ޚަބަރު
ދޮޅު އަހަރުތެރޭ އައްޑޫގެ ކަރަންޓު މައްސަލައަށް ދާއިމީ ޙައްލު ގެނެސްދޭނަން- ފެނަކަ

ފެނަކައިން ކަރަންޓުގެ މަސައްކަތެއް ކުރަނީ- ފޮޓޯ: ފެނަކަ ކޯޕަރޭޝަން
އައްޑޫ ސިޓީއަށް ދިމާވެފައިވާ ކަރަންޓުގެ މައްސަލައަށް ދާއިމީ ޙައްލެއް ގެނެސްދިނުމަށް ކުރަންޖެހޭ މަސައްކަތްތައް ފަށާފައިވާ ކަމަށާއި، ދޮޅު އަހަރުތެރޭ މި މަސައްކަތްތައް ނިންމުމަށް އަޒުމް ހިފާފައިވާ ކަމަށް ފެނަކަ ކޯޕަރޭޝަނުން ބުނެފިއެވެ.
ރޭ ފެނަކައިން ނެރުނު ނޫސް ބަޔާނެއްގައި ވަނީ، އައްޑޫސިޓީ ހިތަދޫއާއި ގުޅިފައިވާ ރަށްރަށަށް ކަރަންޓުގެ ޚިދުމަތް ފޯރުކޮށްދޭ ސެންޓްރަލް ޕަވަރ ސްޓޭޝާންގައި ބޭނުންކުރަމުންދާ ޖެނެރޭޓަރ ސެޓްތަކުގެ ތެރެއިން 3 ގެނެރޭޓަރަކަށް މައްސަލަ ދިމާވެ، އިތުރު 1 ޖެނެރޭޓަރ ސެޓް މަރާމާތު ނުކުރެވޭވަރަށް ހަލާކުވެފައިވާކަމަށެވެ. އެހެންކަމުން އެ ރަށްރަށަށް ބޭނުންވާ ވަރަށް ކަރަންޓު އުފެއްދުމުގައި ދަތިތަކެއް ދިމާވެ، އެކި ވަގުތުތަކުގައި އެކި ސަރައްހައްދުތަކުން ކަރަންޓު ކަނޑަން ޖެހިފައިވާކަމަށާއި، މި މައްސަލަ ހައްލު ކުރުމަށް އެ ކުންފުނިން މަސައްކަތްކުރަމުންދާކަމަށްވެސް ފެނެކައިން ބަޔާންކޮށްފައިވެއެވެ.
ފެނަކައިން އިތުރަށް ބުނެފައިވަނީ މިގޮތުން، ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އާއެކު ވެފައިވާ އެއްބަސްވުމެއްގެ ދަށުން 1.8 މެގަވަޓްގެ އައު ޖެނެރޭޓަރ ސެޓެއް ހޯދައި، އައްޑޫ ސިޓީއަށް ފޮނުވުމަށްޓަކައި ލޭންޑިންގ ކްރާފްޓަށް މިހާރު ލޯޑުކޮށްފައިވާކަމަށެވެ. ހަމައެއާއެކު ހަލާކުވި ޖެނެރޭޓަރުތަކުގެ ތެރެއިން 1 ޖެނެރޭޓަރު މަރާމާތުކޮށް މިހާރު ހިންގާފަށާފައިވާކަމަށާއި، ދެވަނަ ޖެނެރޭޓަރު މަރާމާތުކޮށް މި ހަފްތާގެ ނިޔަލަށް ހިންގޭނެކަމަށް ބުނެފައިވެއެވެ. މީގެ އިތުރުން ރާއްޖެއިން ބޭރުން ސްޕެއަރ ގެނެސްގެން ތިން ވަނަ ޖަނެރޭޓަރު މަރާމާތުކޮށް، ކުރިއަށް އޮތް ހަފްތާއެއްހާ ދުވަހުގެ ތެރޭގައި ހިންގަން ފެށޭނެކަމަށް އެ ކުންފުނިން ބުނެއެވެ.
ފެނަކައިން ބުނީ، ރަމަޟާން މަހަކީ ކޮންމެ އަހަރަކުވެސް ކަރަންޓު ބޭނުންކުރާ މިންވަރު އިތުރު ވާ މަހަކަށްވާތީ އާއި، އައްޑޫ ސިޓީގައި ތަރައްޤީގެ އެކި އެކި މަޝްރޫއުތައް ކުރިއަށް ދާއިރު، ދުވަހުން ދުވަހަށް ކަރަންޓުގެ ޑިމާންޑް މަތިވަމުން ދާތީ އެކަމަށް ޚާއްޞަ ސަމާލުކަމެއް ދީގެން ފެނަކައިން މަސައްކަތްކުރަމުން ގެންދާ ކަމަށެވެ.
އައްޑޫ ސިޓީގެ ކަރަންޓު މައްސަލައަކީ ޒަމާންތަކަށް ދިގުލައިގެން ގޮސްފައިވާ އިހުމާލު ވުމުގެ ސަބަބުން ހައްލު ނުވެ އޮތް މައްސަލައެއްކަން ފެނަކައިން ފާހަގަ ކޮށްފައިވެއެވެ. އަދި ހެޔޮނިޔަތުގައި އެ މައްސަލައަށް ދާއިމީ ހައްލެއް ގެނައުމަށް އިހްލާސްތެރި މަސައްކަތްތަކެއް ކުރެވިފައި ނުވާކަމީ ފެންނަން އޮތް ޙަޤީޤަތް ކަމަށްވެސް ފެނަކައިން ފާހަގަ ކޮށްފައިވެއެވެ.
ފެނަކައިން ބުނީ ކަން މިހެން ހުރުމާއެކު ރައްޔިތުންނަށް މެދުކެނޑުމެއްނެތި ކަރަންޓު ފޯރުކޮށްދިނުމުގެ މަސައްކަތް އެކުންފުނީގެ ފުރިހަމަަ ޒިންމާގެ ދަށުން ކުރަމުން ގެންދާނެ ކަމަށެވެ. އެއާއެކު ރައީސުލް ޖުމްހޫރިއްޔާ ޑރ މުޙައްމަދު މުޢިއްޒުގެ އިރުޝާދާއި ލަފާފުޅާއެކު އައްޑޫ ސިޓީ ކަރަންޓަށް ދިމާވެފައިވާ މައްސަލައަށް ދާއިމީ ޙައްލު ހޯދުމަށް ކުރަންޖެހޭ މަސައްކަތްތައް ފަށާ ދޮޅު އަހަރު ތެރޭގައި ޢަމަލީ މަސައްކަތް ނިންމުމަށް އަމާޒު ހިފާފައިވާކަންވެސް ފެނަކައިގެ ނޫސް ބަޔާނުގައި ވެއެވެ.
އައްޑޫ ސިޓީގެ ރަށްރަށުން ކަރަންޓު ކެނޑުމުގެ މައްސަލައަކީ ޒަމާންތަކެއް ވެފައިވާ މައްސަލައެކެވެ. ނަމަވެސް މި މައްސަލައަށް ދާއިމީ ޙައްލެއް ނުލިބި އޮތުމަކީ އެ ސިޓީގެ ރައްޔިތުންގެ ކަންބޮޑުވުމެކެވެ. މި ކަންބޮޑުވުމަށް ޙައްލު ހޯއްދަވައި ދެއްވުމަށް ސަރުކާރުން ދަނީ މަސައްކަތް ކުރައްވަމުންނެވެ.