ކުޑަކުއްޖަކު ފުލުސް އޮފިސަރަކަށް ހަމަލާދިން މައްސަލައިގައި ހިމެނޭ ގިނަ ކަންތައްތަކެއް ބަލަން ނިންމައިފި

ރ އަތޮޅު މީދޫގައި ޕޮލިސް ސްޓޭޝަނަށް ހާޒިރުވާން އެންގުމުން ފުލުސް އޮފިސަރަށް ހަމަލާދިން މައްސަލައިގައި ހިމެނޭ ގިނަ ކަންތައްތަކެއް ބަލަން ފަށާފައިވާކަމަށް ފުލުހުން ހާމަކޮށްފިއެވެ.

މި ހާދިސާ ހިނގާފައިވަނީ ބުރާސްފަތި ދުވަހުގެ ރެއެވެ. މިކަން ފެށުނީ، މަގުމަތީގައި އަޑުގަދަކޮށް ހަޅޭއްލަވަމުން ދިޔަ ކުދިބަޔަކަށް އެކަން ހުއްޓުމަށް، އޮފް ޑިއުޓީގައި ހުރި ޕޮލިސް އޮފިސަރަކު އެންގުމުން، އެކަން ނުހުއްޓާނެކަމަށް ބުނެ ޖަދަލުކުރަން ފެށުމުން ކަމަށް ފުލުހުން ވަނީ ހާމަކޮށްފައެވެ.

އަދި މިކަމުގެ ތެރޭގައި އެ ކުދިންނަށް އެ ރަށު ޕޮލިސް ސްޓޭޝަނަށް ހާޒިރުވާން އެންގުމުން، އެ ތަނުން އެއް ކުއްޖަކު ހަމަނުޖެހުން ހިންގައި، ފުލުސް އޮފިސަރަށް ހަމަލާދީފައިވާކަމަށް ވެއެވެ.

މި މައްސަލަ ތަހުޤީޤުގެ ތެރޭގައި، މި މައްސަލައާ ގުޅިގެން ހަމަނުޖެހުން ހިންގާފައިވާ ކުއްޖާގެ އާއިލާއިން އެ ކުއްޖާއަށް ފުލުސް އޮފިސަރު އަނިޔާކޮށްފައިވާކަމަށް ތުހުމަތު ކުރަމުން ދިއުމާއި ގުޅިގެން، މި މައްސަލަ ވެސް ބެލުމަށް ނިންމާފައިވާކަމަށް ފުލުހުން ހާމަކޮށްފައިވެއެވެ.

މީގެ އިތުރުން، މި ކުއްޖާ ކޮންޓްރޯލް ކުރުމުގައި ފުލުހުން އަމަލުކޮށްފައިވާ ގޮތުގެ ރިވިއުއެއް، ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑުން ކުރަމުންދާކަމަށް ވެސް ފުލުހުން ހާމަކޮށްފައިވެއެވެ.