ގޯލުގެ ހުރަސްދަނޑިއަށްވެސް އަމާޒުވިއެވެ. މެޗުގައި ސިޓީގެ ދެވަނަ ލަނޑު ވެސް ކާމިޔާބުކުރީ ހާލަންޑްއެވެ. އަދި ޕީއެސްޖީއަށް އިތުރު ގޯލެއް ޖެހުމަށް މެޗުގެ ފަހުކޮޅު ލިބުނު ޕެނަލްޓީ ފެރާން ޓޮރެސް ފޮނުވާލިއިރު، ޑޮނަރުއްމާ ވަނީ އެ ޕެނަލްޓީ ދިފާއުކޮށްފައެވެ.

މާލީ ގަވާއިދުތަކާ ޚިލާފުވި 100 އަށްވުރެ ގިނަ މައްސަލަ ސާބިތުވެ، ސިޓީއާ ދެކޮޅަށް ބޮޑެތި ފިޔަވަޅުތަކެއް އެޅުމުގެ ބިރު އޮތް ނަމަވެސް، އެ ޓީމުން ވަނީ އާދީއްތަ ދުވަހު ލިވަޕޫލް އަތުން 3-0 އިން މޮޅުވެ ޕްރިމިއާ ލީގުގެ އެއްވަނައިގައި ހަމަޖެހިލާފައެވެ. ނަމަވެސް، ވިދިވިދިގެން ތިންވަނަ ފަހަރަށް ޗެމްޕިއަންސް ލީގު ކާމިޔާބުކުރުމުގެ އެންމެ ބޮޑު އުއްމީދެއް އޮތް ޕީއެސްޖީން މި މެޗުގައި ދެއްކި މޮޅު ކުޅުމާއެކު، ސިޓީއަށް ވަނީ ދަނޑުމަތީގައިވެސް ބޮޑު ގޮންޖެހުމަކާ ކުރިމަތިލާން ޖެހިފައެވެ.