މާލޭ ސަރަޙައްދުގައި މަސްދަޅުކޭސް ބަހަން ފަށައިފި

ރޯދަ ހަދިޔާގެ ގޮތުގައި ސަރުކާރުން ހަދިޔާކުރާ މަސްދަޅު ކޭސް މާލޭ ސަރަޙައްދުގައި ބަހަން ފަށައިފިއެވެ. މާލެ ސަރަޙައްދުގައި މަސްދަޅު ބަހަން ފަށާފައިވަނީ މިރޭ 20:30ގައެވެ.

މަސްދަޅުތައް ބަހަން ފެށުމުގެ ގޮތުން މިފްކޯގެ އޮފީސް ކޮމްޕައުންޑުގައި ބޭއްވި ރަސްމިއްޔާތުގައި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރާއި އެސްޓީއޯގެ ސީއީއޯ ޝިމާދު އިބްރާހިމްގެ އިތުރުން މިފްކޯގެ ސީއީއޯ ޑރ. ވިޓާލީ ލޫބުމޮވްވެސް ވަނީ ބައިވެރިވެވަޑައިގެންފައެވެ.

މާލެ ސަރަޙައްދުގައި މަސްދަޅު ކޭސް ބެހުމަށް ހަމަޖެހިފައިވަނީ މިފްކޯ އޮފީސް ކޮމްޕައުންޑް، ހެންވޭރު އެމްޓީސީސީ ސޯމިލް، ވިލިމާލޭ ވެމްކޯ ސައިޓް، ހުޅުމާލެ ފޭސް-1 ގެ އުމަރު ޒާހިރު ބިލްޑިންގ އަދި ހުޅުމާލެ ފޭސް-2 ގެ ހިޔާ ފްލެޓް ޓަވަރ 10 ގެ ޔޫތު ސެންޓަރުގައެވެ. މާލޭ ސަރަޙައްދުގައި މަސްދަޅުކޭސް ބެހުމުގެ މަސައްކަތް މިރެއިން ފެށިގެން މިމަހުގެ 27 ނިޔަލަށް ހުކުރު ދުވަސް ފިޔަވާ ކޮންމެ ދުވަހެއްގައެވެ. އެގޮތުން މާލެ ސަރަޙައްދުގައި މަސްދަޅު ކޭސް ބެހުމަށް ނިންމާފައިވާ ގަޑިތަކަކީ:

ހޮނިހިރު ދުވަސް:

ހެނދުނު: 10:00 އިން ހަވީރު 16:00 އަށް
ރޭގަނޑު: 20:30 އިން 23:00 އަށް

އާދިއްތަ-ބުރާސްފަތި ދުވަހަށް:

މެންދުރު ފަހު 14:30 އިން 18:00 އަށް
ރޭގަނޑު 20:30 އިން 23:00 އަށް

މިރޭ މަސްދަޅުކޭސް ބަހަން ފެށުމާއެކު ގިނަ ބަޔަކުވަނީ މަސްދަޅުކޭސް ހޯދުމަށް ކިއުއަށް އަރާފައެވެ. މަސްދަޅު ކޭސް ދޫކުރާނީ ހަމައެކަނި ދިވެހީންނަށް ކަމަށާއި، މަސްދަޅު ކޭސް ބަލާ ދާ މީހާގެ އައިޑީކާޑު އަދި އެގޭބީސީއެއްގެ ކަރަންޓް ބިލުގެ އެންމެ ފަހު ތިން މަހުގެ ބިލުގެ ތެރެއިން ކަރަންޓް މީޓަރު އެނގޭނެ ފަދަ ލިޔުމެއް ގެންނަން ޖެހޭނެކަމަށް އެސްޓީއޯއިން އަންގާފައިވެއެވެ.