އަންހެން ހެދުން އަޅައިގެން ވައްކަން ކުރަން އުޅުނު ދެމީހަކު ހައްޔަރުކޮށްފި

އަންހެން ހެދުން އަޅައިގެން މާލޭ މާވެޔޮ މަގު ކަންމަތީ ވައްކަން ކުރަން އުޅުނު ދެމީހަކު ފުލުހުން ހައްޔަރުކޮށްފިއެވެ.

ފުލުހުން މީޑިއާއި ހިއްސާކޮށްފައިވާ މެސެޖުގައި ވަނީ، މާވެޔޮ މަގު ކަންމަތީގައި އުޅުނު ދެ ފިރިހެނަކު ސިފަ ބަދަލުކޮށްގެން ވައްކަން ކުރަން އުޅުނު ކަމުގެ ތުހުމަތުގައި ރޭ 2:39 ހާއިރު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. މި މައްސަލައާއި ގުޅިގެން ހައްޔަރުކޮށްފައި ވަނީ ގދ. ވާދޫ، ލިލީގެ މުޙައްމަދު ޞަބާޙު 46އ، އާއި ނ. މިލަންދޫ ސޯސަންގެ މުޙައްމަދު ނަޢުޝާދު 42 އ އެވެ. ފުލުހުން ހާމަކޮށްފައިވާ ގޮތުގައި މި ދެމީހުންވެސް ފުލުހުންގެ ބެލުމުގެ ދަށަށް ގެނައިރު ތިބީ އަންހެން ހެދުން އަޅައިގެންނެވެ.

ފުލުުހުން އިތުރަށް ވިދާޅުވެފައިވަނީ މި މީހުންގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން ދެ މީހުންވެސް 15 ދުވަހަށް ބަންދު ކުރުމަށް ކޯޓުން އަމަރުކޮށްފައިވާ ކަމަށެވެ. ފުލުހުން ގެންދަނީ މި މައްސަލަ ތަޙުޤީގު ކުރަމުންނެވެ.