Ads by Exprox

ޚަބަރު

ވަގުތުން ޑޮލަރު މާރުކުރެވޭގޮތަށް އެމްއައިބީއިން ހެޔޮ ބަދަލެއް

ވަގުތުން ޑޮލަރު މާރުކުރެވޭގޮތަށް އެމްއައިބީއިން ހެޔޮ ބަދަލެއް

އެމްއައިބީ/ ފޮޓޯ

19 ފެބްރުއަރީ 2025، 05:34

ހުލާސާ

  • މި ޚިދުމަތް ލިބޭނީ ފައިސާނެޓް އެޕް މެދުވެރިކޮށް 
  • ޑޮލަރު މާރުކުރާނީ 15.42 ރުފިޔާގެ ރޭޓުން

ވަގުތުން ޑޮލަރު މާރުކުރެވޭގޮތަށް މޯލްޑިވްސް އިސްލާމިކް ބޭންކް، އެމްއައިބީން އިންޓަނެޓް ބޭންކިންގ ނިޒާމަށް ގެނައި ބަދަލާއެކު ވިޔަފާރިކުރާ ފަރާތްތަކަށް ގިނަ ލުއިތަކެއް ލިބޭނެކަމަށް އެބޭންކުން ވިދާޅުވެއްޖެއެވެ.

ބޭރުފައިސާއާ ބެހޭ ޤާނޫނުގެ ދަށުން އެމްއައިބީއިން ތަޢާރަފްކޮށްފައިވާ މި ޚިދުމަތަކީ ވިޔަފާރިތަކާއި ފަރުދުންނަށް އޮންލައިންކޮށް ބޭރުފައިސާގެ މުޢާމަލާތްތައް ބެލެހެއްޓޭނެ ނިޒާމެއް ޤާއިމުކުރުމަށް ތަޢާރަފްކޮށްފައިވަ ޤަވައިދެކެވެ. 

މި ޚިދުމަތް ހޯދޭނީ އެމްއައިބީގެ އިންޓާރނެޓް ބޭންކިންގ ޕްލެޓްފޯރމް ފައިސާނެޓް މެދުވެރިކޮށެވެ. މިގޮތުން، ޑޮލަރު މާރުކުރަން ބޭނުންވާ ފަރާތްތަކުން އިންޓާރނެޓް ބޭންކިންގއަށް ލޮގިންވެ، ބޭނުންވާ މަޢުލޫމާތު ފުރިހަމަކުރުމަށްފަހު، ޑޮލަރު މާރުކުރުމުން އެ ފަރާތެއްގެ އެކައުންޓަށް ވަގުތުން ރުފިޔާ ޖަމާވާނެކަމަށް އެމްއައިބީއިން ވިދާޅުވެއެވެ. 

ބީއެމްއެލްއިން ވެސް ވަނީ އިންޓަނެޓް ބޭންކިން ޚިދުމަތް މެދުވެރިކޮށް ބޭންކަށް ޑޮލަރު މާރުކުރެވޭ ގޮތް ހަދާފައެވެ. ބީއެމްއެލް، އަދި އެމްއައިބީ އިން ތަޢާރަފްކޮށްފައިވާ މި ދެ ނިޒާމުގައި ވެސް ޑޮލަރު މާރުކުރާނީ 15.42 ރުފިޔާގެ ގެ ރޭޓުންނެވެ. 

ބޭރުފައިސާއާއި ބެހޭ ޤާނޫނުގެ ދަށުން ފަތުރުވެރިކަމުގެ ދާއިރާގެ ވިޔަފާރިތައް ދެ ގިންތިއަކަށް ބަހާލައި، އެއިން ކޮންމެ ތަނަކަށް އަންނަ ފަތުރުވެރިއަކަށް، ބޮލަކަށް ޖެހޭ ނިސްބަތުން ވަކިވަރެއް ރާއްޖޭގެ ހިންގާ ބޭންކުތަކަށް މާރުކުރުމަށް އެ ވިޔަފާރިތަކަށް ލާޒިމްކުރެއެވެ.

އެގޮތުން ރިޒޯޓުތަކުން އަންނަ ކޮންމެ ފަތުރުވެރިއަކަށް ބޮލަކަށް 500 ޑޮލަރު މާރުކުރަން ޖެހޭއިރު، ގެސްޓް ހައުސްތަކުން މާރުކުރަން ޖެހޭނީ ކޮންމެ ފަތުރުވެރިއަކަށް 25 ޑޮލަރެވެ. އެހެންނޫންނަމަ ދެ ގިންތީގައި ވެސް ހިމެނޭ ވިޔަފާރިތަކުން މީލާދީ މަހެއްގެ ތެރޭގައި އެފަރާތްތަކަށް ލިބޭ ބޭރުފައިސާގެ އާމްދަނީ 20 އިންސައްތަ މާރުކުރުމުގެ ފުރުސަތު ޤާނޫނުން ވަނީ ފަހިކޮށްދީފައެވެ.

އެމްއެމްއޭން ވިދާޅުވީ ބޭރު ފައިސާއިން އާމްދަނީ ލިބޭ ވިޔަފާރިތަކަށް، 2024 ވަނަ އަހަރުގެ އޮކްޓޫބަރު މަހު ލިބިފައިވާ ބޭރު ފައިސާގެ އާމްދަނީއަށް ބިނާކޮށް، ފާއިތުވި ޖަނަވަރީ މަހުގެ ނިޔަލަށް ބޭންކުތަކަށް 50 މިލިއަން އެމެރިކާ ޑޮލަރަށްވުރެ އިތުރަށް މާރުކޮށްފައިވާކަމަށެވެ. އަދި މި މުއްދަތުގައި، ރާއްޖޭގެ ރިޒޯޓުތަކުގެ ތެރެއިން %90 ރިޒޯޓުތަކުން މި ގަވާއިދާ އެއްގޮތަށް ބޭންކިން ނިޒާމަށް ބޭރު ފައިސާ މާރުކޮށްފައިވާކަމަށް ވެސް އެމްއެމްއޭންވަނީ ވިދާޅުވެފައެވެ.

މި ލިޔުން ކިޔާލުމުން

Ads by MSS