އެމްޓީސީސީގެ ސީއޯއޯގެ މަޤާމަށް ސިނާން އަލީ އައްޔަނުކޮށްފި

އެމްޓީސީސީގެ ޗީފް އޮޕަރޭޓިން އޮފިސަރު (ސީއޯއޯ) ގެ މަޤާމަށް ސިނާން ޢަލީ އައްޔަނުކޮށްފި އެވެ.

ސިނާންއަކީ އެމްޓީސީސީގެ ބޯޑު މެންބަރުކަން ވެސް ކުރައްވާފައިވާ ބޭފުޅެކެވެ. ސިނާން އެމްޓީސީސީގެ ބޯޑުގައި ހުންނެވީ 2019 ވަނަ އަހަރުން ފެށިގެން މި މަހުގެ ހަ ވަނަ ދުވަހުގެ ނިޔަލަށް ކަމަށް މަޢުލޫމާތު ލިބެއެވެ. 

ވަން އޮންލައިންގެ ސީއީއޯގެ މަޤާމުގައިވެސް ހުންނެވި ސިނާން އަލީ އަކީ އެމްޓީސީސީގެ ބޯޑު މެންބަރު ކަމާއި، ސްޓެލްކޯގެ ޗެއާޕާސަންގެ މަގާމާއި އައިލެންޑް އޭވިއޭޝަންގެ ބޯޑު މެމްބަރެއްގެ މަޤާމުވެސް ފުރުއްވާފައެވެ.  

ނޫސްވެރިކަމުގެ ދާއިރާ އިން ޤައުމީ އިނާމު ހާސިލުކޮށްފައިވާ ސިނާން އަކީ އިނގިރޭސި ވިލާތުގެ އެންޖެލާ ރަސްކިން ޔުނިވަސިޓީން މާސްޓާސް އޮފް ބިޒްނަސް އެޑްމިނިސްޓްރޭޝަން ފުރިހަމަ ކޮށްފައިވާ ބޭފުޅެކެވެ. ސިނާން ވަނީ ނޫސްވެރިކަމުގެ ދާއިރާގައި 20 އަހަރަށް ވުރެ ގިނަ ދުވަހު ޚިދުމަތް ކުރައްވާފައެވެ. އެގޮތުން "މިއަދު" ނޫހާއި "ހަވީރު" ނޫހުގައި މަސައްކަތް ކުރެއްވުމަށް ފަހު އޭނާ ވަނީ 2008 އިން 2018 ވަނަ އަހަރަށް ސަން ޓީވީގެ ސީއީއޯގެ މަގާމު ވެސް ފުރުއްވައިފަ އެވެ.