ޅޮހީގައި ތަރައްގީކުރި އައުޓްޑޯ ޖިމް ހުޅުވައިފި

ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާއިން، ފެނަކައާ ހަވާލުކޮށްގެން ނ. ޅޮހީގައި ތަރައްގީކުރި އައުޓް ޑޯ ޖިމްގެ މަސައްކަތް ނިންމައި އާންމުންނަށް ހުޅުވާލައިފިއެވެ.

ފެނަކައާ ހަވާލުކޮށްގެން ކުރިއަށްގެންދިޔަ މި މަޝްރޫއު ނިންމައި، ޖިމް ހުޅުއްވައިދެއްވީ ކުޅިވަރާއި ހަކަތައާ ބެހޭ ވުޒާރާގެ ޑެޕިއުޓީ މިނިސްޓަރު މުހައްމަދު ނަވީޒް އަދި ޅޮހީ ކައުންސިލްގެ ރައީސް މުހައްމަދު ނައީމެވެ.

މި މަސައްކަތް ފެނަކަ ކޯޕަރޭޝަނާ ހަވާލުކޮށްފައި ވަނީ މިދިޔަ އަހަރު މާރޗް މަހުގެ ތެރޭގައެވެ. މި އައުޓްޑޯ ޖިމަކީ، ޅޮހީގެ ރައްޔިތުންގެ މެދުގައި ކަސްރަތުކުރުމުގެ އާދަ އަށަގަންނުވުމަށް ޓަކައި އަދި، ދުޅަހެޔޮ ޞިއްޙަތެއްގައި ދެމިތިބުމަށް ބޭނުންވާ ފުރުޞަތުތައް ފަހިކޮށްދިނުމުގެ މަޤްޞަދުގައި ޤާއިމުކުރެވުނު ތަނެކެވެ.
ރާއްޖޭގެ މީހުން ދިރިއުޅޭ ހުރިހާ ރަށެއްގައި އައުޓްޑޯ ޖިމް ޤާއިމުކުރުމަކީ ސަރުކާރުގެ ސިޔާސަތެކެވެ.

ސަރުކާރުން ނ. ޅޮހީގައި ތަރައްޤީކުރި އައުޓްޑޯ ޖިމް ހުޅުވައިފި. ފެނަކައާ ހަވާލުކޮށްގެން ކުރިއަށް ގެންދިޔަ މި މަޝްރޫޢު ނިންމައި، ޖިމް ހުޅުއްވައިދެއްވީ ކުޅިވަރު ވުޒާރާގެ ޑެޕިއުޓީ މިނިސްޓަރ މުޙައްމަދު ނަވީޒް އަދި ޅޮހީ ކައުންސިލްގެ ރައީސް މުހައްމަދު ނައީމް. ޖިމް ހުޅުވުމުގެ ރަސްމިއްޔާތުގައި ނ. ޅޮހީ ކައުންސިލްގެ އިސްވެރިންނާއި، މުވައްސަސާތަކުގެ ބޭފުޅުންގެ އިތުރުން އެރަށުގެ ރައްޔިތުން ބައިވެރިވި.

— Ministry of Youth Empowerment, Sports and Fitness (@MoYSF_mv) October 15, 2026

ރާއްޖޭގެ ހުރިހާ  ކަންކޮޅުތަކަށް ކުޅިވަރުގެ ދާއިރާއިން ތަފާތު ކުރިއެރުންތައް ގެނައުމަށް ސަރުކާރުން ދަނީ މުހިންމު މަސައްކަތްތަކެއް ކުރައްވަމުންނެވެ. އެގޮތުން،  ކުޅިވަރުގެ ދާއިރާ ހަރުދަނާކޮށް، ވަސީލަތްތައް ގާއިމުކޮށްދިނުމަކީ ރައީސުލްޖުމްހޫރިއްޔާގެ ހާއްސަ އިސްނެންގެވުމުގެ ދަށުން ކުރައްވަމުންގެންދަވާ މުހިންމު މަސައްކަތެކެވެ.