ހުޅުމާލޭގައި ޤަވާއިދާ ޚިލާފަށް ދިގު މުއްދަތަކަށް ބަހައްޓާފައިވާ އުޅަނދުފަހަރު ޓޯ ކުރަނީ

ހުޅުމާލޭގައި ގަވާއިދާ ޚިލާފަށް ދިގު މުއްދަތަކަށް ބަހައްޓާފައިވާ އުޅަނދުފަހަރު ޓޯކުރުމާއި، އެހެން ސަރަޙައްދަކަށް ބަދަލުކުރުމުގެ މަސައްކަތް މާދަމާ ކުރިއަށް ގެންދިއުމަށް ނިންމާފައިވާކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ހުޅުމާލެއަކީ ހިތްފަސޭހަ އަދި ރައްކާތެރި ތަނަކަށް ހެދުމަށް ސަރުކާރާއި، ސަރުކާރާއި ގުޅުންހުރި އިދާރާތަކުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މާދަމާ ފެށެމަށް ހަމަޖެހިފައިވާ މަސައްކަތަކީވެސް ދިވެހި ފުލުހުންގެ ޚިދުމަތާއި، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ދަތުރު ފަތުރާއި މަދަނީ އުދުހުންތަކާއި ބެހޭ ވުޒާރާ ގުޅިގެން ކުރިއަށް ގެންދިއުމަށް ހަމަޖެހިފައިވާ މަސައްކަތެކެވެ. މި މަސައްކަތް ފެށުމަށް ހަމަޖެހިފައިވަނީ މާދަމާގެ ހެނދުނު 8:00ގައި ކަމަށް ފުލުހުން ޚިދުމަތުން ވިދާޅުވެއެވެ.

ފަހަކަށް އައިސް އާދަޔާ ޚިލާފަށް އެކްސިޑެންޓުތައް ގިނަވުމާ އެކު، މަގުތަކަކީ ރައްކާތެރި ތަނަކަށް ހެދުމުގެ ގޮތުން ސަރުކާރުން ވަނީ ގިނަ މަސައްކަތްތަކެއް ފަށާފައެވެ. އެގޮތުން މަގުމަތީގެ ރައްކާތެރިކަން ކަށަވަރު ކުރުމަށް ފުހުން މަގުތަކަށް ނުކުތުމާއި ހައިވޭގައި ބެރިކޭޑް ޖެހުން ފަދަ ކަންކަން ހިމެނެއެވެ.