ހަނގުރާމައިގެ ސަރަޙައްދުތަކުގައި ދިރިއުޅޭ ކުޑަކުދިންގެ އަދަދު އިންތިހާއަށް އިތުރުވެއްޖެ:ޔުނިސެފް

ޔުނިސެފްއިން ހާމަކޮށްފައިވާ ގޮތުގައި މިހާރު ދުނިޔޭގެ ހަނގުރާމައިގެ ސަރަޙައްދުތަކުގައި ދިރިއުޅެމުންދަނީ 473 މިލިއަނަށްވުރެ ގިނަ ކުޑަކުދިން ކަމަށް ލަފާކުރެވެއެވެ. މިއީ ދުނިޔޭގެ ކޮންމެ 6 ކުއްޖަކުން 1 ކުއްޖެކެވެ. މި މަޢުލޫމާތު ޔުނިސެފްއިން ހާމަކޮށްފައިވަނީ ހޮނިހިރު ޣައްޒާ، ސޫދާން އަދި ޔުކްރެއިން ފަދަ ތަންތަނުގައި ހަނގުރާމަ ހިނގަމުންދާ ދަނޑިވަޅެއްގައެވެ.

 ޚާއްޞަކޮށް ޣައްޒާގައި އިޒްރޭލުން ފަށާފައިވާ ނުރައްކާތެރި ހަނގުރާމައިގެ ސަބަބުން 15 މަސްދުވަހުގެ ތެރޭގައި މަދުވެގެން 17،492 ކުޑަކުދިން ވަނީ މަރުވެފައެވެ. އަދި ޣައްޒާގެ ގިނަ ސަރަޙައްދުތަކެއް ވަނީ ވީރާނާވެފައެވެ.

ޔުނިސެފްގެ އެގްޒެކެޓިވް ޑިރެކްޓަރ ކެތަރިން ރަސެލް ވިދާޅުވެފައިވަނީ، "ކޮންމެ މިންގަނޑަކުން ބެލިކަމުގައި ވކަމުގައި ވިޔަސް، 2024 ވަނަ އަހަރަކީ ޔުނިސެފްގެ ތާރީޚުގައި ކޮންފްލިކްޓް ސަރަޙައްދުތަކުގައި ދިރިއުޅޭ ކުދިންނަށް އެންމެ ނުރައްކާތެރި އަހަރުތަކުގެ ތެރެއިން އަހަރެއް" ކަމަށެވެ.

ހަނގުރާމަކުރާ ސަރަޙައްދުތަކުގައި ދިރިއުޅޭ ކުޑަކުދިންގެ ނިސްބަތް 1990 ގެ އަހަރުތަކުގައި 10 އިންސައްތައިގައި ހުރިއިރު، މިހާރު އެ ނިސްބަތް ވަނީ 19 އިންސައްތައަށް އަރާފައެވެ. އަދި 2023 ވަނަ އަހަރުގެ ނިޔަލަށް 47.2 މިލިއަން ކުދިން ވަނީ ހަނގުރާމައާއި އަނިޔާވެރިކަމުގެ ސަބަބުން ގެދޮރު ދޫކޮށް ދާންޖެހިފައެވެ.

މީގެ އިތުރުން، 2023 ވަނަ އަހަރު 22،557 ކުދިންނަށް 32،990 ފަހަރު ބޮޑެތި އަނިޔާތައް ކުރިމަތިވެފައިވާކަން ޔޫއެންއިން ވަނީ ކަށަވަރުކޮށްފައެވެ. މިއީ ޔޫއެން ސެކިއުރިޓީ ކައުންސިލުން މި ކަންކަން މޮނިޓަރ ކުރަން ފެށި ފަހުން ރެކޯޑު ކުރެވުނު އެންމެ މަތީ އަދަދެވެ.

ޔުނިސެފްގެ ކޮމިއުނިކޭޝަން ސްޕެޝަލިސްޓް ރޮސާލިއާ ބޮލެން ވިދާޅުވެފައިވަނީ ޣައްޒާގައި ކުޑަކުދިން ދިރިއުޅެމުންދަނީ "ނުރައްކާތެރި ހުވަފެނެއްގައި" ކަމަށެވެ. "ޣައްޒާގެ ކުދިން ތިބީ ފިނިވެ، ބަލިވެ، އަދި ނަފްސާނީގޮތުން ހާސްވެފައެވެ. ޣައްޒާގެ 96 އިންސައްތަ އަންހެނުންނާއި ކުޑަކުދިންނަށް އަސާސީ ކާނާ ނުލިބެ،" ބޮލެން ވިދާޅުވިއެވެ.

