ސަޢުދީ އިން ރާއްޖޭގައި އަރަބި ބަސް އުގަންނައިދޭ މައުހަދެއް ގާއިމުކުރަން ނިންމައިފި

ސައުދީ އަރަބިއްޔާގެ ޚާދިމުލް ޙަރަމައިން އައްޝަރީފައިން، އަލްމަލިކް ސަލްމާން ބިން އަބްދުލްއަޒީޒް، އަރަބި ބަސް ދުނިޔެއަށް ފެތުރުމަށް ނަންގަވާފައިވާ ޚާއްޞަ އިސްނެގުމުގެ ދަށުން، ދިވެހިރާއްޖޭގައި އަރަބި ބަސް އުނގަންނައިދޭ މަޢުހަދެއް ޤާއިމުކުރުމަށް، އެ ޤައުމުގެ ކަމާގުޅުންހުރި އިދާރާތަކަށް އަންވައިފިއެވެ.

މި މުހިންމު ނިންމެވުން ތަންފީޛުކުރުމުގެ މަސްއޫލިއްޔަތު، ރަސްގެފާނު ވަނީ ސަޢުދީ އަރަބިއްޔާގެ އެންމެ ފާހަގަކޮށްލެވޭ މަތީ ތަޢުލީމީ މަރުކަޒު ކަމުގައިވާ، އިމާމް މުޙައްމަދު ބިން ސައޫދު އިސްލާމިކް ޔުނިވަރސިޓީއާ ޙަވާލުކުރައްވާފައެވެ. އެ ޔުނިވަރސިޓީން ނެރުއްވާފައިވާ ބަޔާނެއްގައި ވިދާޅުވެފައިވަނީ، އަރަބި ބަހުން މުޢާމަލާތް ނުކުރާ މުސްލިމް ޤައުމުތަކުގައި އަރަބި ބަސް އުނގަންނައިދިނުމުގެ މަސައްކަތް ފުޅާކުރުމަށް ސައުދީ އަރަބިއްޔާގެ ތަޢުލީމީ ވަޒީރު، މަޢާލީ އައްޝައިޚް ޔޫސުފް ބިން އަބްދުﷲ އަލް-ބުންޔާންގެ އެއްބާރުލެއްވުން ލިބިވަޑައިގަންނަވާކަމަށެވެ. 

މީގެއިތުރުން، ދިވެހިރާއްޖޭގައި ޤާއިމުކުރެވޭ މަޢުހަދުގެ ޑިރެކްޓަރުގެ މަޤާމަށް ޑރ. ޞާލިޙް ބިން ސުލައިމާން އަލް-އަރާޖާ ޢައްޔަންކުރައްވައި، ދިވެހިރާއްޖޭގައި ހުންނަ ސައުދީ އަރަބިއްޔާގެ ސަފާރާއާ ގުޅިގެން މި މަޢުހަދު ޤާއިމުކޮށް ތަޢުލީމު ފޯރުކޮށްދިނުމުގެ މަސައްކަތް ފެށުމަށް ޙަވާލުކުރައްވާފައިވާ ކަމަށް އެ ބަޔާނުގައި ފާހަގަކޮށްފައިވެއެވެ.