ފަސް މިލިޔަން ގަސް ޕްރޮގްރާމްގެ ދަށުން، ހޯނޑެއްދޫ ކައުންސިލުން 10 ހާސް ގަސް އިންދަނީ

ރައީސުލްޖުމްހުރިއްޔާގެ ފަސް މިލިޔަންގަސް އިންދުމުގެ ޕްރޮގްރާމްގެ ދަށުން ގދ. ހޯނޑެއްދޫގައި އެރަށުކައުންސިލުން 10 ހާސް ގަސް އިންދުމުގެ މަސައްކަތް ފަށައިފިއެވެ.

ފަސްމިލިޔަން ގަސް އިންދުމުގެ ޕްރޮގްރާމަކީ މި ސަރުކާރުގެ މެނިފެސްޓޯގައި ހިމެނޭ މުހިންމު ރިޔާސީ ވަޢުދެކެވެ. މި ވަޢުދުގެ ދަށުން ރާއްޖޭގެ އެކި ކަންކޮޅުގައި ގަސް އިންދުމުގެ ހަރަކާތްތައް އަންނަނީ ކުރަމުންނެވެ. އެގޮތުން ހޯނޑެއްދޫގައިވެސް މި މަސައްކަތް މިހާރު މިވަނީ ފަށާފައެވެ. 

ހޯނޑެއްދޫގައި ފެށުނު ގަސް އިންދުމުގެ ޕްރޮގުރާމުގައި ދަނޑުވެރިކަމާއި ދިރޭތަކެއްޗާއި ބެހޭ ވަޒީރު ޑރ. މަރްޔަމް މާރިޔާ ވަނީ ބައިވެރިވެ ވަޑައިގެންފައެވެ. އެކަމަނާ މި ހަރަކާތުގައި ބައިވެރިވެވަޑައިގެންނެވީ، މިހާރު އެކަމަނާ ގދ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ނެވެ.

މި ދަތުރުފުޅަކީ އެ އަތޮޅުގެ ދަނޑުވެރިކަންކުރާ ރަށްތަކާއި، ފަޅުރަށްތަކުގެ ހާލަތު ބައްލަވާލެއްވުމަށް، އެ އަތޮޅުން ދެއްވި ދަޢުވަތަކަށް ކުރައްވާ ދަތުރުފުޅެކެވެ.