ނޯވޭ: އިލެކްޓްރިކް ކާރު ބޭނުންކުރުމުގައި ދުނިޔޭގެ އެންމެ ކުރީ ސަފުގައި

ނޯވޭގެ ވެރިރަށް އޮސްލޯގައި ހުރި ކާރު ވިއްކާ ކުންފުންޏެއް ކަމަށްވާ ހަރާލްޑް އޭ. މޯލަރ އިން 75 އަހަރަށްވުރެ ގިނަ ދުވަހު ވޯކްސްވެގަން ކާރު އެތެރެކުރަމުން އައި ނަމަވެސް، 2024 ގެ ކުރީކޮޅު އެ ކުންފުނިން ވަނީ ތެޔޮ އަޅާ ކާރުތައް އެެތެރެކޮށް ވިއްކުން ހުއްޓާލާފައެެވެ. މިހާރު އެ ކުންފުނީގެ ޝޯރޫމްގައި ވިއްކަން ހުންނަނީ ހަމައެކަނި އިލެކްޓްރިކް ކާރުތަކެވެ.

ނޯވޭއަކީ އިލެކްޓްރިކް ކާރު ބޭނުންކުރުމުގައި ދުނިޔޭގެ އެންމެ ކުރީ ސަފުގައިވާ ޤައުމެވެ. 2024 ވަނަ އަހަރު ވިއްކުނު ކޮންމެ 10 ކާރަކުން 9 ކާރަކީ އިލެކްޓްރިކް ކާރެވެ. މިއީ 88.9 އިންސައްތައެވެ. މިއީ 2023 ވަނަ އަހަރާ އަޅާބަލާއިރު 6.5 އިންސައްތައިގެ ކުރިއެރުމެކެވެ.

5.5 މިލިއަން މީހުން ދިރިއުޅޭ މި ޤައުމުގައި އިލެކްޓްރިކް ކާރުތަކުގެ އަދަދު ވަނީ ތެޔޮ އަޅާ ކާރުތަކުގެ އަދަދަށްވުރެ އިތުރުވެފައެވެ. އަދި ޑީސަލް ކާރުތައް ވެސް ހިމަނައިފިނަމަ، މަގުމަތީގައި ދުއްވާ ކޮންމެ ތިން ކާރަކުން އެއް ކާރަކީ އިލެކްޓްރިކް ކާރެވެ.

ނޯވޭގެ މި ކުރިއެރުމާ އަޅާބަލާއިރު، އިނގިރޭސިވިލާތުގައި 2024 ވަނަ އަހަރު ވިއްކުނު އައު ކާރުތަކުގެ ތެރެއިން އިލެކްޓްރިކް ކާރުތަކުގެ ނިސްބަތަކީ 20 އިންސައްތައެވެ. އަދި އެމެރިކާގައި މި ނިސްބަތަކީ އެންމެ 8 އިންސައްތައެވެ.

ނޯވޭގެ މި ކާމިޔާބީއިން އެހެން ޤައުމުތަކަށް ފިލާވަޅު ލިބިދާނެ ކަމަށް ބެލެވެއެވެ. ޚާއްޞަކޮށް ތިމާވެށްޓާ ރައްޓެހި ދަތުރުފަތުރުގެ ވަސީލަތްތަކަށް ބަދަލުވުމަށް މަސައްކަތްކުރާ ޤައުމުތަކަށް ނޯވޭގެ ތަޖުރިބާއިން ގިނަ ކަންކަން ދަސްކުރެވިދާނެއެވެ.