އޭސީސީއިން ބަލަމުންދާ މައްސަލައަކާ ގުޅިގެން ސްޓެލްކޯގެ ކުރީގެ އެމްޑީގެ ޕާސްޕޯޓު ހިފަހައްޓައިފި

އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ މައްސަލައަކާއި ގުޅިގެން ސްޓެލްކޯގެ ކުރީގެ މެނޭޖިންގް ޑިރެކްޓަރ، އަހުމަދު ޝަރީފްގެ ޕާސްޕޯޓު ހިފަހައްޓައިފިއެވެ. 

ޝަރީފް ފުރުން މަނާކުރުމަށް އެސީސީން ނިންމީ ސީދާ ކޮންމައްސަލައެއްގައިކަން އެނގިފައި ނެތަސް، އޭނާއާ ގުޅޭ މައްސަލައެއް ބަލަމުންދާކަމަށް އެ ކޮމިޝަނުން ވަނީ ބައެއް މީޑިއާތަކަށް ޔަގީންކޮށްދީފައެވެ. 

މަޢުލޫމާތު ލިބިފައިވާ ގޮތުގައި ޝާރީފްގެ ޕާސްޕޯޓު ހިފަހައްޓާފައިވަނީ ކޯޓު އަމުރެއްގެ ދަށުން، އަންގާރަ ދުވަހެވެ.

ސްޓެލްކޯގެ މެނޭޖިންގް ޑިރެކްޓަރުގެ މަޤާމަށް ޝަރީފް އައްޔަންކޮށްފައިވަނީ 2022 ވަނަ އަހަރުގެ މާރޗު މަހުގައެވެ. އޭނާ ވަނީ ކުރިން ފެނަކައިގެ މެނޭޖިންގް ޑިރެކްޓަރުގެ މަޤާމާއި އިލެކްޝަންސް ކޮމިޝަންގެ ރައީސްކަމުގެ މަޤާމު ވެސް އަދާކޮށްފައެވެ.