ބީއެމްއެލްގެ ސީއީއޯ އިސްތިއުފާދެއްވައިފި

ބީއެމްއެލްގެ ޗީފް އެގްޒެކެޓިވް އޮފިސަރ ކާރލް ސްޓުމްކަ އިސްތިއުފާދެއްވައިފިއެވެ.

 ބީއެމްއެލްއިން ނެރުނު ބަޔާނުގައި ވަނީ ކާރލް ސްޓުމްކަ އެ މަގާމުން އިސްތިއުފާ ދެއްވީ އިއްޔެ ކަމަށެވެ. ނަމަވެސް މި މަހު 21 ގައި ބާއްވާ ބޭންކުގެ ޚާއްޞަ އާންމު ޖަލްސާ އާއި ހަމައަށް މަޤާމުގައި އޭނާ  ހުންނަވާނެ ކަމަށް ބޭންކުން ވަނީ ބުނެފައެވެ.  ބީއެމްއެލްގެ ސީއީއޯގެ މަގާމާ ކާލް ސްޓުމްކަ ހަވާލުވެވަޑައިގަތީ 2022 ވަނަ އަހަރުގެ އޮކްޓޯބަރު ގައެވެ.

ބީއެމްއެލްއިން ބުނީ، އާ ސީއީއޯއެއް ހޯދުމުގެ މަސައްކަތް ކުރިއަށްދާ ވަގުތުގައި، އެ ބޭންކުގެ ސީއީއޯގެ މަޤާމުގައި ހުންނަވާނީ ޑެޕިއުޓީ ސީއީއޯ އާއިޝަތު ނޫރައްދީން ކަމަށެވެ. އަދި އާ ސީއީއޯއެއް އައްޔަނުކުރުމުގެ މަސައްކަތް ބޭންކުގެ ޑިރެކްޓަރުންގެ ބޯޑުން ކުރިއަށް ގެންދާނެ ކަމަށްވެސް ބުނެފައިވެއެވެ.

ކާރލް ސްޓުމްކަ މަގާމުން އިސްތިއުފާ ދެއްވާފައި މިވަނީ ސަރުކާރުން ދީފައިވާ މަޝްވަރާ އާ ދެކޮޅަށް އެ ބޭންކުން ރުފިޔާ ކާޑުތަކަށް ދެމުން އައި ޑޮލަރު ލިމިޓު އެއްކޮށް އުވައިލައި، އިދިކޮޅު ފަރާތްތަކުން ބީއެމްއެލްއާ ގުޅިގެން މާލީ ބަޣާވާތެއް ކުރަން އުޅުނު ކަމަށް ބުނެ ފުލުހުން މައްސަލައެއް ތަހުގީގުކުރަން ފަށާފައި ވަނިކޮށެވެ.