ޚަބަރު
ފީނަން ގޮސް އުޅުނިކޮށް ގެއްލުނު ޗައިނާގެ ފަތުރުވެރިންތަކެއް ސަލާމަތްކޮށްފި
ވ. ފުލިދޫ، ފޮޓޯ: ފުލިދޫ ޑައިވް
ހުލާސާ
އެ ފަތުރުވެރިން ސަލާމަތްކުރިއިރު، އެންމެންގެ ހާލު ރަގަޅު.
ވ. ފުލިދޫ ކައިރިއަށް ފީނަން ގޮސް އުޅުނު ޗައިނާގެ ހަތް ފަތުރުވެރިއަކު ގެއްލިގެން ހޯދަމުން ދަނިކޮށް، އެ ސަރަހައްދުގައި ހަރަކާތްތެރިވި ލޯންޗަކުން އެމީހުން ސަލާމަތްކޮށްފިއެވެ.
ފުލުހުން ހާމަކޮށްފައިވާ ގޮތުން، އެމީހުން ފީނުމަށް ފޭބީ ފުލިދޫ ކައިރީގައި އޮންނަ ބޯމަސް ކަނޑު ޑައިވް ސައިޓަށެވެ. އަދި އެމީހުން ގެއްލުނުކަން ފުލުހުންނަށް ރިޕޯޓުކުރީ ބުރާސްފަތި ދުވަހުގެރޭގެ އިރާކޮޅުކަމަށް ވެސް ހާމަކޮށްފައިވެއެވެ.
އެ ހަތް ފަތުރުވެރިން ސަލާމަތްކުރީ، އެ މީހުން ގެއްލުމާ ގުޅިގެން ހޯދުމުގެ މަސައްކަތުގައި އެ ވަގުތު ހަރަކާތްތެރިވަމުން ދިޔަ ފުލިދޫގެ ލޯންޗަކުންނެވެ.
އެ ފަތުރުވެރިން ސަލާމަތްކުރިއިރު، އެންމެންގެ ހާލު ރަގަޅުކަމަށް ވެސް ފުލުހުން ވަނީ ބުނެފައެވެ.
ފީނަން ގޮސް އުޅުމުގެ ތެރޭގައި، މަދުމަދުން ނަމަވެސް ފަތުރުވެރިން ގެއްލި އެ މީހުން މަރުވުމުގެ ހާދިސާތައް ހިނގާފައިވެއެވެ. އެ ގޮތުން މިދިޔަ އަހަރު ވެސް މިފަދަ ހާދިސާތަކެއް ވަނީ ހިނގާފައެވެ. އަދި މިފަދަ ހާދިސާތަކުގައި މިދިޔަ އަހަރު ބައެއް މީހުން މަރުވެފައި ވެސް ވެއެވެ.
