މަކަރާއި ހީލަތުގެ މައްސަލައެއްގެ ތުހުމަތުގައި 54 އަހަރުގެ އަންހެނަކު ހޯދަނީ

ދިވެހި ފުލުހުންގެ ޚިދުމަތުގެ އެންޓި-ސްކޭމް ސެންޓަރުން ބަލަމުންދާ މަކަރާއި ހީލަތް ހެދުމުގެ ތުހުމަތު ކުރެވޭ މައްސަލައެއްގެ ތަހުގީގަށް، މާލެއަށް ނިސްބަތްވާ 54 އަހަރުގެ އަންހެނަކު ހޯދުމުގެ މަސައްކަތް ފުލުހުން ފަށައިފިއެވެ.

ފުލުހުންގެ އިދާރާއިން މައުލޫމާތު ދެއްވި ގޮތުގައި، މި މައްސަލައިގައި ސުވާލުކުރުމަށް ހޯދަމުންދަނީ މއ. ގޯބިލިގަސްދޮށުގެ، ސަލީމާ ސަލީމް (54އ) އެވެ.

އޭނާ ހޯދުމަށް އާންމުކޮށް އިއުލާނު ކުރަންޖެހުނު ސަބަބެއް ކަމަށް ފުލުހުން ވިދާޅުވީ، މަކަރާއި ހީލަތުގެ މި މައްސަލައިގެ ތަހުގީގަށް އޭނާ ހާޒިރުކުރުމަށްޓަކައި ކުރި މަސައްކަތުން، މިހާރު ދިރިއުޅޭ ވަކި އެޑްރެހެއް ނުވަތަ ތަނެއް ދެނެގަނެވިފައި ނުވާތީއެވެ. އެހެންކަމުން، ގާނޫނީ ހަމަތަކުގެ މަތިން ހާޒިރުވުމުގެ ޗިޓު އޭނާއަށް ރައްދުކުރެވިފައި ނުވާ ކަމަށް ފުލުހުން ބަޔާންކުރެއެވެ.

މި މައްސަލައިގައި ސަލީމާ ސަލީމް ހޯދުމަށް އިއުލާނު ނެރެފައިވަނީ ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގެ ދަށުންނެވެ. އެ މާއްދާގައިވާ ގޮތުން ތަހުގީގަށް ހާޒިރުކުރަން ބޭނުންވާ ފަރާތަކަށް ޗިޓު ހަވާލުނުކުރެވިއްޖެ ހާލަތެއްގައި އާންމުކޮށް އިއުލާނުކޮށްގެން ހާޒިރުވުމަށް އެންގިދާނެއެވެ.

ފުލުހުން އަންގާފައިވަނީ، މި ހިނގާ އޮކްޓޯބަރު މަހުގެ 26 ވާ އާދީއްތަ ދުވަހުގެ ހެނދުނު 10:00 އަށް، ސާޖަންޓު އާދަމް ޙަލީމް ކްރިމިނަލް އިންވެސްޓިގޭޝަން ބިލްޑިންގއަށް އޭނާ ހާޒިރުވުމަށެވެ.

މި މައްސަލައަކީ ތަހުގީގު ކުރިއަށްދާ މައްސަލައަކަށް ވާތީ، ހިންގާފައިވާ މަކަރާއި ހީލަތުގެ ފުރިހަމަ ތަފްސީލެއް އަދި މި މައްސަލައިގައި ގެއްލުނު ފައިސާގެ އަދަދެއް ފުލުހުން އަދި ހާމަކޮށްފައެއް ނުވެއެވެ.