ސައިންސް / ދުނިޔެ

ރަމްފޯޑުގައި މުށިކުލައިގެ ސްނޯ ވެހުމުން ރައްޔިތުންގެ ކަންބޮޑުވެއްޖެ

ރަމްފޯޑުގައި މުށިކުލައިގެ ސްނޯ ވެހުމުން ރައްޔިތުންގެ ކަންބޮޑުވެއްޖެ

މެއިންގެ ރަމްފޯޑު ސިޓީއަށް މުށިކުލައިގެ ސްނޯ ވެހިފަ ފޮޓޯ: އިންޓަނެޓް

އާމިނަތު ޔުމްނާ

އާމިނަތު ޔުމްނާ

17 ޑިސެމްބަރު 2024، 11:18

17 ޑިސެމްބަރު 2024، 11:18

މެއިންގެ ރަމްފޯޑު ސިޓީގައި އާދަޔާ ޚިލާފު މޫސުމީ ހާދިސާއެއް ހިނގައިފިއެވެ. އަންގާރަ ދުވަހު އެ ސިޓީގައި ވެހުނު ސްނޯ ހުރީ މުށި ކުލައިގައެވެ. މިކަން ސިޓީގެ އޮފިޝަލުން ފޭސްބުކުގައި ކަށަވަރުކޮށްދީފައިވެއެވެ.

ޔޫއެސް އެނަރޖީ އިންފޮމޭޝަން އެޑްމިނިސްޓްރޭޝަނުން ބުނާ ގޮތުގައި މި ކުލަ ބަދަލުވުމުގެ ސަބަބަކީ އެ ސަރަހައްދުގައި ހުރި ކަރުދާސް އުފައްދާ ފެކްޓްރީއަކުން ކަރުދާސް އުފެއްދުމުގެ ތެރޭގައި ބޭނުންކުރާ "ބްލެކް ލިކަރ" ކިޔާ މާއްދާއެއް ބޭރުވުމެވެ.

ފުރަތަމަ ޓެސްޓުތަކުން ދައްކާފައިވަނީ ގަނޑުފެނުގެ ޕީއެޗް ލެވެލް 10 ގައި ހުރި ކަމަށެވެ. މިއީ އާންމު ގޮތެއްގައި ހަމުގެ މައްސަލަތައް އުފެދުމަށް މަގުފަހިވާ މިންވަރެކެވެ. އެހެންކަމުން، ރައްޔިތުންނަށް މި ސްނާގައި ނުބީހުމަށް އިރުޝާދު ދެވުނެވެ. ނަމަވެސް، މެއިން ޑިޕާޓްމަންޓް އޮފް އެންވަޔަރަންމަންޓަލް ޕްރޮޓެކްޝަނުން  އިތުރަށް ކުރި ޓެސްޓުތަކުން ދައްކާފައިވަނީ ޕީއެޗް ލެވެލް 8 އަށްވުރެ ދަށްކަމަށެވެ. މިކަން ފޮކްސް 5 އިން ވަނީ ރިޕޯޓުކޮށްފައެވެ.

މުށި ސްނޯ  ވެހިފައިވާ ސްޕޯޓްސް ދަނޑެއްގެ ފޮޓޯތަކެއް ވަނީ ޝާއިޢުކޮށްފައެވެ. އަދި އާންމު ސަލާމަތާއި ރައްކާތެރިކަމަށްޓަކައި އިރުޝާދުތަކެއް ވަނީ ދީފައެވެ. މި މާއްދާއަކީ ވިހަ އެކުލެވޭ އެއްޗެއް ނޫން ކަމުގައިވީ ނަމަވެސް، ރައްޔިތުންނަށް ވަނީ މި ސްނޯ ސީދާ ހަމުގައި ނުޖެއްސުމަށާއި، ކުޑަކުދިންނާއި ޖަނަވާރުތައް މި ސްނޯގައި ކުޅުމުން ދުރުހެލިކުރުމަށް އިރުޝާދު ދީފައެވެ.

"މިވަގުތު އާންމު ސަލާމަތަށް ބޮޑު ނުރައްކަލެއް ނެތްކަމުގެ ޔަޤީންކަން އަޅުގަނޑުމެންނަށް އެބައޮތް. ނަމަވެސް، އިތުރު ރައްކާތެރިކަމަށްޓަކައި، މި މުށި ސްނޯ  ކެއުމުންނާއި ހަމުގައި ސީދާ ޖެއްސުމުން ދުރުހެލިވުމަށް އެދެން،" އޮފިޝަލުން ފޭސްބުކުގައި ޕޯސްޓުކޮށްފައިވެއެވެ.

ކަރުދާސް އުފައްދާ ފެކްޓްރީން ވަނީ އިތުރު ޓެސްޓުތައް ކުރުމުގެ ޚަރަދު ދޭން އެއްބަސްވެފައެވެ. އަދި ސްކޫލުތަކުގެ ކުދިން މި ސަރަހައްދުތަކާ ދުރުހެލިކުރުމަށްޓަކައި ސްކޫލު ޑިސްޓްރިކްޓަށް އެންގުމަށް ސިޓީގެ އޮފިޝަލުން ވަނީ ނިންމާފައެވެ.


                    

މި ލިޔުން ކިޔާލުމުން

Ads by MSS