ހިރިމަރަދޫ ރައްޔިތުން އެދުމުން، އެ ރަށު ރައްޔިތުން ހަނިމާދޫއަށް ބަދަލުކުރުމަށް ނިންމައިފި

ހދ. ހިރިމަރަދޫގެ ރައްޔިތުންގެ އެދުމަށް، އެ ރަށު ރައްޔިތުން އެ އަތޮޅުގެ ހަނިމާދޫއަށް ބަދަލުކުރުމަށް ސަރުކާރުން ނިންމައިފިއެވެ. 

ސަރުކާރުން މިކަން މިގޮތަށް ނިންމާފައިވާކަމަށް ހާމަކޮށްފައިވަނީ ރައީސުލްޖުމްހޫރިއްޔާގެ އޮފީހުގެ ތަރުޖަމާނު، ޙީނާ ވަލީދު ސޯޝަލް މީޑިއާގައި ކުރެއްވި ޕޯސްޓެއްގައެވެ.

ހދ. ހިރިމަރަދޫ ރައްޔިތުން އެދިވަޑައިގަތްގޮތަށް، އެރަށު ރައްޔިތުން ހދ. ހަނިމާދޫއަށް ބަދަލުކުރުމަށް ސަރުކާރުން ނިންމަވައިފި.

ރައީސުލްޖުމްހޫރިއްޔާގެ އޮފީހުގެ ތަރުޖަމާނު، ޙީނާ ވަލީދު ވިދާޅުވިއެވެ.

ހދ. ހިރިމަރަދޫގެ ރައްޔިތުން އެހެން ރަށަކަށް ބަދަލުވުމަށް ބޭނުންވާކަމަށް ބުނެ އެކަން ކޮށްދިނުމަށް ސަރުކާރުގައި އެދިފައިވަނީ މިދިޔަ އަހަރުގެ ސެޕްޓެންބަރުމަހުގެ ތެރޭގައެވެ. އަދި މި މަޝްވަރާތައް އޮކްޓޫބަރު މަހުގެ ތެރޭގައި ކުރިޔަށް ގެންގޮސްފައިވެއެވެ.

ސަރުކާރުގެ މި ނިންމުމާ ގުޅޭ އިތުރު ތަފްސީލު އަދި ހާމަކޮށްފައެއް ނުވެއެވެ.

ހިރިމަރަދޫގެ އާބާދީގައި ހިމެނެނީ 293 މީހުންކަމަށް އެންމެ ފަހުގެ ބޯހިމެނުމުން ދައްކާއިރު، މިއީ ރާއްޖޭގައި އެންމެ އާބާދީ ކުޑަރަށްތަކުގެ ތެރެއިން ރަށެކެވެ. 

ސަރުކާރުގެ އަމާޒަކީ ރާއްޖެ 7 ޒޯނަކަށް ބަހާލައިގެން ތަރައްޤީގެ މަޝްރޫޢުތަކެއް ކުރިއަށްގެންދިޔުމެވެ. މިގޮތުން ކުދި އާބާދީތަކުން މިފަދަ ސަރަޙައްދުތަކަށް ބަދަލުވާން އެދޭ ފަރާތްތަކަށް އެފުރުސަތު ދެވޭނެ އިންތިޒާމު ހަމަޖެއްސުމަށްވެސް ސަރުކާރުންވަނީ ނިންމަވާފައެވެ.