ސީއޭއޭގެ މުވައްޒަފުން މުސާރައިގެ މައްސަލައިގައި ރައީސް މުއިއްޒަށް ޕެޓިޝަނެއް ހުށަހަޅައިފި

ސިވިލް އޭވިއޭޝަން އޮތޯރިޓީ (ސީއޭއޭ)ގެ މުވައްޒަފުން، އެ އޮތޯރިޓީގެ އާ އޮނިގަނޑާ ޚިލާފަށް ޖެނުއަރީ މަހުގެ މުސާރަ ދިން މައްސަލައިގައި ރައީސް ޑރ. މުހައްމަދު މުއިއްޒަށް މިއަދު ޕެޓިޝަނެއް ހުށަހަޅައިފިއެވެ.

މުވައްޒަފުން ހުށަހެޅި ސިޓީގައި ބުނެފައިވާ ގޮތުގައި، ސީއޭއޭގެ ބޯޑުން ފާސްކޮށްފައިވާ އާ ވަޒީފާގެ އޮނިގަނޑަށް 2025 ޖެނުއަރީ 1 އިން ފެށިގެން އަމަލުކުރަން ފަށާފައިވާ ކަމަށް މުވައްޒަފުންނަށް އަންގާފައިވެއެވެ. އަދި އާ އޮނިގަނޑުގެ ވަޒީފާގެ އެއްބަސްވުންތަކުގައި ހުރިހާ މުވައްޒަފުން ސޮއިކޮށްފައިވާ ކަމަށްވެސް ބުނެފައިވެއެވެ.

ނަމަވެސް، މުވައްޒަފުން ފާހަގަކޮށްފައިވާ ގޮތުގައި، އާ އޮނިގަނޑާ ޚިލާފަށް މިދިޔަ ޖެނުއަރީ މަހުގެ މުސާރަ ލިބިފައިވަނީ ކުރީގެ އޮނިގަނޑަށެވެ. މި ކަމާ ގުޅޭގޮތުން ސުވާލު އުފެދުމުން، އޮތޯރިޓީން ބުނެފައިވަނީ ސަރުކާރުގެ ކަމާބެހޭ އިދާރާތަކުން ލިބެންޖެހޭ ހުރިހާ ހުއްދަތައް ނުލިބި އާ އޮނިގަނޑަށް އަމަލުކޮށްފައިވާ ކަމަށެވެ.

މި މައްސަލައިގެ ސަބަބުން ކަންބޮޑުވުން އުފެދިފައިވާތީ، މުވައްޒަފުން ވަނީ ރައީސް މުއިއްޒާ ބައްދަލުކުރުމަށް އެދިފައެވެ. ސިޓީގައި ބުނެފައިވާ ގޮތުން، ސީއޭއޭއަކީ ދިވެހިރާއްޖޭގެ އޭވިއޭޝަން އިންޑަސްޓްރީގެ ސަލާމަތާއި ރައްކާތެރިކަން ކަށަވަރުކުރުމުގެ ޒިންމާ އުފުލާ މުއައްސަސާއަކަށްވާތީ، މި މައްސަލައިގެ ހައްސާސްކަމާއި ކަންބޮޑުވުންތައް ހިއްސާކުރުމަށް ރައީސް މުއިއްޒާ ބައްދަލުކުރަން ބޭނުންވާ ކަމަށް ބުނެފައިވެއެވެ.

މުވައްޒަފުން އެދިފައިވަނީ ވީ އެންމެ އަވަސް ފުރުސަތެއްގައި ރައީސް މުއިއްޒާ ބައްދަލުކުރުމަށް އެޕޮއިންޓްމަންޓެއް ހަމަޖައްސައި ދިނުމަށެވެ.