ވިއްސާރައާ ގުޅިގެން ވެލިބަސްތާ ޖެހުމަށް އެދުނު 31 ތަނަކަށް އެހީތެރިކަން ފޯރުކޮށްދީފި

މާލެއަށް ބޯކޮށް ވާރޭވެހި ފެންބޮޑުވުމާ ގުޅިގެން، ފެންބޮޑުވިޔަ ނުދިނުމަށްޓަކައި ވެލިބަސްތާ ޖެހުމަށް އެދުނު ތަންތަނުގެ ތެރެއިން މިހާތަނަށް 31 ތަނަކަށް އެހީތެރިކަން ފޯރުކޮށްދީފައިވާކަން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.

އެންޑީއެމްއޭއިން އެކްސްގައި އާންމުކުރި އަދާހަމައިގައިވާ ގޮތުން، ރޭގެ 23:00 އާ ހަމައަށް ވެލިބަސްތާ ޖަހައިދިނުމަށް އެދި ގިނަ އަދަދެއްގެ ތަންތަނުން ރިޕޯޓުކޮށްފައިވެއެވެ.

އޭގެ ތެރޭގައި 33 ގެއަކާއި، 35 ފިހާރައާއި، 6 ކެފޭ/ރެސްޓޯރަންޓުގެ އިތުރުން ސަރުކާރާއި އަމިއްލަ އެކި 5 އިމާރާތަކާއި 4 ސްކޫލް ހިމެނެއެވެ. 

މީގެއިތުރުން 2 ކްލިނިކާއި، 2 ގުދަން، 1 އޮފީސް އިމާރާތް އަދި ކޮންސްޓްރަކްޝަން ސައިޓަކުން ވެސް ވަނީ ވެލިބަސްތާ ޖެހުމަށް އެދިފައެވެ. މި ހާދިސާގައި އެއް ގެއަކުން ނަޖިސް ލީކުވުމުގެ މައްސަލައެއް ވެސް ރިޕޯޓުކޮށްފައިވާ ކަމަށް އެ އޮތޯރިޓީން ބުނެއެވެ.

އެންޑީއެމްއޭއިން ބުނީ، ވެލިބަސްތާ ޖަހައިދިނުމަށް އެދުނު ތަންތަނުގެ ތެރެއިން ބާކީ ހުރި ތަންތަނަށް އެހީތެރިކަން ފޯރުކޮށްދިނުމުގެ މަސައްކަތް، ކަމާގުޅުންހުރި އެކި މުއައްސަސާތަކާ ގުޅިގެން މިހާރު ވެސް ކުރަމުންދާ ކަމަށެވެ.

ވިއްސާރައިގެ އަދާހަމަ: މިރޭގެ 23:00 އާ ހަމައަށް • ނަޖިސް ލީކުވުމުގެ މައްސަލަ: 1 ގެއަކުން ވަނީ މިފަދަ މައްސަލައެއް ރިޕޯޓުކޮށްފަ. • ފެންބޮޑުވިޔަ ނުދިނުމަށް ވެލިބަސްތާ ޖެހުމަށް އެދިފައިވާ ތަންތަނުގެ ތަފްސީލް 33 ގެ 35 ފިހާރަ 6 ކެފޭ / ރެސްޓޯރަންޓް 5 ސަރުކާރާއި އަމިއްލަ އެކި އިމާރާތް 4 ސްކޫލް 2 ކްލިނިކް 2 ގުދަން 1 އޮފީސް އިމާރާތް 1 ކޮންސްޓްރަކްޝަން ސައިޓް. ވެލިބަސްތާ ޖަހައިދިނުމަށް އެދި ހުށަހެޅި ފަރާތްތަކުގެ ތެރެއިން، މިހާތަނަށް 31 ތަނަކަށް ވަނީ އެހީތެރިކަން ފޯރުކޮށްދެވިފަ. އަދި ބާކީ ހުރި ތަންތަނަށް އެހީތެރިކަން ފޯރުކޮށްދިނުމުގެ މަސައްކަތް، ކަމާގުޅުންހުރި އެކި މުއައްސަސާތަކާ ގުޅިގެން މި އޮތޯރިޓީން ދަނީ ކުރަމުން.

— NDMA Maldives (@NDMAmv) October 21, 2026

މާލެއަށް ބޯކޮށް ވާރޭވެހި ފެންބޮޑުވުމާ ގުޅިގެން، މަގުތަކުގައި ހެދިފައިވާ ފެން ހިންދުމަށް ޓަކައި މާލޭގެ 10 ސަރަހައްދެއްގައި ޕަންޕު ބަހައްޓައިގެން ވަނީ ހަރަކާތްތެރިވެފައެވެ. މި މަސައްކަތުގައި އެމްއެންޑީއެފް ފަޔަރ އެންޑް ރެސްކިއު ސާރވިސް، ދިވެހި ފުލުހުންގެ ޚިދުމަތް، ދިވެހި ރެޑް ކްރެސެންޓް، މާލެ ސިޓީ ކައުންސިލް، އެމްޓީސީސީ އަދި އެޗްޑީސީ ގުޅިގެން ހަރަކާތްތެރިވެފައިވާ ކަމަށް ވެސް އެންޑީއެމްއޭއިން މައުލޫމާތު ދެއެވެ.