ދުނިޔެ
ޕާކިސްޠާނުން އަފްޣާނިސްޠާނުގެ އިރުމައްޗަށް ދިން ހަމަލާއެއްގައި 46 މީހުން މަރުވެއްޖެ
ޕާކިސްތާނާއި އަފްޣާނިސްތާނާއި ގުޅޭ ސަރަހައްދު
ޕާކިސްޠަނުން އަފްޣާނިސްޠާނުގެ އިރުމައްޗަށް ދިން ހަމަލާއެއްގައި 46 މީހުން މަރުވެފައިވާކަމަށް އަފްޣާނިސްޠާނުގެ ސަރުކާރުން ބުނެފިއެވެ.
އަފްޣާނިސްޠާނުގެ ސަރުކާރުން ބުނެފައިވަނީ ޕާކިސްޠާނުގެ މިހަމަލާގައި މަރުވިމީހުންގެ ތެރޭގައި ގިނައީ ކުޑަކުދިންނާއި އަންހެނުންކަމަށެވެ.
އަފްޣާން ސަރުކާރުގެ ޑެޕިއުޓީ ސްޕޯކްސްމަން ޙަމްދުﷲ ފިތުރާތު ވިދާޅުވީ ޕަކްޓިކާ ޕްރޮވިންސްގެ ޑިސްޓްރިކްޓެއް ކަމަށްވާ ބާމަލްގެ ހަތަރު ތަނަކަށް އަމާޒުކޮށްގެން ދިން ހަމަލާތަކުގައި މަރުވި މީހުންނަކީ ރެފިއުޖީން ކަމަށެވެ. އަދި މިހަމަލާތަކުގައި އިތުރު ހަ މީހަކު ވެސް ޒަޚަމްވެފައިވާ ކަމަށްވެސް ޙަމްދުﷲ ވަނީ ވިދާޅުވެފައެވެ.
މީގެ ކުރިން ބުދަ ދުވަހު ޕާކިސްތާނުގެ ތާލިބާނުން ނުވަތަ ތަހްރީކް-އޭ-ތާލިބާން ޕާކިސްތާނުގެ ތަރުޖަމާނު މުޙައްމަދު ޚުރާސާނީ ނެރުނު ބަޔާނެއްގައި ބުނެފައި ވަނީ ހަމަލާތަކުގައި 27 އަންހެނުންނާއި ކުޑަކުދިން ހިމެނޭ ގޮތަށް 50 މީހުން މަރުވެފައިވާ ކަމަށެވެ. އޭނާ ވިދާޅުވީ މަރުވެފައިވަނީ ހުޅަނގު އުތުރުގައި ސަބަބުން އަފްޣާނިސްތާނަށް ފިލައިގެން ދިޔަ "ހަތިޔާރު ނެތް ރެފިއުޖީން" ކަމަށެވެ.
މި ހަމަލާތައް ދީފައިވަނީ އަފްޣާނިސްތާނަށް ޕާކިސްތާނުގެ ޚާއްސަ މަންދޫބު މުހައްމަދު ސާދިގު ކާބުލްއަށް ވަޑައިގެން ދެޤައުމުގެ ދެމެގައި ހުރި ގިނަ މައްސަލަތަކެއްގައި މަޝްވަރާ ކުރެއްވިތާ ގަޑިއެއްހާއިރު ފަހުންނެވެ. ކާބުލްގައި ހުންނަ އަފްޣާނިސްތާނުގެ ފޮރިން މިނިސްޓްރީން ވަނީ ޕާކިސްތާނުގެ އަސްކަރިއްޔާގެ ހަމަލާތަކާ ގުޅިގެން ޕާކިސްތާނުގެ މަންދޫބު ހާޒިރުކޮށް ވަރުގަދަ މަޝްވަރާތަކެއް ކޮށްފައިކަަމަށް ޕްރެސް ރިޕޯޓުތަކުން ބުނެއެވެ.
އެމިނިސްޓްރީގެ ބަޔާނެއްގައި ބުނެފައި ވަނީ ޕާކިސްތާނުގެ މަދަނީ ސަރުކާރުގެ މަންދޫބަކު އަފްޣާނިސްތާނުގެ އޮފިޝަލުންނާ އެކު މަޝްވަރާތަކުގައި އަވަދިނެތި އުޅެނިކޮށް، ޕާކިސްތާނުގެ އިދިކޮޅު ބާރުތަކުން ހަމަލާތައް ދީފައި ވަނީ ދެޤައުމުގެ ގުޅުމަށް އިތުބާރު ނެތްކަން ދެއްކުމަށް ކަމަށެވެ.
