ފޮރިން މިނިސްޓަރު ޑރ. ޢަބްދުﷲ ޚަލީލްއަށް ލަންކާ މީހަކު އިންޒާރުދޭ މައްސަލައެއް ބަލަނީ

ފޮރިން މިނިސްޓަރު ޑރ. ޢަބްދުﷲ ޚަލީލް އަށް ލަންކާގައި ދިރިއުޅޭ މީހަކު އިންޒާރު ދިން މައްސަލައެއް ދިވެހި ފުލުހުންގެ ޚިދުމަތުން ބަލަން ފަށައިފި އެވެ.

ފުލުހުން ވިދާޅުވީ "ނަދީޝް ޕެރެރާ" ނަމަކަށް ކިޔާ މީހަކު ފޮރިން މިނިސްޓަރަށް އިންޒާރު ދިން މައްސަލަ އެ އިދާރާގެ ސަމާލުކަމަށް އައިސްފައިވާތީ، ގުޅުން ހުރި އިދާރާތަކާ އެކު ބަލަންޖެހޭ ކަންކަން ބަލަމުންދާ ކަމަށެވެ.

އެ މީހާ ގެންދަނީ ވަޒީރު ލަންކާއަށް ވަޑައިގެންނެވި ފަހުން އެކިފަހަރު މަތިން އިންޒާރު ދެމުންނެވެ. އެ މީހާގެ އިންޒާރުގެ ޕޯސްޓުތައް ޖަހަމުން ދަނީ އެކްސްގެ އެކައުންޓްގައެވެ. މި މީހާ އެކްސްގައި ކޮށްފައިވާ ޕޯސްޓެއްގައި ވަނީ "ލަންކާގައި މިނިސްޓަރު އިންނަވާ ކާރު ފުރޮޅާލައިގެން ގޮސް އަލިފާނުން އުފެދޭ ކާބަންމޮނޮއޮކްސައިޑު ހަށިގަނޑުގެ ތެރެއަށް ވަދެ، މަރުވުމުގެ ސަބަބެއް ކަމަށް ވެދާނެތޯ" ސުވާލު އުފައްދާފައެވެ.

އެ ފިިރިހެނަކީ ކުރިން ދިވެއްސަކާ ކައިވެނިކޮށްގެން ރާއްޖޭގައި އުޅުނު މީހެކެވެ. އެ ދެ މީހުންގެ ކައިވެންޏަށް ކުއްޖަކު ވެސް ހުންނަކަމަށާއި، ފަހުން އޭނާ ރާއްޖެ އެތެރެވާން އުޅުމުން، އެ ފުރުސަތު ނުދީ ޑީޕޯޓުކޮށްލީ ކަމަށް ބައެއް މީޑިއާ ތަކުން ރިޕޯޓު ކޮށްފައިވެއެވެ.