ރިޕޯޓް
ސަރުކާރަށް 3 އަހަރު: ވެލާނާ އެއާޕޯޓުގެ އައު ޓާމިނަލާއެކު ރާއްޖޭގެ ވައިގެ ދޮރާށި ޒަމާނީވުން
ފޮޓޯ: ފަރުދުން
ވެލާނާ އިންޓަނޭޝަނަލް އެއާޕޯޓް (ވީ.އައި.އޭ) ގެ އައު ޕެސެންޖަރ ޓާމިނަލް ހުޅުވުމަކީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ދަށުން ދިވެހިރާއްޖޭގެ ދަތުރުފަތުރުގެ އުމްރާނީ ތަރައްޤީގައި ހާސިލުކުރެވުނު މުހިންމު ލަނޑުދަނޑިއެކެވެ. މި މަޝްރޫޢުގެ މައިގަނޑު މަޤްޞަދަކީ ފަސިންޖަރުންނަށް ދެވޭ ޚިދުމަތްތައް ފުޅާކުރުމާއި، އެއާޕޯޓުގެ ޖާގަ އިތުރުކުރުމުގެ އިތުރުން، ބައިނަލްއަޤްވާމީ ފަތުރުވެރިކަމުގެ މަންޒިލެއްގެ ގޮތުގައި ރާއްޖެއަށް ލިބިފައިވާ މަޤާމު އިތުރަށް ހަރުދަނާކުރުމެވެ.
މި އައު ޓާމިނަލް ރައީސް މުޢިއްޒު ރަސްމީކޮށް ހުޅުއްވައިދެއްވީ ދިވެހިރާއްޖޭގެ 60 ވަނަ މިނިވަން ދުވަހުގެ މުނާސަބަތާ ދިމާކޮށް، 26 ޖުލައި 2025 ގައެވެ. އެތައް އަހަރެއްގެ މަސައްކަތަށްފަހު ނިންމުނު މި މަޝްރޫޢަކީ މި ސަރުކާރުގެ އުމްރާނީ ތަރައްޤީގެ އެންމެ މުހިންމު އެއް އަމާޒުގެ ގޮތުގައި ކަނޑައަޅާފައިވާ މަޝްރޫޢެކެވެ. ޓާމިނަލް ހުޅުވުމުގެ ރަސްމިއްޔާތުގައި ރައީސް މުޢިއްޒު ވަނީ ކުރީގެ ރައީސް ޢަބްދުﷲ ޔާމީން އަދި ރައީސް އިބްރާހީމް މުޙައްމަދު ޞާލިޙް ކޮށްދެއްވި މަސައްކަތްޕުޅުތައް ފާހަގަކުރައްވައި، މިއީ ފާއިތުވި ސަރުކާރުތަކުގެ ވެސް ހިއްސާ އެކުލެވިގެން ހާސިލުކުރެވުނު ކާމިޔާބީއެއްކަން ބަލައިގަންނަވާފައެވެ.
ފަސިންޖަރުންގެ ޖާގަ އިތުރުވުމާއި ޒަމާނީ ވަސީލަތްތައް
މި އައު ޓާމިނަލަކީ އަހަރަކު ގާތްގަނޑަކަށް ހަތް މިލިއަން ފަސިންޖަރުންނަށް ޚިދުމަތް ދެވޭގޮތަށް ފަރުމާކުރެވިފައިވާ ޓާމިނަލެކެވެ. މިއީ ކުރިއަރަމުން އަންނަ ބައިނަލްއަޤްވާމީ ވައިގެ ދަތުރުފަތުރާ އެއްވަރަށް އެއާޕޯޓުގެ ޖާގަ ބޮޑުތަނުން އިތުރުވެގެންދިޔަ ކަމެކެވެ.
