އުތުރުގެ މަސްވެރިންގެ އުއްމީދުތަކާ ގުޅިފައިވާ، އިހަވަންދޫގެ ފިޝަރީޒް ކޮމްޕްލެކްސްގެ ބިންގާ އަޅައިފި

ހއ. އިހަވަންދޫގައި އަލަށް ޤާއިމްކުރާ ފިޝަރީޒް ކޮމްޕްލެކްސްގެ ބިންގާ އަޅައިފިއެވެ. 

މި މަޝްރޫޢުގެ ބިންގާ އަޅުއްވައިދެއްވީ މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމެވެ.

އެ ރަށުގައި މި މަޝްރޫޢު ފައްޓަވާ ދެއްވުމުގެ ބިންގާ އަޅުއްވައިދެއްވީ، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހއ އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

މި މަޝްރޫއާ ގުޅިގެން ރައީސުލްޖުމްހޫރިއްޔާ ވިދާޅުވީ، އެ ކޮންޕްލެކްސްގެ މަސައްކަތް މި އަހަރުގެ މެއިމަހުގެ ތެރޭގައި ފެށޭވަރުވާނެ ކަމަށާއި، އަދި އަމާޒަކީ މަސައްކަތް ފަށާތާ 18 މަސްދުވަހުގެ ތެރޭގައި މަޝްރޫޢު އެއްކޮށް ނިންމުން ކަމަށެވެ.

މި މަޝްރޫޢަށް 474 މިލިއަން ރުފިޔާގެ ބަޖެޓެއް ކަނޑައަޅާފައިވާއިރު، މިއީ އިސްލާމިކް ޑިވަލޮޕްމެންޓް ބޭންކުގެ އެހީގައި ކުރިޔަށް ގެންދިއުމަށް ނިންމާފައިވާ ޕްރޮޖެކްޓެއްކަމަށް ވެސް ރައީސުލްޖުމްހޫރިއްުޔާ ވަނީ ވިދާޅުވެފައެވެ.

މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް މި މަޝްރޫޢު ސިފަކުރައްވަނީ އެ ސަރަޙައްދުގެ މަސްވެރިންނަށް ލިބިގެންދާނެ ބޮޑު މާލީ ލުޔެއްގެ ގޮތުގައެވެ.

ވަޒީރު ޕީއެސްއެމްއަށް ދެއްވި އިންޓަވިއުއެއްގައި ވިދާޅުވީ، މި މަޝްރޫޢާއެކު، އެ ސަރަޙައްދުގެ ދޯނިތައް މަސްކިރުމަށް ފެލިވަރަށް ކުރަންޖެހޭ ދިގު ދަތުރަށް ނިމުމެއް އަންނާނެކަމަށާއި، މިއީ މަސްވެރިން ތެލަށްކުރާ ޚަރަދު ކުޑަކުރެވޭނެކަމެއް ކަމަށެވެ. 

މި މަޝްރޫޢުގެ ދަށުން 1000 ޓަނުގެ ކޯލްޑް ސްޓޯރޭޖަކާއި 50 ޓަނުގެ ބްރައިން ފްރީޒިން ފެސިލިޓީއެއް ތަރައްޤީކުރުމަށް ވަނީ ހަމަޖެހިފައެވެ. އަދި އޮފީސް އިމާރަތަކާއި އިންޖީނުގެއާއި ވެހިކަލް ވަރކްޝޮޕުގެ އިތުރުން ގުދަނެއް އެޅުމަށްވެސް ހަމަޖެހިފައިވެއެވެ. 

އަދި މީގެ އިތުރުން 130 މީޓަރުގެ ދިގު އެއްގަމަށް މަގަތުފާލަމަކާއި 3 ޕޮއިންޓުން މަސްކިރޭ ގޮތަށް 3.5 މީޓަރުގެ ފުންމިނުގެ ބަނދަރެއްވެސް ތަރައްޤީކުރުމަށް ހަމަޖެހިފައިވެއެވެ.