ސަލަފުން ކުރިއަށްގެންދާ "ރޯދަކަނބަލުން 1446" ވޯކްޝޮޕްގައި ބައިވެރިވުމަށް ހުޅުވާލައިފި

ޖަމްޢިއްޔަތުއްސަލަފުގެ ފަރާތުން ރަމަޟާން މަހަށް ޚާއްޞަކޮށް ކުރިއަށް ގެންދާ "ރޯދަ ކަނބަލުން1446" ވޯކްޝޮޕްގައި ބައިވެރިވުމުގެ ފުރުސަތު ހުޅުވާލައިފިއެވެ.

މި ޕްރޮގްރާމަކީ 15 އަހަރުން މަތީގެ ކަނބަލުންނަށް ޚާއްޞަ އެޖަމްޢިއްޔާއިން ކުރިއަށް ގެންދާ " ޖަވާހިރު"ގެ ތެރެއިން ކުރިއަށް ގެންދެވޭ ވޯކްޝޮޕެއްކަމަށް ސަލަފުން ބުނެފައިވެއެވެ. ސަލަފުން ބުނެފައިވަނީ ރަމަޟާންމަހުގެ ބަރަކާތާއި، ހެޔޮޘަވާބާއި ދަރުމަ ޙާޞިލުކޮށް، އެ މައްސަރުން ލިބެންވާ ތަރުބަވީ ހެޔޮ ފައިދާ ލިބިގަނެވޭނީ އެ މައްސަރަށް ކުރިއާލައި ތައްޔާރުވެގެން ކަމުގައެވެ. އެގޮތުން މި ވޯކްޝޮޕްގެ ތެރެއިން ރަމަޟާންމަހަށް އިސްތިޤްބާލުކުރާނީ ކިހިނެއްކަމާއި، އެ މައްސަރުގެ މާތްކަމާއި މަތިވެރިކަންޙާޞިލުކުރެވޭނެ ގޮތްތަކާއި، މުސްލިމު ކަނބަލެއްގެ ހައިސިއްޔަތުން އެ މައްސަރުގައި އުޅުމާއިގުޅުން ބަހައްޓަންޖެހޭނެ ގޮތްތައް އެނގިގެންދާނެ ކަމަށްވެސް ސަލަފުން މަޢުލޫމާތު ދެއެވެ.  އަދި ރޯދަމަހުގެ ދުވަސްތަކާއި ރޭތަކުގެބަރަކާތް އެންމެ ފުރިހަމަގޮތުގައި ޙާޞިލުކުރެވޭނީ ކިހިނެއް ކަންކަން އިންތިޒާމުކޮށްގެންކަން އެނގިގެން ދާނެ ކަމަށްވެސް ބުނެފައިވެއެވެ.

‎”ރޯދަ ކަނބަލުން 1446″ ވޯކްޝޮޕް ކުރިއަށްގެންގޮސް ދެއްވާނީ މައްކާގެ އުއްމުލްޤުރާ ޔުނިވަރސިޓީން ފުރަތަމަ ޑިގްރީއާއި މާސްޓާރސް ޑިގްރީ ޙާޞިލުކުރައްވާފައިވާ، އަދި މިހާރު ދިވެހިރާއްޖޭގެ އިސްލާމީޔުނިވަރސިޓީން ޕީއެޗްޑީ ޙާޞިލުކުރައްވަމުން ގެންދަވާ އައްޝައިޚާ ޢާއިޝަތު ރީމާއެވެ. ޝައިޚާ ވަނީ މީގެ ކުރިންވެސް ޖަމްޢިއްޔަތުއްސަލަފުގެ ފަރާތުންކަނބަލުންނަށް ޚާއްޞަކޮށް ކުރިއަށް ގެންދެވުނު އެކިއެކި ސެޝަންތައް ނަންގަވާ
‎ދެއްވާފައެވެ.

‎މި ވޯކްޝޮޕް ކުރިއަށްގެންދިޔުމަށް ހަމަޖެހިފައިވަނީ 22 ފެބްރުއަރީ 2025 ވާ ހޮނހިރުދުވަހު ގަލޮޅު މަދަރުސާ ހޯލުގައި ދެ ދަންފަޅިއަކަށް ބަހާލެވިގެންނެވެ. ފުރަތަމަ ދަންފަޅިއޮންނާނީ އެ ދުވަހުގެ މެންދުރު 14:00 އިން 15:30 އަށް އަދި ދެވަނަ ދަންފަޅި އޮންނާނީ އެ ދުވަހުގެ 16:00 އިން 18:00 އަށެވެ.

ސަލަފުން މިފަހަރުގެ ވޯކްޝޮޕް ހުޅުވާލާފައިވަނީ 50 މީހަކަށެވެ. މި ވޯކްޝޮޕްގައި ބައިވެރިވުމަށް ފޯމު ފުރުމުން، ޖާގަހުރިވަރަކުން ޖާގަ ދެވޭނެ ކަމަށް ސަލަފުން ބުނެއެވެ. އަދި އެކަން އެ ޖަމްޢިއްޔާގެ ފަރާތުން އަންގާނެއެވެ. މި ވޯކްޝޮޕްގައި ބައިވެރިވުމަށް ބައިވެރިންގެ ރަޖިސްޓްރޭޝަން ފީގެ ގޮތުގައި 150 ރުފިޔާދައްކަންޖެހެއެވެ.

ވޯކްޝޮޕުގައި ބައިވެރިވުމަށް މި ލިންކުގައިވާ ފޯމު ފުރާލެވޭނެއެވެ.

https://docs.google.com/forms/d/e/1FAIpQLScFC61WXW8Ubo706uDmTjnRyUCyN-NKyw7bLbQQ9Pfd1Ftv-w/viewform?usp=dialog