މާލޭގެ ޓެކްސީ މައްސަލައަށް ޙައްލެއް: ސަރުކާރުގެ ޓެކްސީ ޚިދުމަތާއެކު ހެންވޭރުން ގަލޮޅަށް ދާންވެސް ޓެކްސީ ލިބޭނެ

މާލެ ސިޓީގެ ޓެކްސީ މައްސަލައަކީ ގިނަ ދުވަސްތަކެއް ވަންދެން ރައްޔިތުންނަށް ދަތިވަމުން އައި މައްސަލައެކެވެ.ޚާއްސަކޮށް މާލެތެރެއިން ޓެކްސީ އެއް ހޯދުން ވެފައޮ އޮންނަނީ ދެދުވަހުގެ ކަމަކަށެވެ. މަގެއްގެމަތީގައި ވިއްސަކަށް މިނިޓް ޓެކްސީ އެއް ހޯދަން ހުއްޓިލައިގެން ހުރިނަމަވެސް ގިނަފަަހަރު ޓެކްސީ ނުލިބެއެވެ. ސެންޓަރަށް ގުޅާއިރު ޓެކްސީ ނުލިބުމާއި ފޯން ބިސީ ކޮށްފައި ހުރުން މިއީ ކޮންމެ ދުވަހަކުވެސް ރައްޔިތުން ކުރިމަތިލަމުން އަންނަދަތިތަކެވެ. 

ޚާއްސަކޮށް ބަންދު ދުވަސްތަކަކީ ތަފާތު އެކި ހަފްލާ މާލެތެރޭގައި އޮންނަ ދުވަސް ތަކެކެވެ. މިފަދަ ދުވަހެއްގައި އަމުދުން މާލެތެރެއިން ޓެކްސީ ލިބުމަކި ނާދިރު ކަމެކެވެ. 

ޓެކްސީ ޑްރައިވަރުން ގިނަ ފަހަރު ސިޓީ ތެރޭގައި ކުރު ދަތުރުތައްނެގުމަށް ވުރެން ހުޅުމާލެ ފޭސް 1 އަދި ދެއަކަށް ނުވަތަ އެއަރޕޯޓަށް ކުރާ ދަތުރު ތަކަށް އިސްކަން ދޭކަން ފާހަގަކޮށް ގިނަ ރައްޔިތުން ޝަކުވާކުރެއެވެ.

ވަރަށް އުންދަގޫ ޓެކްސީ ހޯދަން ، ގިނަފަހަރު މީހުން އަރުވައިގެންވެސް ޓެކްސީ އުޅެނީ ފެހި ބޮކި ދިއްލައިގެން ، އެތައްއިރެއްވާއިރުވެސް ޓެކްސީ އެއް ނުލިބޭ

އަޢިޝަތު ނާއިލާ

މި ދެމިގެންދާ މައްސަލަތަކަށް ޙައްލެއް ހޯދުމުގެ ގޮތުން، ދިވެހި ސަރުކާރުން ސަރުކާރު ހިންގާ ޓެކްސީ ޚިދުމަތެއް ތަޢާރަފުކުރުމަށް ނިންމާފައިވެއެވެ. މިއީ އާންމު ދަތުރުފަތުރުގެ ޚިދުމަތަށް ބޭނުންވެފައިވާ އިތުބާރާއި އިންސާފު ގެނެސްދޭނެ ކަމެކެވެ.

ގުޅައިގެން ޓެކްސީ ނުލިބޭތާގަ މަގުމަތިންވެސް ޓެކްސީ އެއް ނުލިބޭ ، ހުއްޓާ ބައެއް ކާރުތައް އަހާލާނެ ދަނީ ކޮންތާކައްތޯ ، ހުޅުމާލެވިއްޔާ އޯކޭ ، އެކަމު މާލެ ތެރެވިއްޔާ ބޯހޫރާލާފަ ނޫނެކޭ ބުނާނެ ، އަވަސް ރައިޑަކަށް ޖެހިޔަސް މާލޭ ތެރޭ ދަތުރެއްވިއްޔާ ހަމަ ޓެކްސީ ހޯދަން އުނދަގޫ

