އިނގިރޭސިވިލާތަށް ދަތުރުކުރާ ދިވެހިން އީޓީއޭއަށް ސަމާލުވުމަށް އެދިއްޖެ

އިނގިރޭސި ވިލާތަށް ދަތުރުކުރާ، އެ ޤައުމު މެދުވެރިކޮށް އެހެން ޤައުމުތަކަށް ޓްރާންސިޓް ދަތުރުތައް ކުރާ ދިވެހިން އިލެކްޓްރޯނިކް ޓްރެވަލް އޮތަރައިޒޭޝަން (އީޓީއޭ) އަށް ސަމާލުވުމަށް އިނގިރޭސި ވިލާތުގައި ހުންނަ ދިވެހި ހައި ކޮމިޝަނުން އިއްޔެ އެދިއްޖެއެވެ.

ދިވެހި ހައި ކޮމިޝަނުން އިއްޔެ "އެކްސް" ގައި ހިއްސާކެރެއްވި ޕޯސްޓެއްގައި ވިދާޅުވީ، ދަތުރު ފެށުމުގެ ކުރިން އިނގިރޭސި ވިލާތަށް އެތެރެވުމާއި ޓްރާންސިޓް ކުރުމުގެ އެންމެ ފަހުގެ ގަވާއިދުތައް ބެލުމަށް އެދޭ ކަމަށެވެ. އަދި އީޓީއޭއެއް ނަގަން ޖެހޭތޯ ބެލުމަށް ވެސް  ވަނީ ހަނދާން ކޮށްދީފައެވެ.

Notice: UK Electronic Travel Authorisation (ETA) Maldivian nationals planning to travel to or transit through the United Kingdom are advised to check the latest UK entry and transit requirements before their journey, including whether an Electronic Travel Authorisation (ETA) is required. For official guidance and the latest information, please visit: https://t.co/2sqrFsrTIF

— Maldives in UK (@MDVinUK) October 17, 2026

އިނގިރޭސި ވިލާތުގެ ޕާސްޕޯޓު އޮންނަ މީހުންނާއި އިނގިރޭސި ވިލާތުގައި ދިރިއުޅޭ ނުވަތަ ކިޔެވުމުގެ ހުއްދަ އޮންނަ މީހުންނަށް އީޓީއޭ ބޭނުމެއް ނުވާނެއެވެ. އީޓީއޭ އަށް އެދުމަށް 20 ޕައުންޑް ދައްކަން ޖެހޭއިރު، އިނގިރޭސި ވިލާތުގެ އެއާޕޯޓެއް މެދުވެރިކޮށް އެހެން ޤައުމަކަށް ދަތުރުކުރާއިރު، ބޯޑަރު ކޮންޓްރޯލް ހުރަސްކުރާ ނަމަ އީޓީއޭ ބޭނުންވާނެއެވެ.

އިނގިރޭސި ވިލާތަކީ ވަރަށް ގިނަ ދިވެހި ދަރިވަރުން ތައުލީމު ހާސިލް ކުރަމުން އަންނަ ޤައުމެކެވެ. އަދި އެ ޤައުމުގައި ބައެއް ދިވެހިން ދަނީ ދިރިއުޅެމުންނެވެ.