އިހަވަންދިއްޕޮޅުގައި ހިންގާ އުތުުރު ގޭޓްވޭ އުލިގަމުގައި ހުޅުވައިފި

އިހަވަންދިއްޕޮޅުގައި ހިންގާ އުތުުރު ގޭޓްވޭ ޕްރޮޖެކްޓްގެ ތެރެއިން އެކަމަށް ޚާއްޞަ  އޮފީސް ހއ. އުލިގަމުގައި ހުޅުވައިފި އެވެ.

އެމްޕީއެލް އާއި އިމިގްރޭޝަނާއި ކަސްޓަމްސް އަދި އެމްއެންޑީއެފްގެ މުވައްޒަފުންނަށް ޚާއްޞަ ޖާގަ ކަނޑައަޅާފައިވާ މި އޮފީސް ހުޅުއްވައިދެއްވީ އެ ރަށުގެ ރިޓަޔާޑް މެޖިސްޓްރޭޓް އިދްރީސް އާދަމްއެވެ. މި އޮފީސް ފަރުމާ ކޮށްފައިވަނީ މައްސަލައެއް ދިމާވެއްޖެނަމަ، ޑިޓެންޝަން ރޫމެއްގެ އިތުރުން، އެ އޮފީހަށް ވަންނަ ފަރާތްތަކުން ސެކިއުރީ ސްކްރީން ކުރެވޭގޮތަށެވެ. 

އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް ވިދާޅުވީ، މި އޮފީސް މެދުވެރިކޮށް، ގިނަ ޚިދުމަތްތަކެއް ފޯރުކޮށްދެވޭނެ ކަމަށެވެ. ހަމައެއާއެކު އެ ކުންފުނީގެ މުވައްޒަފުންގެ ކިބައިގައި އެ ޚިދުމަތްތައް ދިނުމުގެ ގާބިލްކަން ހުރި ކަމަށްވެސް ވަޖީހު ވިދާޅުވިއެވެ. 

އައިއެސްޕީއެސް އޮފީސް ހުޅުވިގެން ދިޔައިރު މިއަދު ބަންކަރިން ޚިދުމަތް ރަސްމީކޮށް ފެށުމަށް ވަނީ ތައްޔާރުވެފައެވެ.