ވިލާ އެއަރ އާއި ސިވިލް އޭވިއޭޝަން މަޖިލީހަށް ހާޒިރުކުރަނީ

ކާޑެއްދޫ އެއާރޕޯޓު ރަގަޅަށް ނުބަލަހައްޓާކަމަށް ބުނެ ހުށަހަޅާފައިވާ މައްސަލައިގައި ވިލާ އެއަރ އާއި ސިވިލް އޭވިއޭޝަން އޮތޯރިޓީ، ރައްޔިތުންގެ މަޖިލީހުގެ އިޤްތިޞާދީ ކޮމެޓީއަށް ހާޒިރުކުރުމަށް ނިންމައިފިއެވެ.

މަޖިލީހުގެ އިޤްތިޞާދީ ކޮމެޓީއަށް މިދިޔަ އަހަރުގެ ތެރޭގައި މި މައްސަލަ ހުށަހަޅާފައިވަނީ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީއެވެ. އެގޮތުން އެއާރޕޯޓުގެ މެއިންޓެނަންސް މަސައްކަތްތަކާއި، އެއާރޕޯޓުގައި ފަސިންޖަރުންނަށް ޚިދުމަތް ދިނުމަށް ބޭނުންކުރަމުން އަންނަ އިމާރާތުގެ ފެންވަރު ރަގަޅުކޮށް ޚިދުމަތްތަކުގެ ފެންވަރު ރަގަޅު ކުރުމަށް އެކަށީގެންވާ މަސައްކަތްތަކެއް މިހާތަނަށް ކޮށްފައިނުވާކަން ސައުދު ވަނީ ފާހަގަކުރައްވާފައެވެ.

މި މައްސަލައާ ގުޅިގެން މަޖިލީހުގެ އިޤްތިޞާދީ ކޮމެޓީއިން ވަނީ އެ އެއާރޕޯޓުގެ މައްސަލައެއް އެއްވެސް އިރެއްގައި ސިވިލް އޭވިއޭޝަނަށް ހުށަހަޅާފައިވޭތޯ ބަލާފައެވެ. ނަމަވެސް މިފަދަ މައްސަލައެއް އެ އޮތޯރިޓީއިން ބަލަމުން ނުދާކަމަށާއި، އޮތޯރިޓީގެ އާންމު އުސޫލުގެ ތެރެއިން މިފަދަ މައްސަލަތައް ބެލުމަކީ އެ އޮތޯރިޓީން ކުރަމުން އަންނަކަމެއް ނޫންކަމަށް ހާމަކޮށްފައިވެއެވެ.

މި މައްސަލަ ހުށަހެޅުއްވި، މެންބަރު ސައުދުﷲ ހިލްމީއަކީ ރައްޔިތުންގެ މަޖިލީހުގެ އިޤްތިޞާދީ ކޮމެޓީ ނައިބު މުޤައްރިރު ވެސް މެއެވެ. އަދި މި މައްސަލައާ ގުޅިގެން ބޭއްވި ބައްދަލުވުމުގައި ސައުދުވަނީ އެއާރޕޯޓާ ގުޅޭ ގިނަ ކަންބޮޑުވުންތަކެއް ފާޅު ކުރައްވާފައެވެ. އަދި މި ކަންބޮޑުވުންތަކާ ގުޅިގެން ޖަވާބުދާރީ ކުރުވުމަށް، އެއާރޕޯޓު ހިންގާ ކުންފުނި މަޖިލީހަށް ހާޒިރުކުރަން ޖެހޭނެކަމަށް ސައުދު ފާހަގަކުރައްވާފައިވެއެވެ.

މި މައްސަލައާ ގުޅިގެން އިޤްތިޞާދީ ކޮމެޓީގައި އިންނަވާ ވެލިދޫ ދާއިރާގެ މެންބަރު މުޙައްމަދު އައްބާސް ވިދާޅުވީ، ސިވިލް އެވިއޭޝަނުން އިސްވެ މައްސަލައެއް ބަލަމުން ނުދާކަމަށް ފާހަގަކޮށްފައިވީނަމަވެސް، މި މައްސަލައިގައި އެ އޮތޯރިޓީއާ ސުވާލުކުރަން ފެންނަކަމަށެވެ. ސަބަބަކީ އެ އޮތޯރިޓީން ޤަވާއިދުން ހަދަންޖެހޭ އޮޑިޓްތައް ހަދަމުންދިޔަނަމަވެސް މިފަދަ އެއްވެސް މައްސަލައެއް ބަލާފައި ނުވުމެވެ. 

ކާޑެއްދޫ އެއަރޕޯޓު ވިލާއެއަރ އާއި ހަވާލުކޮށްފައިވަނީ 2013 ވަނަ އަހަރުއެވެ. ނަމަވެސް 2017 ވަނަ އަހަރު އެއަރޕޯޓު އަތުލުމަށް އޭރު ސަރުކާރުން ނިންމައި އެއްބަސްވުން އުވާލިއެވެ. އެމައްސަލާގައި ސުޕްރީމް ކޯޓުން ނިންމީ އެއަޕޯޓު އަތުލަން ޖެހޭ އެކަށީގެންވާ ސަބަބެއް ނުދެއްކޭ ކަމަށެވެ.