ށ. އަތޮޅު ގޮއިދޫގައި ޒަމާނީ ދަނޑުވެރިކަން ތަޢާރަފްކުރުމަށް އޮޓޯޕޮޓް ގްރީންހައުސް ފާމް މަޝްރޫޢު ފަށައިފި

ށ. އަތޮޅު ކައުންސިލުން އެއަތޮޅު ގޮއިދޫގައި އޮޓޯޕޮޓް ގްރީންހައުސް ފާމް ޤާއިމްކުރުމުގެ މަޝްރޫޢުގެ މަސައްކަތް ފަށައިފިއެވެ. މިއީ ށ. އަތޮޅުގައި ޒަމާނީ ދަނޑުވެރިކަން ތަޢާރަފްކޮށް، ރައްޔިތުން ދަނޑުވެރިކަމަށް ޝައުޤުވެރިކުރުވުމުގެ މަޤްޞަދުގައި ކުރިޔަށް ގެންދާ މަޝްރޫޢެކެވެ.

މި މަޝްރޫޢުގެ ދަށުން ގޮއިދޫގައި 1000 އަކަފޫޓުގެ 2 އޮޓޯޕޮޓް ގްރީންހައުސް ފާމް ޤާއިމްކުރުމަށް ވަނީ ހަމަޖެހިފައެވެ. މިއީ އަތޮޅު ކައުންސިލުން 450,120.00 ރުފިޔާ (ހަތަރުލައްކަ ފަންސާސް ހާސް އެއްސަތޭކަ ވިހި ރުފިޔާ) ޚަރަދުކޮށްގެން، ޕްރައިމް ފާރޓިލައިޒަރސް މޯލްޑިވްސްއާއި ހަވާލުކޮށްގެން ހިންގާ މަޝްރޫޢެކެވެ.

ށ. އަތޮޅު ކައުންސިލުން މަޢުލޫމާތު ދެއްވިގޮތުގައި، މި މަޝްރޫޢުގެ ދަށުން ޤާއިމްކުރާ ފާމްތައް ހިންގާ ބެލެހެއްޓުމުގެ މަސައްކަތް ކުރިއަށް ގެންދާނީ ގޮއިދޫ ކައުންސިލާ ހަވާލުކޮށްގެންނެވެ. އަދި މި މަޝްރޫޢުގެ ކާމިޔާބީއަށް ބަލައި، އަތޮޅުގެ އެހެން ރަށްރަށުގައިވެސް މި މަޝްރޫޢު ކުރިއަށް ގެންދިއުމަށް ރާވާފައިވާ ކަމަށް އެ ކައުންސިލުން ވިދާޅުވިއެވެ.

މި މަޝްރޫޢުގެ ސަބަބުން ށ. އަތޮޅުގައި ޒަމާނީ ދަނޑުވެރިކަން ކުރިއަރައި، ރައްޔިތުންނަށް އިތުރު ވަޒީފާގެ ފުރުޞަތުތަކެއް ހުޅުވިގެންދާނެ ކަމަށް ށ. އަތޮޅު ކައުންސިލުން ފާހަގަކުރެއްވިއެވެ.

މި މަޝްރޫޢާ ގުޅޭ ގޮތުން ދަނޑުވެރިކަމާއި ބެހޭ ވުޒާރާއިން ވިދާޅުވީ އަމާޒަކީ ދަނޑުވެރިކަމުގެ ސިނާއަތް ފުޅާވެ، ކާނާއަށް ބޭރު ޤައުމުތަކަށް ބަރޯސާވާ މިންވަރު ކުޑަކޮށް ރައްކާތެރި ކާބޯތަކެތި ދަނޑުފަނގުތަކުން ލިބިގެން ދިއުންކަމަށެވެ. އެގޮތުން މި އަމާޒަށް ވާސިލްވުމަށް ފަރުދީގޮތުންނާއި ޖަމްޢިއްޔާ ޖަމާޢަތްތަކުން އިސްނަންގަވައިގެން މިފަދަ މަޝްރޫޢުތައް ހިންގުމަކީ މި ވުޒާރާއިން ބަލައިގަންނަ، އަދި ހިތްވަރުދޭ ކަންތައްކަމަށް އެ ވުޒާރާއިން ވިދާޅުވިއެވެ.