ކާޑެއްދޫ އެއާރޕޯޓު ބައިނަލްއަޤްވާމީ ފެންވަރަށް ތަރައްޤީ ކުރުމަށް ބޭނުންވޭ: ޤާސިމް

ކާޑެއްދޫ އެއާރޕޯޓު ބައިނަލްއަޤްވާމީ ފެންވަރަށް ތަރައްޤީ ކުރުމަށް ބޭނުންވާކަމަށް، އެ އެއާރޕޯޓު ހިންގަމުން އަންނަ ވިލާ އެއާރގެ ފަރާތުން ޤާސިމް އިބްރާޙިމް ވިދާޅުވެއްޖެއެވެ.

އެ އެއާރޕޯޓުގެ ކުރިމަގަށް ވިސްނަވާ ގޮތާ ގުޅިގެން ވާހަކަ ދައްކަމުން ޤާސިމް މިހެން ވިދާޅުވީ، ވިލާ އެއަރއިން ކާޑެއްދޫ އެއަރޕޯޓު ރަނގަޅަށް ބަލަހައްޓަމުން ނުދާކަމަށް ބުނެ ރައްޔިތުންގެ މަޖިލީހުގެ އިޤްތިޞާދީ ކޮމެޓީއަށް ހުށައަޅާފައިވާ މައްސަލައަކާ ގުޅިގެން އެ ކޮމެޓީގައި ވާހަކަފުޅު ދައްކަވަމުންނެވެ.

ޤާސިމް ވިދާޅުވީ، ކާޑެއްދޫ އެއާރޕޯޓު ބައިނަލްއަޤްވާމީ ފެންވަރަށް ތަރައްޤީ ކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވެސް އެދިވަޑައިގެން ކަމަށެވެ. ނަމަވެސް އެ މަސައްކަތް ކުރިޔަށްގެންދިއުމަށް ފަސްޖެހެނީ ދުނިޔޭގެ މަސްރަހަށާއި ރާއްޖޭގެ މަސްރަހަށް ބަލައި، އަދި ރާއްޖޭގެ ކްރެޑިޓް ރޭޝިޔޯއަށް ބަލާއިރު ފައިނޭންސްގެ ދަތިތައް ހުރުމުންކަމަށް ޤާސިމް ވިދާޅުވިއެވެ.

ބައިނަލްއަޤުވާމީ ފެންވަރަށް ތަރައްޤީ ނުކުރެވިގެން މި އުޅެނީ ދުނިޔޭގެ މަސްރަހަށާއި ރާއްޖޭގެ މަސްރަހަށް ބަލާއިރުވެސް އަދި ރާއްޖޭގެ ކްރެޑިޓް ރޭޝިޔޯއަށް ބަލާއިރު ފައިނެންސްގެ ދަތިތައް ހުރުމުން. މިވަގުތު އަޅުގަނޑުމެން މިދަނީ މާމިގިލީ އެއަރޕޯޓުވެސް އިތުރަށް ތަރައްޤީކުރަމުން ވައިޑް-ބޮޑީ އެއަރކްރާފްޓް ޖެއްސޭ ވަރަށް.

ޤާސިމް ވިދާޅުވިއެވެ.

އިޤްތިޞާދީ ކޮމެޓީއަށް ހުށަހަޅާފައިވާ މައްސަލައާ ގުޅިގެން ޤާސިމް ވިދާޅުވީ، އެ ކުންފުންޏާއި ސަރުކާރަށް ގެއްލުން ނުވާނެ ގޮތަކަށް، ކާޑެއްދޫ އެއާރޕޯޓު ދޫކޮށްލަންޖެހޭނެނަމަ އެ ކަމަށް ތައްޔާރަށް އޮތްކަމަށެވެ. 

ޤާސިމް އިތުރަށް ވިދާޅުވީ، އެ އެއާރޕޯޓު މިހާރު ވެސް ހިންގަމުން އަންނަނީ މަހެއްގެ މައްޗަށް ގާތްގަނޑަކަށް މިލިއަނެއްހާ ރުފިޔާގެ ގެއްލުމުގައި ކަމަށާއި، އެހެންނަމަވެސް އެއާރޕޯޓުގެ މަރާމާތުގެ މަސައްކަތްތައް ހުއްޓުމެއް ނެތި ކުރިޔަށްގެންދަވާ ކަމަށެވެ.

ކާޑެއްދޫ އެއާރޕޯޓު ހިންގުމަށް ވިލާ އެއާރއާއެކު ސަރުކާރުން އެއްބަސްވުމަކަށް އައީ 2013 ވަނަ އަހަރެވެ. އެ އެއްބަސްވުން 50 އަހަރުގެ މުއްދަތަށް ހެދިނަމަވެސް، 2017 ވަނަ އަހަރު އެ އެއްބަސްވުން ބާޠިލްކުރިއެވެ. މިކަމާ ގުޅިގެން ވިލާ އެއާރއިން ކޯޓަށް މައްސަލަ ހުށަހެޅުމުން ކޯޓުން ނިންމީ ސަރުކާރުން އެއްބަސްވުން އުވާލީ ގޯސްކޮށް ކަމަށެވެ. އަދި އެ އެއްބަސްވުން ދެމެހެއްޓުމަށް އަމުރުކޮށްފައިވެއެވެ. 

ކާޑެއްދޫގައި އެއަރޕޯޓް ބައިނަލްއަޤުވާމީ ފެންވަރަށް ތަރައްޤީކޮށް، ކާޑެއްދޫއާއި ތިނަދޫ ބުރިޖަކުން ގުޅުވާލުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދެކެވެ. އަދި އެ އަތޮޅުގެ ތިނަދޫގައިވެސް ބައިނަލްއަޤުވާމީ ވައިގެ ބަނދަރެއް ތަރައްޤީކުރުމަށް ރައީސުލްޖުމްހޫރިއްޔާ ވަނީ ނިންމަވާފައެވެ. މި މަސައްކަތް ތައިލެންޑުގެ ކުންފުންޏަކާއި މިހާރު ވަނީ ހަވާލުކޮށްފައެވެ.