ޕާކިސްތާނުގެ ރައީސް ދެއްވި ރޭގަނޑުގެ ފަރިއްކޮޅެއްގައި ރައީސުލްޖުމްހޫރިއްޔާ ބައިވެރިވެވަޑައިގެންފި

ޕާކިސްތާނުގެ ރައީސް އާޞިފް ޢަލީ ޒަރްދާރީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޝަރަފުގައި ބޭއްވެވި ރަސްމީ ރޭގަނޑުގެ ފަރިއްކޮޅެއްގައި އެމަނިކުފާނު ބައިވެރިވެވަޑައިގެންފިއެވެ.

މި ބައްދަލުކުރެއްވުމާއި ފަރިއްކޮޅަށްފަހު، ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، ޕާކިސްތާނުގެ ރައީސް އާސިފް ޢަލީ ޒަރްދާރީއާ ބައްދަލުކުރައްވައި، އެމަނިކުފާނުގެ ޝަރަފުގައި ބޭއްވެވި ޚާއްޞަ ރަސްމީ ޖާފަތުގައި ބައިވެރިވެވަޑައިގަތުމަކީ ލިބިވަޑައިގެންނެވި ވަރަށް ބޮޑު އުފަލެއް ކަމަށެވެ. އަދި އެމަނިކުފާނަށާއި، އަނބިކަނބަލުންނަށް، އަދި ވަފުދުގެ ބޭފުޅުންނަށް ޕާކިސްތާނުން ވިދާޅުވި ހޫނު މަރުޙަބާއަށާއި އަދާކުރެއްވި މެހެމާންދާރީއަށްޓަކައި ހިތުގެ އިޚްލާޞްތެރިކަމާއެކު ޝުކުރު އަދާކުރައްވާ ކަމަށްވެސް ވިދާޅުވިއެވެ.

ރައީސް ވިދާޅުވި ގޮތުގައި، މި ބައްދަލުކުރެއްވުމުގައި ދެޤައުމުގެ ދެމެދުގައި ދެކެވުނު އެކުވެރި ވާހަކަތަކުގެ ސަބަބުން، ދިވެހިރާއްޖެ އާއި ޕާކިސްތާނާ ދެމެދު އޮތް ޒަމާންވީ އަޚުވަންތަ ގުޅުން އިތުރަށް ބަދަހިވެގެން ގޮސްފައިވާ ކަމަށެވެ. މިއީ އިސްލާމީ އެއް އަޤީދާއާއި، އެއްގޮތް އާދަކާދަތަކާއި، އެއްބަޔަކު އަނެއް ބަޔަކަށް ކުރާ އިޙްތިރާމާއި، ދެ ޤައުމުގެ ރައްޔިތުންގެ މެދުގައި އޮތް ވަރުގަދަ ގުޅުމުގެ މައްޗަށް ބިނާވެފައިވާ ގުޅުމެއްކަން އެމަނިކުފާނު ފާހަގަކުރެއްވިއެވެ.

It was a distinct pleasure to meet with His Excellency President Asif Ali Zardari, @PresOfPakistan, this evening and to attend the gracious State Banquet hosted in our honour. I extend my heartfelt gratitude for the exceptional warmth and gracious hospitality extended to my wife, my delegation, and me. Our warm and friendly discussions reaffirmed the enduring bonds of brotherhood between the Maldives and Pakistan, rooted in our shared faith, values, mutual respect, and strong people-to-people ties. I am deeply encouraged by our shared commitment to further strengthening this cherished friendship, deepening bilateral cooperation, and advancing our common aspirations for peace, progress, and prosperity.

— Dr Mohamed Muizzu (@MMuizzu) October 21, 2026

މީގެއިތުރުން، ދެ ޤައުމުގެ ދެމެދުގައި އޮތް ގާތް ރަޙްމަތްތެރިކަން އިތުރަށް ހަރުދަނާކޮށް، ދެފަރާތުގެ އެއްބާރުލުން އިތުރުކުރުމަށާއި، ޞުލްޙަމަސަލަސްކަމާއި، ކުރިއެރުމާއި، ތަނަވަސްކަމަށްޓަކައި ދެ ޤައުމުން ގެންގުޅޭ އެއްގޮތް އަމާޒުތައް ޙާޞިލްކުރުމަށް ދެބޭފުޅުންގެ މެދުގައި އެއްބަސްވެވިފައިވާތީ އެކަމުން ވަރަށް ބޮޑު ހިތްވަރެއް ލިބިވަޑައިގެންނެވި ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ މިހާރު ޕާކިސްތާނަށް ކުރައްވަމުން މި ގެންދަވާ ރަސްމީ ދަތުރުފުޅަކީ، ފާއިތުވި 10 އަހަރުގެ ތެރޭގައި ރާއްޖޭގެ މަތީ ފަންތީގެ ވެރިއަކު އެ ޤައުމަށް ކުރައްވާ ފުރަތަމަ ދަތުރުފުޅެވެ.