ދެމެހެއްޓެނިވި ތަރައްޤީ މަގުފަހިކުރުމަށް ސަރަޙައްދީ އެއްބާރުލުން އިތުރުކުރުން މުހިންމު- ވަޒީރު ތާރިޤު

ދެމެހެއްޓެނިވި ތަރައްޤީ މަގުފަހިކުރުމަށް ސަރަޙައްދީ އެއްބާރުލުން އިތުރުކުރުން މުހިންމު ކަމަށް މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް،  މިނިސްޓަރ ޠާރިޤް އިބްރާހީމް ވިދާޅުވެއްޖެއެވެ. 

މިނިސްޓަރ މިހެން ވިދާޅުވީ ސައުތު އޭޝިއާ ކޯޕަރޭޓިވް އެންވަޔަރަންމަންޓް ޕްރޮގްރާމް (ސަސެޕް)ގެ ޑިރެކްޓަރ ޖެނެރަލް މިސްޓަރ ނޯރބު ވަންގްޗުކްއާ ބައްދަލުކުރައްވާ ވާހަކަ ދައްކަވަމުންނެވެ. މި ބައްދަލުވުމުގައި ދެ ފަރާތުން މަޝްވަރާކުރެއްވި މައިގަނޑު ކަންތައްތަކުގެ ތެރޭގައި ސަރަޙައްދީ ފެންވަރުގައި ތިމާވެށި ރައްކާތެރިކުރުމަށް ކުރެވިދާނެ މަސައްކަތްތަކާއި، މޫސުމަށް އަންނަ ބަދަލުތަކާ ގުޅޭގޮތުން އެޅިދާނެ ފިޔަވަޅުތަކާ ބެހޭގޮތުން މަޝްވަރާކުރެއްވިއެވެ. އަދި ދެމެހެއްޓެނިވި ތަރައްޤީއަށް މަގުފަހިކުރުމަށްޓަކައި ސަރަޙައްދީ އެއްބާރުލުން އިތުރުކުރުމުގެ މުހިންމުކަމާ ބެހޭގޮތުންވެސް ވާހަކަދެކެވުނެވެ.

މި ބައްދަލުވުމުގައި ވާހަކަ ދައްކަވަމުން މިނިސްޓަރ ވިދާޅުވީ ސައުތު އޭޝިއާ ސަރަޙައްދުގެ ޤައުމުތަކުގެ މެދުގައި ތިމާވެށީގެ ދާއިރާއިން އޮންނަ ގުޅުން އިތުރަށް ބަދަހިކުރުމަކީ ވަރަށް މުހިންމު ކަމެއް ކަމަށާއި އަޅުގަނޑުމެންގެ ސަރަޙައްދަށް ދިމާވެފައިވާ ތިމާވެށީގެ ގޮންޖެހުންތަކަށް ޙައްލު ހޯދުމަށް އެންމެން ގުޅިގެން މަސައްކަތްކުރަން ޖެހޭކަމަށެވެ.

ސަސެޕްގެ ޑިރެކްޓަރ ޖެނެރަލް ނޯރބު ވަންގްޗުކް ވިދާޅުވީ ދިވެހިރާއްޖެއަކީ ތިމާވެށި ރައްކާތެރިކުރުމުގެ ދާއިރާއިން ސަރަޙައްދުގައި އިސް ދައުރެއް އަދާކުރަމުންދާ ޤައުމެއްކަމަށެވެ. އަދި ކުރިއަށް އޮތްތަނުގައި ދިވެހިރާއްޖެއާއެކު އިތުރަށް މަސައްކަތްކުރުމަށް ސަސެޕްއިން ބޭނުންވާކަމަށްވެސް އޭނާ ވިދާޅުވިއެވެ.