ޖޭއެސްސީއަށް ހުށަހެޅޭ މައްސަލަތައް މަދުވެއްޖެ: މިދިޔަ އަހަރު 42 އިންސައްތަ ދަށަށް

ޖުޑީޝަލް ސަރވިސް ކޮމިޝަން (ޖޭއެސްސީ) އަށް މިދިޔަ އަހަރު ހުށަހެޅުނު މައްސަލަތަކުގެ އަދަދު 2023 ވަނަ އަހަރާ އަޅާބަލާއިރު 42 އިންސައްތަ ދަށްވެފައިވާކަމަށް އެ ކޮމިޝަނުގެ ތަފާސްހިސާބުތަކުން ދައްކައިފިއެވެ.

ޖޭއެސްސީގެ ތަފާސްހިސާބުތަކުން ދައްކާގޮތުގައި 2023 ވަނަ އަހަރު 314 މައްސަލަ ހުށަހެޅުނު އިރު، 2024 ވަނަ އަހަރު ހުށަހެޅިފައިވަނީ 179 މައްސަލައެވެ. މިއީ 42.99 އިންސައްތައިގެ ދަށްވުމެކެވެ.

ޖޭއެސްސީއަކީ ފަނޑިޔާރުންގެ ޤާބިލުކަމާއި މަސައްކަތުގެ ފެންވަރު ވަޒަންކުރުމާއި، ފަނޑިޔާރުންނާ ބެހޭގޮތުން އުފުލޭ ޝަކުވާތައް ބެލުމުގެ ޒިންމާ ޤާނޫނުން ހަވާލުކޮށްފައިވާ ކޮމިޝަނެވެ.

މިދިޔަ އަހަރު ހުށަހެޅުނު މައްސަލަތަކުގެ ތެރެއިން 21 މައްސަލައެއް މިހާރު އޮތީ ކޮމިޓީގައެވެ. އަދި 31 މައްސަލައެއް ބެލުމަށް ފޮނުވާފައިވާ ކަމަށް ތަފާސްހިސާބުތަކުން ދައްކައެވެ. މީގެ އިތުރުން، 149 މައްސަލައަކީ ފަނޑިޔާރުންގެ ސުލޫކާ ގުޅުންހުރި މައްސަލަތަކެއް ނޫން ކަމަށް ވަނީ ނިންމާފައެވެ.

ޖޭއެސްސީން މިދިޔަ އަހަރު 43 މައްސަލަ ބަލާފައިވެއެވެ. މީގެ ތެރޭގައި އަލަށް ހުށަހެޅުނު 28 މައްސަލައާއި، ކުރީ އަހަރުތަކުން ބާކީވި 15 މައްސަލަ ހިމެނެއެވެ.

މީގެ އިތުރުން، ޖޭއެސްސީން މިދިޔަ އަހަރު 183 ފަނޑިޔާރުން އައްޔަންކޮށްފައިވެއެވެ. މީގެ ތެރޭގައި 153 ފިރިހެން ފަނޑިޔާރުންނާއި 30 އަންހެން ފަނޑިޔާރުން ހިމެނެއެވެ. މިއީ 2023 ވަނަ އަހަރާ އަޅާބަލާއިރު އަންހެން ފަނޑިޔާރުންގެ އަދަދު 7 އިންސައްތަ އިތުރުވެފައިވާ އަދަދެކެވެ.