މުޙައްމަދު ހަކީމް

ސަރުކާރުން ހިންގާ ޓެކްސީ ޚިދުމަތްތައް ވަނީ އެކި ޤައުމުތަކުގައި ކާމިޔާބުކަމާއެކު ތަންފީޒުކޮށްފައެވެ. މިގޮތުން ދަތުރުގެ އަގުތައް ބެލެހެއްޓުމާއި ޚިދުމަތް ލިބެން ހުރިކަން ކަށަވަރުވެއެވެ. މިސާލަކަށް، ސިންގަޕޫރުގެ ކޮމްފޯޓްޑެލްގްރޯ ޓެކްސީތަކަކީ ސަރުކާރާއި އަމިއްލަ ފަރާތްތަކުގެ މިލްކިއްޔާތުގެ މައްޗަށް އެކުލެވޭ ޚިދުމަތެކެވެ. މި ޚިދުމަތުން ފޯރުކޮށްދެނީ ރޭވިފައިވާ އަގުތަކަކާއި އިތުބާރުހުރި ބުކިންގ ނިޒާމެކެވެ. މިއީ ފަސިންޖަރުންނަށް ކުރިމަތިވާ ދަތިތައް މަދުކޮށްދޭ ކަމެކެވެ. ހަމައެހެންމެ، ޖަޕާނުގެ ސަރުކާރުގެ އެހީތެރިކަމާއެކު ހެދިފައިވާ ޓެކްސީ ޤަވާޢިދުތަކުން ޑްރައިވަރުންގެ ޒިންމާދާރުކަން ހިފަހައްޓައި، އިންސާފުވެރި އަގުތަކެއް ކަނޑައަޅައި، އެއްވެސް މީހަކު ކުޑަ އަގެއް ލިބޭ ދަތުރުތަކުގެ ސަބަބުން ދަތުރު ނުކުރެވި ނުތިބޭނެކަން ކަށަވަރުކުރެއެވެ.

ސަރުކާރުގެ ފަރާތުން މާލޭގައި ޓެކްސީގެ ޚިދުމަތް ދިނުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީއާ ވަނީ ހަވާލުކޮށްފައެވެ.ސަރުކާރުގެ ޓެކްސީ ޚިދުމަތުގައި ބޭނުން ކުރާނީ ސައްތައިން ސައްތަ ތިމާވެއްޓާ ރައްޓެހި އީވީ ޓެކްސީތަކެވެ.ސަރުކާރުން  ޚިދުމަތް ފެށިނަމަވެސް މިހާރު ޓެކްސީގެ ޚިދުމަތް ދޭ މީހުންނަށް އެކަމުގެ ގެއްލުމެއް ނުލިބޭނެ ކަމުގެ ޔަގީންކަން ސަރުކާރުން ދެއްވިއެވެ.

މީގެ އިތުރުން ޓެކްސީ ޚިދުމަތާ ގުޅުމުގެ ފުރުޞަތު ފުލް ޓައިމްކޮށްނާއި ޕާޓްޓައިމްކޮށް ކުރަން ބޭނުންވާ ފަރާތްތަކަށްވެސް ހުޅުމާލާފައި އޮތުމަކީ ގިނަބަޔަކަށް މިކަމުން ފައިދާ އަދި އާމްދަނީ ލިބޭނެ ކަމެކެވެ.

ޚިދުމަތް ދިނުމަށް އޫބަރ ނުވަތަ ގްރެބް ކޮންސެޕްޓްފަދަ ސޮފްޓްވެއަރގެ ތެރެއިން އެމްޓީސިީސީން ބަލަހައްޓާނީ. ޑްރައިވަރުންގެ ބަދަލުގައި އެމްޓީސީސީން އެކަން ބަލަހައްޓާނީ. ޓެކްސީގެ ޚިދުމަތަށް އެދޭތާ މަދުވެގެން 2 މިނެޓް ތެރޭގައި ލިބޭނެ. މި ޚިދުމަތާއެކު އެއަރޕޯޓުގެ ޓެކްސީ ކިއުގެ މައްސަލައަށްވެސް ހައްލުތަކެއް ލިބޭނެ

ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން

މާލޭގައި ސަރުކާރުން ހިންގާ ޓެކްސީ ޚިދުމަތެއް ޤާއިމުކުރެވުމުން، ރައްޔިތުންނަށް އިންސާފުވެރި، ކަނޑައެޅިފައިވާ އަގުތަކެއް އަދި ފަސޭހައިން ލިބެންހުރި ދަތުރުފަތުރުގެ ވަސީލަތްތަކެއް ލިބިގެންދާނެއެވެ.

ޓެކްސީގެ ޚިދުމަތަކީ ވަރަށް އަސާސީ މުހިންމު ޚިދުމަތަކަށްވާއިރު،  ޓެކްސީތައް ޒިންމާދާރުކުރުވޭނެ އެއްވެސް ގޮތެއް ނެތްކަން ދަތުރުފަތުރާ ބެހޭ ވުޒާރާއިން ވަނީ ހާމަކޮށްފައެވެ.

މި ބަދަލުގެ ސަބަބުން ޑްރައިވަރުންނަށް ފައިދާ ބޮޑު ދަތުރުތައް އެކަނި ހޮވައިގެން ދަތުރުކުރުން ހުއްޓުވައި، ހުރިހާ ރައްޔިތުންނަށްވެސް ހަމަހަމަކަމާއެކު ދަތުރުފަތުރުގެ ޚިދުމަތް ހަރުދަނާކަމާއެކު ތަންފީޒުކުރެވިއްޖެނަމަ، މާލޭގެ އާންމު ދަތުރުފަތުރުގެ ނިޒާމަށް ބޮޑު ކުރިއެރުމެއް ލިބި، މުޅި ދިވެހިރާއްޖޭގައި ރަނގަޅު ދަތުރުފަތުރުގެ ޙައްލުތަކެއް ހޯދުމަށް މަގުފަހިވެގެންދާނެއެވެ.