މި ޓާމިނަލުގައި 47 ޗެކް-އިން ކައުންޓަރާއި، އަމިއްލައަށް ޗެކް-އިން ވެވޭ (ސެލްފް ސަރވިސް) 6 ކިއޮސްކާއި، ފުރާ މީހުންގެ އިމިގްރޭޝަނަށް ޚާއްޞަ 20 ކައުންޓަރާއި، 6 ބޯޑިންގ ގޭޓުގެ އިތުރުން 12 އެއިރޯބްރިޖް ހިމެނެއެވެ. މި ވަސީލަތްތަކުގެ ބޭނުމަކީ ފަސިންޖަރުންގެ ދަތުރުފަތުރުގެ ކަންކަން ފަސޭހަކޮށްދިނުމާއި، ތޮއްޖެހުން ކުޑަކުރުމުގެ އިތުރުން، ދަތުރުވެރިންނަށް ލުއިފަސޭހަ ތަޖުރިބާއެއް ފޯރުކޮށްދިނުމެވެ.
މި ޓާމިނަލުން ޚިދުމަތް ދޭން ފަށާފައިވަނީ 27 ޖުލައި 2025 ގައެވެ. މިގޮތުން އެންމެ ފުރަތަމަ މި ޓާމިނަލަށް ޖެއްސީ ޤައުމީ އެއާލައިން ކަމަށްވާ މޯލްޑިވިއަން އިން ކޮޗިން އިން ރާއްޖެއަށް އައި ފްލައިޓެކެވެ. އޭގެ ފަހުން ބައިނަލްއަޤްވާމީ އެހެން އެއާލައިންތަކުގެ އޮޕަރޭޝަންތައް އައު ޓާމިނަލަށް ބަދަލުކުރެވުނީ އެކި ފިޔަވަހިތަކަކަށް ބަހާލައިގެންނެވެ.
އެއާޕޯޓުގެ ޚިދުމަތްތައް އިތުރަށް ފުރިހަމަކުރުމުގެ ގޮތުން ފެބުރުވަރީ 2026 ގައި ވަނީ އެތެރޭގެ އުދުހުންތައް ވެލާނާ އިންޓަނޭޝަނަލް އެއާޕޯޓުގެ އަޕްގްރޭޑް ކުރެވިފައިވާ ޓާމިނަލް 2 އަށް ބަދަލުކޮށްފައެވެ. މި އައު ޓާމިނަލަކީ ރަށްރަށަށް ދަތުރުކުރާ ފަސިންޖަރުންނަށް ކުރިން ދިމާވި ޖާގައިގެ ދަތިކަމަށް ހައްލެއް ގެނެސްދީ، ތަނަވަސް އަދި ޒަމާނީ މާޙައުލެއް ފޯރުކޮށްދޭ ތަނެކެވެ.
މި އައު ޓާމިނަލް ހުޅުވިގެން ދިޔުމަކީ ދިވެހިރާއްޖޭގެ ވައިގެ ދަތުރުފަތުރުގެ އުމްރާނީ ތަރައްޤީގައި ހޯދުނު ވަރަށް މުހިންމު ކާމިޔާބީއެކެވެ. ފަސިންޖަރުންގެ ޖާގަ އިތުރުކުރެވި، ބައިނަލްއަޤްވާމީ އަދި އެތެރޭގެ އުދުހުންތަކުގެ ދަތުރުވެރިންނަށް ވަސީލަތްތައް ފަހިވެގެން ދިޔުމާއެކު، މި މަޝްރޫޢުގެ ސަބަބުން ފަތުރުވެރިކަން ކުރިއެރުމަށާއި، ދަތުރުފަތުރުގެ ގުޅުންތައް ބަދަހިވުމަށާއި، އަދި ރާއްޖޭގެ ދިގު މުއްދަތުގެ އިޤްތިޞާދީ ތަރައްޤީއަށް ބޮޑެތި ފައިދާތަކެއް ކުރާނެ ކަމަށް ބެލެވެއެވެ.
ހުދުފޮށާ
21/11/2026 20:06
ތީ ހަމަ ކާޅު ހާލިހެދީމާ ކޮވެލި ބިސް އެޅުން ނޫންތޯ.!!؟