އިންޑިއާ ކަނޑަށް ބެހެމުންދިޔަ ރޮހިންގޔާގެ 100 ރެފިޔުޖީން ސްރީލަންކާގެ ނޭވީން ސަލާމަތްކޮށްފި

އިންޑިއާ ކަނޑަށް ބެހެމުންދިޔަ ރޮހިންގޔާގެ 100 ރެފިޔުޖީން ސްރީލަންކާގެ ނޭވީން ސަލާމަތްކޮށްފިއެވެ. 

އެމީހުން ސަލާމަތްކޮށްފައިވަނީ މަސްވެރިކަން ކުރާ އުޅަދެއްގައި ދަތުރުކޮށް ބެހެމުންދަނިކޮށް ކަމަށް އަލްޖަޒީރަގައި ބުނެފައިވެއެވެ. އެއުޅަނދުގައި އެމީހުން ބެހެމުންދަނިކޮށް ސަލާމަތްކޮށް ރައްކާތެރި ހިސާބަކަށް މިހާރު ގެންދެވިފައިވާ ކަމަށްވެސް ވަނީ ބުނެފައެވެ.

ސަލާމަތް ކުރެވުނު މީހުންގެ ތެރޭގައި 25 ކުޑަކުދިން ހިމެނެއެވެ. އެމީހުން ސަލާމަތްކޮށްގެން ގެންގޮސްފައިވަނީ ސްރީލަންކާގެ އިރުމަތީ ބަނދަރު ޓްރިންކޮމާލީއަށެވެ.

ސްރީލަންކާގެ ނޭވީގެ ސްޕޯކްސްމޭން އަށް ހަވާލާދީ އަލްޖަޒީރާގައި ބުނެފައިވަނީ އެމީހުން ސްރީލަންކާއަށް ފޭބުމުގެ ހުއްދަ ދިނުމުގެ ކުރިން މެޑިކަލް ޗެކްތައް ހަދަން ޖެހޭ ކަމަށެވެ. 

މުސްލިމުންގެ އަޣުލަބިއްޔަތު އޮންނަ ރޮހިންގޔާ ނަސްލުގެ މީހުންނަށް މިޔަންމާގައި ބޮޑެތި އަނިޔާތަކެއް ލިބިފައިވާއިރު، ކޮންމެ އަހަރަކު އެތައް ހާސް ބަޔަކު ކަނޑުގެ ދިގު ދަތުރުތަކުގައި ފުރާނަ ނުރައްކަލުގެ ތެރެއަށް ވައްޓާލައެވެ. މީގެ ތެރެއިން ގިނަ ބަޔަކު ދަތުރުކުރަނީ އިރުދެކުނު މެލޭޝިއާ ނުވަތަ އިންޑޮނޭޝިއާއަށެވެ.

 ސްރީލަންކާގެ ނޭވީން ސަލާމަތްކުރި މި މަސްވެރިކަން ކުރާ ދޯނި ފެނިފައި ވަނީ ބުރާސްފަތި ދުވަހުގެ ފަތިހު މުލިވައިކަލް އިން ސްރީލަންކާގެ އުތުރުގެ އައްސޭރިފަށުންނެވެ. ނޭވީގެ ތަރުޖަމާނު ހުކުރު ދުވަހު ބުނީ މުޢާމަލާތުކުރުމުގެ ދަތިތަކުގެ ސަބަބުން ރެފިއުޖީން މިސްރާބު ޖެހީ ކޮން ދިމާލަކަށްކަން ދެނެގަންނަން ދަތިވެފައިވާ ކަމަށާއި ލަފާކުރެވެނީ މޫސުން ގޯސްވުމުގެ ސަބަބުން އެމީހުންނަށް މަގުއޮޅި ބެހުނީކަމަށް ސްޕޯކްސްމޭން ބުނެފައިވެއެވެ.

އޮކްޓޯބަރު މަހު މިޔަންމާއިން ދަތުރުފެށި ރޮހިންގޔާ ރެފިޔުޖީންގެ ދޯންޏެއް އިންޑޮނޭޝިއާގެ އަޗޭ ޕްރޮވިންސަށް ކައިރިކުރުމުގެ ތެރޭގައި 7 މީހަކު ވަނީ މަރުވެފައެވެ. އެދޯނީގައި ވެސް 100 މީހަކު ވަނީ ދަތުރުކޮށްފައެވެ.

ސްރީލަންކާގެ ނޭވީން ވަނީ 2022 ވަނަ އަހަރުގެ ޑިސެންބަރު މަހު އެޤައުމޔގެ އައްސޭރިން ހާލުގައި ޖެހިފައިވާ ރޮހިންޔާ ރެފިއުޖީންގެ ތެރެއިން 100 އަށް ވުރެ ގިނަ މީހުން ސަލާމަތްކޮށްފަ އެވެ.