"ޤާރީންގެ ގުންޒަރު 2" ހޮނިހިރު ދުވަހުގެ ރޭ

ކީރިތި ޤުރްއާން ކިޔެވުމާއި ކިޔަވައިދިނުމުގެ ދާއިރާގައި މަސައްކަތްކުރައްވާ ޤާރީންނަށް އަމާޒުކޮށްގެން ކުރިއަށް "ޤާރީންގެ ގުންޒަރު"  ގެ ދެވަނަ ބައްދަލުވުން ހޮނިހިރު ދުވަހުގެ ރޭ ބޭއްވުމަށް ކީރިތި ޤުރުއާނާ ބެހޭ ޤައުމީ މަރުކަޒުން ނިންމައިފިއެވެ.

މިއީ ރާއްޖޭގެ ޤާރީން ބައްދަލުވެ، ޚިޔާލު ބަދަލުކޮށް، މަޝްވަރާ ކޮށްލުމަށާއި އެކުވެރިކަން އާލާކޮށް، ގުޅުން ބަދަހިކުރުމުގެ ވަގުތުކޮޅެއް ފަހިކޮށްދިނުމުގެ މަޤްޞަދުގައި، ސިލްސިލާކޮށް ބާއްވަން ނިންމަވައިފައިވާ ބައްދަލުވުމެއްކަމަށް އިސްލާމީ ކަންތައްތަކާ ބެހޭ ވުޒާރާއިން މީގެ ކުރިން ބުނެފައިވެއެވެ.

މި ވޯކްޝޮޕް ކުރިއަށް ގެންދިއުމަށް ހަމަޖެހިފައިވަނީ 2025 ފެބުރުވަރީ 22 ވަނަދުވަހުގެ ރޭގަނޑު 20:30 އިން 22:30 އަށެވެ. ނަމަވެސް މި ވޯކްޝޮޕްގައި ބައިވެރިވުމަށް ފުރުސަތު މިހާރުވަނީ ހަމަވެފައެވެ. 

ޤާރީންގެ ގުންޒަރު ވޯކްޝޮޕްގެ ފުރަތަމަ ބުރު 7 އޮގަސްޓު 2024 ވީ ބުދަ ދުވަހުގެ ރޭ އިސްލާމީ މަރުކަޒުގެ ޖަލްސާކުރާ މާލަމުގައި ވަނީ ބާއްވާފައެވެ. މި ބައްދަލުވުމުގައި ކީރިތި ޤުރްއާން ކިޔަވައިދިނުމުގެ ދާއިރާގައި މަސައްކަތް ކުރައްވަމުންގެންދަވާ ޤާރީންގެ ތެރެއިން 36 ބޭފުޅުން ބައިވެރިވެވަޑައިގަތެވެ.

މި ގުންޒަރުގައި ކީރިތި ޤުރްއާނާ ބެހޭ ޤައުމީ މަރުކަޒުން، ކީރިތި ޤުރްއާން ކިޔަވައިދިނުމުގެ ދާއިރާއާ ގުޅުން ހުރި ކަރުދާހެއް ހުށަހަޅައި، ޤާރީންގެ މެދުގައި އެ ކަރުދާހާމެދު ފުޅާ ދާއިރާއެއްގައި މަޝްވަރާކުރެވުނެވެ. އަދި ޤުރްއާނުގެ ދާއިރާގައި ރާއްޖޭގެ ޤާރީންނަށް މިހާރު ދިމާވާ ގޮންޖެހުންތަކާމެދު ޤާރީންގެ މެދުގައި ޚިޔާލު ބަދަލުކުރެވުނެވެ.