ޚަބަރު
މުޒާހަރާ ކުރި ޓެކްސީ ޑްރައިވަރުންގެ ތެރެއިން ތިން ޑްރައިވަރަކަށް ދަޢުވާކޮށްފި

މަގުމަތީގައި ފުލުހުން ހަރަކާތްތެރި ވަނީ- ފޮޓޯ: ޕީއެސްއެމް ނިއުސް
އާންމު ދަތުރުފަތުރަށް ހުރަސްއަޅައި، ފުލުހުންގެ ދައުރު އަދާކުރުމަށް ހުރަސް އެޅި ޓެކްސީ ޑްރައިވަރުންގެ ތެރެއިން ތިން ޑްރައިވަރަކަށް ދަޢުވާކޮށްފި އެވެ.
ޕްރޮސެކިއުޓަރ ޖެނެރަލްްގެ އޮފީހުން ވިދާޅުވެފައިވަނީ 11 ޑިސެންބަރު 2024 ދުވަހު ހުޅުމާލެ ނިރޮޅުމަގު އެމް.ޑަބްލިޔު.އެސް.ސީ ކައިރީގައި ޓެކްސީ ޑްރައިވަރުންގެ މުޒާހަރާ ބައިވެރިންތަކެއް އެސަރަހައްދު މަގު ބަންދުކޮށް، އާންމު ދަތުރުފަތުރަށް ހުރަސްއަޅައި އެސަރަހައްދުގައި ހަރަކާތްތެރިވި ފުލުހުންގެ ދައުރު އަދާކުރުމަށް ހުރަސް އަޅައި ސަރަހައްދުގެ އަމަން ނަގާލަން އުޅުނުކަމަށް ތުޙުމަތު ކުރެވޭ މައްސަލާގައި ތިން މީހަކަށް ދަޢުވާތައް ކުރުމަށް ހުޅުމާލެ މެޖިސްޓްރޭޓް ކޯޓަށް ހުށަހަޅާފައިވާކަމަަށެވެ.
ޕްރޮސެކިއުޓަރ ޖެނަރަލްގެ އޮފީހުން ދަޢުވާ ކޮށްފައިވާ ތިން މީހުންނަކީ:
- މއ. ނަހީދީމަންޒިލް، މިސްބާހު ޝަރީފް
- މއ. ވިރާހު، މުހައްމަދު ޝާމިން
- ހދ. ކުމުންދޫ، ހޮލިޑޭވިޖެލް، ނުއުމާން އަހްމަދު
ޕީީޖީން ވިދާޅުވީ މި ތިންމީހުންނަށް ދަޢުވާކުރާ ސަބަބަކީ އެމް.ޑަބްލިއު.އެސް.ސީ ކައިރިން އުޅަނދުތަކަށް ނުދެވޭނެހެން ކާރުތަކެއް ބޭނުންކޮށްގެން އެ މަގު ބަންދުކުރުމުގައި ބައިވެރިވެ، ދިވެހި ފުލުހުންގެ ޚިދުމަތުން އެ ސަރަހައްދަށް ހާޟިރުވެ، މަގު ބަންދުކޮށްގެން ތިބި ފަރާތްތަކަށް އެ ސަރަހައްދު ދޫކޮށް ދިއުމަށް ނަސޭހަތްތެރިވެ އެންގުމުން އެކަމަށް އިންކާރުކޮށްފައިވާތީ ކަމުގައެވެ.
ހަމަ އެއާއެކު މަގުތައް ބޭނުންކުރުމުގައި ހެދިފައިވާ ޤާނޫނުތަކާއި ގަވާއިދުތަކަށް އުޅަނދުތަކާއި މަގުމަތި ބޭނުންކުރާ މީހުން ޢަމަލުކުރޭތޯ ކަށަވަރުކުރުމަށް ދިވެހި ފުލުހުންގެ ޚިދުމަތުގެ މައްޗަށް އޮންނަ ޒިންމާއަށް ހުރަސްއަޅައި، ހުޅުމާލޭގެ އެއްގަމު ދަތުރުފަތުރުގެ ނިޒާމަށް ހުރަސްއަޅާފައިވާތީ ކަމަށްވެސް ޕީޖީން ބަޔާން ކޮށްފައިވެއެވެ.
މި ތިން މީހުންނަށްވެސް ކޮށްފައިވަނީ ދައުލަތުގެ އެހެނިހެން މަސައްކަތްތަކަށް ހުރަސްއެޅުމުގެ ދަޢުވާ އެވެ. ދައުވާ ސާބިތުވެއްޖެނަމަ އަސާސީ އަދަބެއްގެ ގޮތުގައި ކަނޑައެޅިފައިވަނީ 4 މަހާއި 24 ދުވަހުގެ ޖަލު ހުކުމެކެވެ.