ބޮލެން ގޮވާލައްވާފައިވަނީ ޣައްޒާއިން ޒަޚަމްވެފައިވާ ކުދިންނާއި އެ ކުދިންގެ މައިންބަފައިން އިރުމަތީ ޖެރޫސަލަމް ނުވަތަ އެހެން ތަނަކަށް ބޭސްފަރުވާއަށް ގެންދިއުމަށް ސިޔާސީ އަދި ޑިޕްލޮމެޓިކް ނުފޫޒު ބޭނުންކުރުމަށެވެ.

މި ހަނގުރާމައަކީ އަޅުގަނޑުމެން އެންމެންނަށްވެސް ހިތާމަވެރި ކަމަކަށް ވާންޖެހޭ، ޣައްޒާގެ ކުދިންނަށް އިތުރަށް ކެތްކުރެވޭނެ ވަގުތެއް ނެތް

ބޮލެން 

ޔުނިސެފްގެ ރިޕޯޓުގައި ފާހަގަކޮށްފައިވާ ގޮތުގައި، ކޮންފްލިކްޓް ހަނގުރާމަކުރާ ސަރަހައްދުގައި ދިރިއުޅޭ ކުދިންނަށް ތަޢުލީމު ނުލިބުމުގެ ފުރުސަތު ބޮޑެވެ. އަދި މި ކުދިން ކެއުމުގެ ދަތިކަން ކުރިމަތިވުމާއި، ގެދޮރު ދޫކޮށް ދާންޖެހުމުގެ ފުރުސަތު ބޮޑެވެ. މީގެ އިތުރުން، ކުޑަކުދިންނަށް ކުރާ ޖިންސީ އަނިޔާ އިތުރުވެ، ކުދިންގެ ނަފްސާނީ ދުޅަހެޔޮކަމަށް ބޮޑެތި އަސަރުތަކެއް ކުރަމުންދާކަން ވެސް ރިޕޯޓުގައި ފާހަގަކޮށްފައިވެއެވެ.

ދުނިޔެއިން މި ކުދިންނަށް އެހީތެރިކަން ފޯރުކޮށްދިނުމުގައި ފެއިލްވަމުންދަނީ. 2025 ވަނަ އަހަރަށް ބަލާއިރު، އަޅުގަނޑުމެން އެބަޖެހޭ މި ކުދިންގެ ފުރާނަ ސަލާމަތްކޮށް، އެ ކުދިންގެ ދިރިއުޅުން ރަނގަޅުކުރުމަށް އިތުރު މަސައްކަތްތަކެއް ކުރަން

ޔުނިސެފްގެ އެގްޒެކެޓިވް ޑިރެކްޓަރ ކެތަރިން ރަސެލް 

މި ރިޕޯޓުން ދައްކާގޮތުގައި 2024 ވަނަ އަހަރަކީ ހަނގުރާމައިގެ ސަރަޙައްދުތަކުގައި ދިރިއުޅޭ ކުދިންނަށް އެންމެ ނުރައްކާތެރި އަހަރުތަކުގެ ތެރެއިން އަހަރެކެވެ. އަދި ހައިޓީ، ލެބަނަން، މިޔަންމާ، ފަލަސްޠީނު އަދި ސޫދާން ފަދަ ޤައުމުތަކުގައި ހިނގަމުންދާ ހަނގުރާމަތަކުގެ ސަބަބުން 2025 ވަނަ އަހަރު މި ހާލަތު އިތުރަށް ގޯސްވާނެ ކަމަށް ބެލެވެއެވެ.

ޔުނިސެފްއިން މި ރިޕޯޓު ނެރެ، ދުނިޔޭގެ ސަމާލުކަމަށް މި މައްސަލަ ގެނެސްދީފައިވަނީ ހަނގުރާމައިގެ ސަރަޙައްދުތަކުގައި ދިރިއުޅޭ ކުދިންގެ ހާލަތު ރަނގަޅުކުރުމަށް އަވަސް ފިޔަވަޅުތަކެއް އެޅުމަށް ގޮވާލުމުގެ ގޮތުންނެވެ. އަދި މި ކުދިންނަށް އެހީތެރިކަން ފޯރުކޮށްދިނުމަށް ބައިނަލްއަޤްވާމީ މުޖުތަމަޢުގެ އެއްބާރުލުން ބޭނުންވާކަން ފާހަގަކޮށްފައިވެއެވެ.