ރަސްމާލެ މަޝްރޫއާ ގުޅިގެން އިމްރާނާ ބައްދަލެއް ނުކުރާނެ، ސިޔާސީ ޕާޓީތަކަށް ފުރުސަތު އެބައޮތް: ތަރުޖަމާނު

ރަސްމާލެ މަޝްރޫއާ ގުޅިގެން އިބުރާހިމް މުހައްމަދު ސޯލިހުގެ ސަރުކާރުގެ ހޯމް މިނިސްޓަރު އަދި އަދާލަތު ޕާޓީގެ ކުރީގެ ރައީސް ޝައިޚް އިމްރާން އަބްދުﷲ އާ ސަރުކާރުން އެއްވެސް މަޝްވަރާއެއް ނުކުރާނެ ކަމަށާއި، ނަމަވެސް ސިޔާސީ ޕާޓީތަކުން ރަސްމީ ހައިސިއްޔަތުން އެދިއްޖެ ނަމަ އެ ފުރުސަތު އޮންނާނެ ކަމަށް ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު މުހައްމަދު ހުސެއިން ޝަރީފް (މުންދު) ވިދާޅުވެއްޖެއެވެ.

މިއަދު އިދިކޮޅު ފަރާތްތަކުން ބޭއްވި ނޫސްވެރިންގެ ބައްދަލުވުމެއްގައި، ރަސްމާލެ މަޝްރޫއާ ދެކޮޅަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒާ ބައްދަލުކުރަން އެދޭނެ ކަމަށް ބުނެފައިވާތީ، އެކަމާ ގުޅޭގޮތުން ނޫސްވެރިން ސުވާލު ދެންނެވުމުން ތަރުޖަމާނު ވިދާޅުވީ، ޝައިޚް އިމްރާނަކީ މިވަގުތު ދައުލަތުގެ ނުވަތަ އެއްވެސް ސިޔާސީ ޕާޓީއެއްގެ ވެސް ރަސްމީ މަގާމެއް ފުރުއްވަމުން ގެންދަވާ ބޭފުޅެއް ނޫން ކަމަށެވެ. މީގެއިތުރުން، ކުރީގެ މަޝްހޫރު ދީނީ އިލްމުވެރިޔާ އަދި ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މަރްޙޫމް ޑރ. އަފްރާޝީމް އަލީގެ މަރުގެ ހާދިސާއާ ގުޅުވައިގެން ވެސް ހަގީގަތެއް ނެތް ވާހަކަތަކާއި ލިޔެކިޔުންތަކެއް އިމްރާން ދައްކަވާފައިވާކަން ފާހަގަކުރައްވައި، ތަރުޖަމާނު ވިދާޅުވީ އޭނާއަކީ ސަރުކާރުން އިތުބާރުކުރާ ފަދަ ބޭފުޅެއް ނޫން ކަމަށެވެ.

ނަމަވެސް، މި މައްސަލައިގައި ސިޔާސީ ޕާޓީއަކުން ރަސްމީ ސިފައެއްގައި ކަންބޮޑުވުން ފާޅުކޮށް މަޝްވަރާއަށް އެދިއްޖެނަމަ، އެކަމަށް އިޖާބަދިނުމާމެދު ސަރުކާރުން ގޮތެއް ނިންމާނެ ކަމަށް ތަރުޖަމާނު ވިދާޅުވިއެވެ. އަދި ހަމައެއާއެކު، ރައްޔިތުންގެ މަޖިލީހުގެ މެންބަރުންނަށް ކަނޑައެޅިފައިވާ އުސޫލުތަކުގެ ތެރެއިން ސަރުކާރާ ބައްދަލުކުރުމުގެ ދޮރު އަބަދުވެސް ހުޅުވިފައިވާ ކަމަށާއި، އާންމު ރައްޔިތުންނަށް ވެސް ރައީސުލްޖުމްހޫރިއްޔާއާ ބައްދަލުކުރެވޭނެ އިންތިޒާމުތައް ހަމަޖެހިފައިވާކަން އޭނާ ހަނދާންކޮށްދެއްވިއެވެ.

ރަސްމާލެ މަޝްރޫއާ ބެހޭގޮތުން ވާހަކަދައްކަވަމުން ތަރުޖަމާނު އިތުރަށް ވިދާޅުވީ، ގައުމީ ފެންވަރުގެ ބޮޑެތި މަޝްރޫއުތައް ކުރިއަށްގެންދާއިރު ރައްޔިތުންގެ މެދުގައި ސުވާލުތަކާއި ކަންބޮޑުވުންތައް އުފެދުމަކީ ގުދުރަތީ ކަމެއް ކަމަށެވެ. އެހެންނަމަވެސް، މި މައްސަލައިގައި ކަންކަމުގެ ހަގީގަތް އޮޅުންފިލުވުމުގެ ބަދަލުގައި، ސިޔާސީ ޕޯޑިއަމްތަކުގައި ހަގީގަތާ ހިލާފު ވާހަކަތައް ދައްކައިގެން ރައްޔިތުންނަށް ކަންކަން އޮޅުވާލަން ބަޔަކު ގަސްދުގައި މަސައްކަތް ކުރަމުންދާ ކަމަށް އޭނާ ތުހުމަތުކުރެއްވިއެވެ. އެހެންކަމުން، އިމްރާން އަމިއްލަ ގޮތުން ކުރައްވާ އެއްވެސް ޑިމާންޑަކަށް ސަރުކާރުން ސަމާލުކަން ދޭންޖެހޭ އެއްވެސް ސަބަބެއް ނެތް ކަމަށް ވެސް ވިދާޅުވިއެވެ.

ސަރުކާރުން މި މޭރުމުން ވާހަކަދައްކާފައި މިވަނީ، ރަސްމާލެ ތަރައްގީކުރުމުގެ މަޝްރޫއު ޔޫއޭއީގެ އީގަލް ހިލްސް ކުންފުންޏާ ހަވާލުކޮށްފައިވާތީ، އެކަމާ ދެކޮޅަށް އިދިކޮޅު މައި ޕާޓީ އެމްޑީޕީ އަދި ޕީއެންއެފްގެ ބޭފުޅުންނާއެކު އިމްރާން އަބްދުﷲ ބޭއްވެވި ނޫސްވެރިންގެ ބައްދަލުވުމަކާ ގުޅިގެންނެވެ.