އިންވެސްޓަރުންނަށް ބިރުދެއްކުން ހުއްޓާލުމަކީ ޤައުމުގެ ކުރިމަގަށް ޓަކައި ކުރުން މުހިންމު ކަމެއް: ސަޢީދު

ރާއްޖޭގައި އިންވެސްޓް ކުރަން އަންނަ އިންވެސްޓަރުންނަށް އަމާޒުމޮށް ދޮގުވާހަކަތައް ފެތުރުމާއި އެމީހުންނަށް ބިރުދެއްކުން ހުއްޓާލުމަކީ ޤައުމުގެ ކުރިމަގަށްޓަކައި ކޮންމެހެން ކުރަންޖެހޭ މުހިންމު ކަމެއް ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ އެކްސްގައި ކުރެއްވި ޕޯސްޓެއްގައެވެ. ސަޢީދު ވިދާޅުވީ ސިޔާސީ ގޮތުން އުފެދޭ ޚިޔާލުތަފާތުވުންތަކަކީ އިންވެސްޓަރުންނާ ދެކޮޅަށް ހިންގޭ ކެމްޕޭނަކަށް ދުވަހަކު ވެސް ވެގެން ނުވާނެ ކަމަށެވެ. ރައްޔިތުންގެ ލާބައަށް ޓަކައި އަދި، އިންވެސްޓްމަންޓްތަކުގެ ސަބަބުން ފަހިވެގެންދާ ފުރުޞަތުތަކަށް ޓަކައި، ރާއްޖޭގައި އިންވެސްޓްކުރަން އަންނަ ފަރާތްތަކަށް އަމާޒުކޮށް ދޮގު ވާހަކަ ފެތުރުމާއި ބިރުދެއްކުމުގެ ޢަމަލުތައް އިދިކޮޅު ފަރާތްތަކުން ހުއްޓާލަންޖެހޭ ކަމަށް އެމަނިކުފާނު ފާހަގަކުރެއްވިއެވެ.

ދުނިޔޭގެ ވިޔަފާރީގެ ވާދަވެރިކަމަށް އަލިއަޅުއްވާލައްވަމުން ވަޒީރު ވިދާޅުވީ، މިފަދަ ކަންކަމުން ނާޖާއިޒު ފައިދާ ނަގަން ބޭނުންވާ ބޭރުގެ ފަރާތްތަކަށް މި ދޮގު ވާހަކަތައް ވެގެންދާނީ "ހިތްގައިމު މިޔުޒިކަކަށް" ކަމަށެވެ.

މީގެއިތުރުން، ޤަބޫލުކުރަން ދަތިވި ނަމަވެސް ރާއްޖޭގެ އިޤްތިޞާދުގެ މައި  ތަނބަކީ ފަތުރުވެރިކަން ކަމަށާއި، ދަތުރުފަތުރާއި ފަތުރުވެރިކަމުގެ ދާއިރާގެ ޓްރެންޑުތަކަކީ އަބަދުވެސް ބަދަލުވަމުން، ކުރިއަރަމުން އަންނަ ކަންކަން ކަމަށް ސަޢީދު ވިދާޅުވިއެވެ. އެހެންކަމުން ނަފުރަތާއި، ދޮގާއި، ހަސަދައިގެ މައްޗަށް މިފަދަ ޞިނާޢަތެއް ބިނާނުކުރެވޭނެ ކަމަށް ވަޒީރު ވިދާޅުވިއެވެ.

Political differences should never become a campaign against investors. For the good of our citizens and the opportunities investment can create, opposition movements should stop targeting those who are willing to invest in the Maldives. ރާއްޖޭގައި އިންވެސްޓް ކުރަން އަންނަ އިންވެސްޓަރުންނަށް އަމާޒުމޮށް ދޮގުވާހަކަތައް ފެތުރުމާއި އެމީހުންނަށް ބިރުދެއްކުން ހުއްޓާލުމަކީ ޤައުމުގެ ކުރިމަގަށްޓަކާ ކުރަންޖެހޭ މުހިއްމުކަމެއް. ދުނިޔޭގެ ވިޔަފާރީގެ ވާދަވެރިކަމުގައި މިފަދަކަންކަމުން ފައިދާނަގަންބޭނުންވާ ފަރާތްތަކަށް، މިފަދަ ދޮގުވާހަކަތައްވާނީ ހިތްގައިމު މިޔުޒިކަކަށް. ޤަބޫލުކުރަންދަތިވިޔަސް، ދިވެހިރާއްޖޭގެ އިޤްތިޞާދުގެ މައިތަނބަކި ޓޫރިޒްމް. ޓްރެވަލް އަދި ޓޫރިޒަމް އިންޑަސްޓްރީގެ ޓްރެންޑަކީ ބަދަލުވަމުން “އިވޯލްވް” ވަމުންދާއެއްޗެއް. އެއީ ޓޫރިޒަމްގެ ޚަޤީޤަތް. ނަފުރަތާއި ދޮގާއި ހަސަދައަކުން މިއިންޑަސްޓްރީ ބިނައެއް ނުކުރެވޭނެ. ރާއްޖޭގައި ހިނގާނީ ރާއްޖޭގެ ޤާނޫނު. އަދި ރާއްޖޭގެ ޤާނޫނުއަސާަސީ އާއި ޚިލާފު އެއްވެސްކަމެއް ރާއްޖޭގައި ނުހިންގޭނެ. ވީމާ ކަންކަމުގެ ޙަޤީޤަތް ބެއްލެވުމުގެ ބަދަލުގައި ދޮގުހަބަރާއި ނަފުރަތު ފެތުރުން ހުއްޓާލުމަށް އިލްތިމާސްކުރަން

— Mohamed Saeed (@em_saeed) October 17, 2026

ރާއްޖޭގައި އަބަދުވެސް ހިނގާނީ ރާއްޖޭގެ ޤާނޫނު ކަމަށާއި، ޤާނޫނުއަސާސީއާ ޚިލާފު އެއްވެސް ކަމެއް މި ޤައުމުގައި ނުހިނގާނެ ކަމުގެ ޔަޤީންކަން ދެއްވަމުން ވަޒީރު ވަނީ، ކަންކަމުގެ ޙަޤީޤަތް ބެލުމެއްނެތި ދޮގު ޚަބަރާއި ނަފުރަތު ފެތުރުން ހުއްޓާލުމަށް އިލްތިމާސްކުރައްވާފައެވެ.

ވަޒީރުގެ ޕޯސްޓުގައި ވަނީ، މޯލްޑިވްސް އިންޑިޕެންޑެންޓުން އާއްމުކޮށްފައިވާ ނޫހެއްގެ ފޮޓޯ ހިމަނުއްވާ، އެއީ ދޮގު ހަބަރުތަކެއްކަން ފާހަގަކުރައްވާފައެވެ.